ಬಾಂಗ್ಲಾದೇಶದಲ್ಲಿ ಅಡಿಕೆ ನಿಯಂತ್ರಣಕ್ಕೆ ಸ್ಪಷ್ಟ ನೀತಿ ಇಲ್ಲ | WHO ವೆಬಿನಾರ್‌ನಲ್ಲಿ ಡಾ. ಅಬ್ದುಲ್ ಮಾಸೂದ್

ಆಗ್ನೇಯ ಏಷ್ಯಾದಲ್ಲಿ ಅಡಿಕೆ ಬಳಕೆಯಿಂದ ಉಂಟಾಗುತ್ತಿರುವ ಆರೋಗ್ಯ ಅಪಾಯಗಳ ಕುರಿತು ವಿಶ್ವ ಆರೋಗ್ಯ ಸಂಸ್ಥೆ (WHO) ಆಯೋಜಿಸಿದ್ದ ವೆಬ್‌ನಾರ್‌ನಲ್ಲಿ ಬಾಂಗ್ಲಾದೇಶದ ತಜ್ಞರು ತಮ್ಮ ದೇಶದಲ್ಲಿ ಅಡಿಕೆ ನಿಯಂತ್ರಣಕ್ಕೆ ಯಾವುದೇ ನೇರ ನೀತಿಗಳು ಇಲ್ಲವೆಂದು ಸ್ಪಷ್ಟಪಡಿಸಿದರು.

ಢಾಕಾ ಡೆಂಟಲ್ ಕಾಲೇಜು ಮತ್ತು ಆಸ್ಪತ್ರೆಯ ಡಾ. ಅಬ್ದುಲ್ ಅಲ್ ಮಾಸೂದ್ ಅವರು ಬಾಂಗ್ಲಾದೇಶವನ್ನು ಪ್ರತಿನಿಧಿಸಿ ಮಾತನಾಡಿ, “ಬಾಂಗ್ಲಾದೇಶದಲ್ಲಿ ಅಡಿಕೆ ಉತ್ಪಾದನೆ ಹೆಚ್ಚಿದ್ದರೂ, ಅದರ ಬಳಕೆ ನಿಯಂತ್ರಣಕ್ಕೆ ಯಾವುದೇ ನಿಯಂತ್ರಣ ಚೌಕಟ್ಟು ಇಲ್ಲ” ಎಂದು ಹೇಳಿದರು.

ಡಾ. ಮಾಸೂದ್ ಅವರ ಮಾಹಿತಿ ಪ್ರಕಾರ, ಬಾಂಗ್ಲಾದೇಶದ Food Safety Act 2013 ಅಡಿಯಲ್ಲಿ ಅಡಿಕೆಯನ್ನು ಆಹಾರವಾಗಲಿ, ಔಷಧವಾಗಲಿ ಎಂದು ವರ್ಗೀಕರಿಸಿಲ್ಲ. ಇದರಿಂದ ಅಡಿಕೆ ನಿಯಂತ್ರಣವು ‘ನೀತಿ ಶೂನ್ಯತೆ’ಯಲ್ಲಿದ್ದು, ನಿಯಮಾವಳಿ ತಂಬಾಕು–ಅಡಿಕೆ ಮಿಶ್ರಿತ ಉತ್ಪನ್ನಗಳ ಮೇಲಷ್ಟೇ ಸೀಮಿತವಾಗಿದೆ. ಅಲ್ಲದೆ, ಪ್ರಯೋಗಾಲಯ ಹಾಗೂ ತಾಂತ್ರಿಕ ಸಾಮರ್ಥ್ಯದ ಕೊರತೆಯಿಂದ ಸರಬರಾಜು ಜಾಲವು ಬಹುತೇಕ ನಿಯಂತ್ರಣವಿಲ್ಲದೆ ಸಾಗುತ್ತಿದೆ ಎಂದು ಅವರು ಹೇಳಿದರು.

ಬಾಂಗ್ಲಾದೇಶದಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ ನಿಷೇಧ ಇದ್ದರೂ, ಅಡಿಕೆ ಬಳಕೆಯ ಕುರಿತು ಯಾವುದೇ ದಂಡ ಅಥವಾ ನಿಯಮಗಳಿಲ್ಲ. ಧೂಮಪಾನ ಮಾಡಿದರೆ 50–100 ಟಾಕಾ ದಂಡ ವಿಧಿಸುವ ವ್ಯವಸ್ಥೆ ಮಾತ್ರ ಇತ್ತೆಂದು ಅವರು ವಿವರಿಸಿದರು.

ಬಾಂಗ್ಲಾದೇಶದಲ್ಲಿ ಅಡಿಕೆ ಬಳಕೆಯ ಹೊರೆ ಕಡಿಮೆ ಮಾಡಲು ಡಾ. ಮಾಸೂದ್ ಅವರು ಹಲವು ಕ್ರಮಗಳನ್ನು ಮಾಡಬಹುದೆಂದು ಸಲಹೆ ನೀಡಿದರು.

• ಅಡಿಕೆ ಮರದಿಂದ ಉತ್ಪಾದನೆ ಆಗುವ ಸಂಪನ್ಮೂಲವನ್ನು ಟೆಕ್ಸ್ಟೈಲ್ ನೂಲು, ಪೇಪರ್‌ಬೋರ್ಡ್, ಆರ್ಗ್ಯಾನಿಕ್ ಗೊಬ್ಬರ ಹಾಗೂ ಪರಿಸರ ಸ್ನೇಹಿ ಉತ್ಪನ್ನಗಳಿಗೆ ಬಳಸುವುದು

• ಅಡಿಕೆಗೆ ಪ್ರತ್ಯೇಕ ನೀತಿ ಮತ್ತು ನಿಯಮಾವಳಿ ರೂಪಿಸುವುದು

• ವಿವಿಧ ಸಚಿವಾಲಯಗಳ ಸಹಕಾರದಿಂದ ನಿಯಂತ್ರಣ ಜಾರಿ

• ಬಾಯಿ ಆರೋಗ್ಯ ತಪಾಸಣೆ ಮತ್ತು ಚಿಕಿತ್ಸಾ ವ್ಯವಸ್ಥೆ ಬಲಪಡಿಸುವುದು

• ಶಾಲಾ ಮಟ್ಟದಲ್ಲೇ ಜಾಗೃತಿ ಕಾರ್ಯಕ್ರಮ ಆರಂಭಿಸುವುದು

• Smoking Cessation Support ಕಾರ್ಯಕ್ರಮಗಳಲ್ಲಿ ಅಡಿಕೆ ನಿಯಂತ್ರಣ ಸೇರಿಸುವುದು

ಒಟ್ಟಾರೆ, ಬಾಂಗ್ಲಾದೇಶದಲ್ಲಿ ಅಡಿಕೆ ಬಳಕೆಯ ಪ್ರಮಾಣ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಸ್ಪಷ್ಟವಾದ ನಿಯಂತ್ರಣ ನೀತಿ ಹಾಗೂ ಜನಜಾಗೃತಿ ಕಾರ್ಯಕ್ರಮಗಳು ಅಗತ್ಯವೆಂದು WHO ವೆಬಿನಾರ್‌ನಲ್ಲಿ ಹೇಳಿದರು. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ

ಇದನ್ನೂ ಓದಿ…..