ಸುಳ್ಯದಲ್ಲಿ ಉತ್ತಮ ಮಳೆ : ಮುಂಗಾರು ಚುರುಕಾಗುವ ಲಕ್ಷಣ

July 3, 2019

8:46 AM

The Rural Mirror ಸುದ್ದಿಜಾಲ

ಸುಳ್ಯ: ಸುಳ್ಯದಲ್ಲಿ ಬುಧವಾರ ಬೆಳಿಗ್ಗಿನಿಂದ ಉತ್ತಮ ಮಳೆ ಸುರಿದಿದೆ. ಜೂನ್ ತಿಂಗಳಲ್ಲಿ ದುರ್ಬಲವಾಗಿದ್ದ ಮುಂಗಾರು ಮಳೆ ಜುಲೈ ಆರಂಭದಿಂದ ಚುರುಕಾಗುವ ಲಕ್ಷಣ ತೋರಿದೆ. ಮಂಗಳವಾರ ಹಗಲು ಮತ್ತು ರಾತ್ರಿ ಸಾಮಾನ್ಯ ಮಳೆಯಾಗಿತ್ತು. ಇದರಿಂದ ಮಳೆಗಾಲದ ಲಕ್ಷಣಗಳು ಗೋಚರಿಸಿದ್ದವು. ಬುಧವಾರ ಬೆಳಿಗ್ಗನಿಂದ ಮಳೆಯಾಗುವುದು ನಿರೀಕ್ಷೆ ಹುಟ್ಟಿಸಿದೆ. ಜೂನ್ ತಿಂಗಳಲ್ಲಿ ಮಳೆ ಬಾರದೇ ಇದ್ದುದು ಜನರಲ್ಲಿ ದಿಗಿಲು ಹುಟ್ಟಿಸಿತ್ತು.
ಅಪರೂಪಕ್ಕೆ ಮಾತ್ರ ಬರುವ ಹನಿ ಮಳೆ, ಕಡು ಬಿಸಿಲು, ಏರಿದ ಉಷ್ಣಾಂಶದ ವಾತಾವರಣ ಜನರನ್ನು ಕಂಗೆಡಿಸಿತ್ತು. ಇದೀಗ ಜುಲೈನಲ್ಲಿ ಮಳೆಗಾಲ ಬಲಗೊಳ್ಳುವ ಸೂಚನೆ ನೀಡಿದೆ.
ಹವಾಮಾನ ಇಲಾಖೆ ನೀಡಿದ ಎಲ್ಲಾ ಮುನ್ಸೂಚನೆಯನ್ನೂ ತಲೆ ಕೆಳಗಾಗಿಸಿ ಮಳೆಯಿಲ್ಲದ ಶತಮಾನದ ಕಠಿಣ ಜೂನ್ ತಿಂಗಳು ಮುಗಿದು ಹೋಯಿತು. ಜುಲೈನಲ್ಲಾದರೂ ಮುಂಗಾರು ತನ್ನ ವೈಭವವನ್ನು ಪ್ರದರ್ಶಿಸಬಹುದು ಎಂಬ ನಿರೀಕ್ಷೆ ಹುಟ್ಟಿಸಿದೆ.