ಇತ್ತೀಚಿನ ದಿನಗಳಲ್ಲಿ ಸಂಭವಿಸುತ್ತಿರುವ ನೈಸರ್ಗಿಕ ವಿಪತ್ತುಗಳು ಹವಾಮಾನ ಬದಲಾವಣೆಯ ಪರಿಣಾಮಗಳ ಕುರಿತು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುವ ಅಗತ್ಯವನ್ನು ಸ್ಪಷ್ಟಪಡಿಸುತ್ತಿವೆ. ಹವಾಮಾನ ಬದಲಾವಣೆಯನ್ನು ನಿಯಂತ್ರಿಸುವುದು ಕೇವಲ ಸರ್ಕಾರ ಅಥವಾ ಕಾನೂನು ವ್ಯವಸ್ಥೆಯಿಂದ ಸಾಧ್ಯವಿಲ್ಲ; ಸ್ಥಳೀಯ ಸಮುದಾಯದಿಂದ ಹಿಡಿದು ಜಾಗತಿಕ ಮಟ್ಟದವರೆಗೆ ಸಾಮೂಹಿಕ ಪ್ರಯತ್ನ ಅಗತ್ಯ ಎಂದು ರಾಷ್ಟ್ರಪತಿ ದ್ರೌಪದಿ ಮುರ್ಮು ಹೇಳಿದ್ದಾರೆ.
ದೆಹಲಿಯಲ್ಲಿ ನಡೆದ ‘ಪರಿಸರ ಮತ್ತು ಹವಾಮಾನ ಗತಿಶೀಲತೆಯ ಭವಿಷ್ಯ’ ಕುರಿತ ಎರಡು ದಿನಗಳ ಅಂತಾರಾಷ್ಟ್ರೀಯ ಸಮ್ಮೇಳನದ ಸಮಾರೋಪ ಸಮಾರಂಭದಲ್ಲಿ ರಾಷ್ಟ್ರಪತಿ ಪಾಲ್ಗೊಂಡು ಮಾತನಾಡಿದರು.
ಈ ಸಂದರ್ಭದಲ್ಲಿ ಕೇಂದ್ರ ವಿದ್ಯುತ್, ವಸತಿ ಮತ್ತು ನಗರಾಭಿವೃದ್ಧಿ ಸಚಿವ ಮನೋಹರ ಲಾಲ್, ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿ ಬಿ.ವಿ. ನಾಗರತ್ನ, ರಾಷ್ಟ್ರೀಯ ಹಸಿರು ನ್ಯಾಯಾಧಿಕರಣದ ಅಧ್ಯಕ್ಷ ನ್ಯಾಯಮೂರ್ತಿ ಪ್ರಕಾಶ್ ಶ್ರೀವಾಸ್ತವ, ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.
ಇತ್ತೀಚಿನ ನೈಸರ್ಗಿಕ ವಿಪತ್ತುಗಳು ಹವಾಮಾನ ಬದಲಾವಣೆಯ ಅಪಾಯವನ್ನು ಮತ್ತಷ್ಟು ಸ್ಪಷ್ಟಪಡಿಸುತ್ತಿವೆ ಎಂದು ರಾಷ್ಟ್ರಪತಿ ಹೇಳಿದರು. ಜಾಗತಿಕ ತಜ್ಞರು ಹವಾಮಾನ ಬದಲಾವಣೆಯ ಅಪಾಯದ ಕುರಿತು ನಿರಂತರವಾಗಿ ಎಚ್ಚರಿಕೆ ನೀಡುತ್ತಿದ್ದಾರೆ. ಹೀಗಾಗಿ ಪರಿಸರ ಸಂರಕ್ಷಣೆಯ ಹೊಣೆಗಾರಿಕೆಯನ್ನು ಸರ್ಕಾರದ ಮೇಲೆ ಮಾತ್ರ ಹಾಕದೆ, ಸಮಾಜದ ಪ್ರತಿಯೊಬ್ಬರೂ ತಮ್ಮ ಪಾತ್ರವನ್ನು ಅರಿತುಕೊಳ್ಳಬೇಕು ಎಂದು ಅವರು ಹೇಳಿದರು.
ಬುಡಕಟ್ಟು ಸಮುದಾಯದ ಜೀವನಪಾಠ : ಬುಡಕಟ್ಟು ಸಮುದಾಯಗಳು ಪ್ರಕೃತಿಯಲ್ಲಿ ದೇವರನ್ನು ಕಾಣುತ್ತಾರೆ. ಕಾಡು, ಮರ, ಭೂಮಿ ಮತ್ತು ಪರ್ವತಗಳೊಂದಿಗೆ ಅವರು ಹೊಂದಿರುವ ಸಂಬಂಧವು ಪ್ರಕೃತಿ ಸಂರಕ್ಷಣೆಯ ಒಂದು ವಿಶಿಷ್ಟ ಜೀವನದೃಷ್ಟಿಯನ್ನು ಪ್ರತಿಬಿಂಬಿಸುತ್ತದೆ ಎಂದು ರಾಷ್ಟ್ರಪತಿ ಹೇಳಿದರು. ‘ಬದುಕು ಮತ್ತು ಬದುಕಲು ಬಿಡು’ ಎಂಬ ಆದಿವಾಸಿ ತತ್ವವನ್ನು ಇಡೀ ಜಗತ್ತು ಅಳವಡಿಸಿಕೊಳ್ಳಬೇಕಾದ ಅಗತ್ಯವಿದೆ ಎಂದರು.
ಬುಡಕಟ್ಟು ಸಮುದಾಯಗಳಿಗೆ ಆಧುನಿಕ ವಿಜ್ಞಾನದ ಎಲ್ಲ ವಿಚಾರಗಳ ಅರಿವು ಇಲ್ಲದಿದ್ದರೂ, ಮರವನ್ನು ಬದುಕಲು ಬಿಡದಿದ್ದರೆ ಅದು ಮನುಷ್ಯರನ್ನು ಬದುಕಲು ಬಿಡುವುದಿಲ್ಲ ಎಂಬ ಮೂಲಭೂತ ಸತ್ಯದ ಅರಿವು ಇದೆ ಎಂದು ಅವರು ಹೇಳಿದರು.
ಈ ರೀತಿಯ ಪರಿಸರ ಸ್ನೇಹಿ ಜೀವನದೃಷ್ಟಿಯಿಂದ ಸಮಾಜದ ಎಲ್ಲರೂ ಸ್ವಯಂ ಪರಿವರ್ತನೆ ಮಾಡಿಕೊಳ್ಳಬೇಕು ಎಂದು ರಾಷ್ಟ್ರಪತಿ ಕರೆ ನೀಡಿದರು.
ಜೀವವೈವಿಧ್ಯ ನಾಶವೂ ಹವಾಮಾನ ಸಂಕಷ್ಟದ ಭಾಗ : ಜೀವವೈವಿಧ್ಯದ ನಾಶ, ನೀರಿನ ಕೊರತೆ ಮತ್ತು ಭೂ ಸವಕಳಿ ಹವಾಮಾನ ಅಸಮತೋಲನದ ಪ್ರಮುಖ ಉದಾಹರಣೆಗಳಾಗಿವೆ. ಇವು ವಿವಿಧ ಹಂತಗಳಲ್ಲಿ ಮಾನವನ ಅಸ್ತಿತ್ವದ ಮೇಲೆಯೇ ಪರಿಣಾಮ ಬೀರುತ್ತಿವೆ ಎಂದು ರಾಷ್ಟ್ರಪತಿ ಹೇಳಿದರು.
ರೈತರು ಮತ್ತು ಗ್ರಾಮೀಣ ಪ್ರದೇಶಕ್ಕೆ ಸಂದೇಶವೇನು..? : ಹವಾಮಾನ ಬದಲಾವಣೆ ಎಂದರೆ ಕೇವಲ ತಾಪಮಾನ ಏರಿಕೆ ಅಥವಾ ಅತಿವೃಷ್ಟಿ ಮಾತ್ರವಲ್ಲ. ಮಳೆಯ ಮಾದರಿಯ ಬದಲಾವಣೆ, ದೀರ್ಘ ಬರ, ಅತಿಯಾದ ಮಳೆ, ಮಣ್ಣಿನ ಸವಕಳಿ, ನೀರಿನ ಲಭ್ಯತೆಯ ಕುಸಿತ, ಹೊಸ ಕೀಟ-ರೋಗಗಳ ಹೆಚ್ಚಳ ಮುಂತಾದವು ಕೃಷಿಯ ಮೇಲೂ ನೇರ ಪರಿಣಾಮ ಬೀರುತ್ತವೆ. ಆದ್ದರಿಂದ ಗ್ರಾಮೀಣ ಪ್ರದೇಶಗಳಲ್ಲಿ ಮಣ್ಣು ಮತ್ತು ನೀರಿನ ಸಂರಕ್ಷಣೆ, ಸ್ಥಳೀಯ ಜೀವವೈವಿಧ್ಯ ರಕ್ಷಣೆ, ಕೃಷಿ ಅರಣ್ಯ ಪದ್ಧತಿ, ಮಳೆನೀರು ಸಂಗ್ರಹ, ವೈವಿಧ್ಯಮಯ ಬೆಳೆ ಪದ್ಧತಿ ಮತ್ತು ಸ್ಥಳೀಯ ಪರಿಸರಕ್ಕೆ ಹೊಂದಿಕೊಳ್ಳುವ ಕೃಷಿ ವಿಧಾನಗಳಿಗೆ ಹೆಚ್ಚಿನ ಆದ್ಯತೆ ನೀಡಬೇಕಿದೆ.
ರಾಷ್ಟ್ರಪತಿ ಉಲ್ಲೇಖಿಸಿದ ‘ಬದುಕು ಮತ್ತು ಬದುಕಲು ಬಿಡು’ ಎಂಬ ತತ್ವವು ಕೃಷಿಗೂ ಅನ್ವಯಿಸುತ್ತದೆ. ಮಣ್ಣು, ನೀರು, ಮರ, ಕೀಟ, ಪಕ್ಷಿ, ಪ್ರಾಣಿ ಮತ್ತು ಮನುಷ್ಯ ಇವೆಲ್ಲವೂ ಒಂದೇ ಪರಿಸರ ವ್ಯವಸ್ಥೆಯ ಭಾಗಗಳು. ಪ್ರಕೃತಿಯ ಸಮತೋಲನ ಉಳಿದರೆ ಮಾತ್ರ ಕೃಷಿಯ ಸಮತೋಲನವೂ ಉಳಿಯುತ್ತದೆ.
ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ ನಮ್ಮ “ದ ರೂರಲ್ ಮಿರರ್.ಕಾಂ”WhatsApp Channel ಫಾಲೋಮಾಡಲು ಇಲ್ಲಿ ಕ್ಲಿಕ್ ಮಾಡಿ
President Droupadi Murmu, addressing the concluding session of the two-day international conference on “The Future of Environmental and Climate Dynamics” in Delhi, said recent natural disasters underline the urgent need for stronger action on climate change. She emphasised that governments and laws alone cannot address the challenge and called for collective efforts from local communities to the global level. Highlighting the traditional relationship of tribal communities with nature, she said the principle of “live and let live” offers an important lesson for the world. Biodiversity loss, water scarcity and land degradation, she noted, are among the manifestations of environmental imbalance affecting human existence.
