ಕಸವೆಂದು ಎಸೆಯುವ ಮೀನಿನ ಮುಳ್ಳು–ಹುರುಪೆಯಲ್ಲಿ ‘ಸಂಜೀವಿನಿ’!

ಮೀನು ಕತ್ತರಿಸಿದ ಬಳಿಕ ಸಾಮಾನ್ಯವಾಗಿ ಕಸವೆಂದು ಎಸೆಯುವ ಮೀನಿನ ಮುಳ್ಳು, ತಲೆ, ಕರುಳು ಮತ್ತು ಹುರುಪೆಗೂ ಮೌಲ್ಯವಿದೆ. ಮೀನಿನ ಮುಳ್ಳು ಮತ್ತು ಹುರುಪೆಯಿಂದ ಮುರಿದ ಮೂಳೆಗಳನ್ನು ಜೋಡಿಸಲು ಹಾಗೂ ಹಲ್ಲಿನ ದಂತಕ್ಷಯದ ಚಿಕಿತ್ಸೆಯಲ್ಲಿ ಬಳಸಬಹುದಾದ ಅತ್ಯಮೂಲ್ಯ ಬಯೋಮೆಡಿಕಲ್ ಕಾಂಪೌಂಡ್ ನ್ಯಾನೋ ಹೈಡ್ರಾಕ್ಸಿ ಅಪಟೈಟ್ ಅಭಿವೃದ್ಧಿಪಡಿಸುವಲ್ಲಿ ಮಂಗಳೂರು ಮೀನುಗಾರಿಕಾ ಮಹಾವಿದ್ಯಾಲಯದ ಮೀನು ಸಂಸ್ಕರಣಾ ತಂತ್ರಜ್ಞಾನ ವಿಭಾಗ ಯಶಸ್ವಿಯಾಗಿದೆ.

ಮೀನು ಸಂಸ್ಕರಣಾ ತಂತ್ರಜ್ಞಾನ ವಿಭಾಗದ ಪ್ರಾಧ್ಯಾಪಕ ಹಾಗೂ ಮುಖ್ಯಸ್ಥ ಡಾ. ಬಿ. ಮಂಜ ನಾಯ್ಕ್ ನೇತೃತ್ವದ ಸಂಶೋಧನಾ ತಂಡ ಈ ಸಂಶೋಧನೆ ನಡೆಸಿದೆ.

ತ್ಯಾಜ್ಯದಿಂದ ವೈದ್ಯಕೀಯ ಕ್ಷೇತ್ರಕ್ಕೆ ಉಪಯುಕ್ತ ವಸ್ತು:  ಮೀನಿನ ಮುಳ್ಳು ಮತ್ತು ಹುರುಪೆಯನ್ನು ಸಾಮಾನ್ಯವಾಗಿ ಸಂಸ್ಕರಣಾ ತ್ಯಾಜ್ಯವೆಂದು ಪರಿಗಣಿಸಲಾಗುತ್ತದೆ. ಆದರೆ ಇವುಗಳಲ್ಲಿರುವ ಖನಿಜಾಂಶಗಳನ್ನು ವೈಜ್ಞಾನಿಕವಾಗಿ ಸಂಸ್ಕರಿಸುವ ಮೂಲಕ ವೈದ್ಯಕೀಯ ಕ್ಷೇತ್ರಕ್ಕೆ ಅಗತ್ಯವಾಗಿರುವ ನ್ಯಾನೋ ಹೈಡ್ರಾಕ್ಸಿ ಅಪಟೈಟ್ ತಯಾರಿಸಬಹುದು ಎಂಬುದನ್ನು ಸಂಶೋಧನಾ ತಂಡ ತೋರಿಸಿದೆ.

ಸಂಶೋಧನಾ ತಂಡದ ವಿದ್ಯಾರ್ಥಿನಿ ಪೂರ್ಣಿಮಾ ಅವರ ಪ್ರಕಾರ, ಮೀನಿನ ಮುಳ್ಳು ಮತ್ತು ಹುರುಪೆಯನ್ನು ಸಂಗ್ರಹಿಸಿ ‘ಥರ್ಮಲ್ ಕ್ಯಾಲ್ಸಿನೇಷನ್’ ಎಂಬ ವೈಜ್ಞಾನಿಕ ವಿಧಾನದಲ್ಲಿ ಸಂಸ್ಕರಿಸುವ ಮೂಲಕ ನ್ಯಾನೋ ಹೈಡ್ರಾಕ್ಸಿ ಅಪಟೈಟ್ ಕಾಂಪೌಂಡ್ ಸಿದ್ಧಪಡಿಸಲಾಗಿದೆ.

ಹಲ್ಲಿನ ಪುನರ್ ನಿರ್ಮಾಣಕ್ಕೂ, ಮೂಳೆ ಚಿಕಿತ್ಸೆಯಲ್ಲೂ ಬಳಕೆ : ನ್ಯಾನೋ ಹೈಡ್ರಾಕ್ಸಿ ಅಪಟೈಟ್ ಅನ್ನು ಹಲ್ಲುಗಳ ಪುನರ್ ನಿರ್ಮಾಣ ಮತ್ತು ದಂತ ಶಸ್ತ್ರಚಿಕಿತ್ಸೆಯಲ್ಲಿ ಬಳಸುವ ಸಾಧ್ಯತೆ ಇದೆ. ಇದಲ್ಲದೆ ಅಪಘಾತದಿಂದ ಮುರಿದ ಅಥವಾ ವಯೋಸಹಜವಾಗಿ ದುರ್ಬಲಗೊಂಡು ಮುರಿದ ಮಾನವನ ಮೂಳೆಗಳನ್ನು ಜೋಡಿಸುವ ಬಯೋಮೆಡಿಕಲ್ ಬಳಕೆಯಲ್ಲೂ ಇದು ನೆರವಾಗುವ ಸಾಮರ್ಥ್ಯ ಹೊಂದಿದೆ.

ಹೀಗಾಗಿ ಮೀನುಗಾರಿಕಾ ತ್ಯಾಜ್ಯದಲ್ಲಿರುವ ಖನಿಜ ಸಂಪನ್ಮೂಲವನ್ನು ಮೌಲ್ಯವರ್ಧಿತ ಉತ್ಪನ್ನವಾಗಿ ಪರಿವರ್ತಿಸುವ ಹೊಸ ಸಾಧ್ಯತೆಯನ್ನು ಈ ಸಂಶೋಧನೆ ತೆರೆದಿಟ್ಟಿದೆ.

‘ತ್ಯಾಜ್ಯ’ದಿಂದ ಆದಾಯದ ಹೊಸ ಅವಕಾಶ : ಮೀನುಗಾರಿಕಾ ವಲಯದಲ್ಲಿ ಪ್ರತಿದಿನವೂ ದೊಡ್ಡ ಪ್ರಮಾಣದಲ್ಲಿ ಮುಳ್ಳು, ಹುರುಪೆ, ಚರ್ಮ, ತಲೆ ಹಾಗೂ ಇತರ ಭಾಗಗಳು ತ್ಯಾಜ್ಯವಾಗಿ ಹೊರಬರುತ್ತವೆ. ಇವುಗಳನ್ನು ಸಮರ್ಪಕವಾಗಿ ಸಂಸ್ಕರಿಸದೆ ವಿಲೇವಾರಿ ಮಾಡಿದರೆ ದುರ್ವಾಸನೆ, ತ್ಯಾಜ್ಯ ನಿರ್ವಹಣೆ ಮತ್ತು ಪರಿಸರ ಮಾಲಿನ್ಯದ ಸಮಸ್ಯೆ ಎದುರಾಗಬಹುದು.

ಇದಕ್ಕೆ ಬದಲಾಗಿ ಇಂತಹ ತ್ಯಾಜ್ಯವನ್ನು ವೈಜ್ಞಾನಿಕವಾಗಿ ಸಂಸ್ಕರಿಸಿ ಮೌಲ್ಯವರ್ಧಿತ ಉತ್ಪನ್ನಗಳನ್ನಾಗಿ ಪರಿವರ್ತಿಸಿದರೆ ಪರಿಸರ ಸಂರಕ್ಷಣೆಯ ಜೊತೆಗೆ ಮೀನುಗಾರಿಕಾ ವಲಯಕ್ಕೆ ಹೆಚ್ಚುವರಿ ಆರ್ಥಿಕ ಮೌಲ್ಯ ಸೃಷ್ಟಿಸಬಹುದು.

ಮೀನಿನ ಚರ್ಮದಿಂದ ಲೆದರ್, ಈಗ ಮುಳ್ಳಿನಿಂದ ಬಯೋಮೆಡಿಕಲ್ ಕಾಂಪೌಂಡ್ : ಮೀನಿನ ತ್ಯಾಜ್ಯವನ್ನು ಮೌಲ್ಯವರ್ಧನೆ ಮಾಡುವ ಪ್ರಯತ್ನದಲ್ಲಿ ಈಗಾಗಲೇ ಮೀನಿನ ಚರ್ಮದಿಂದ ಲೆದರ್ ತಯಾರಿಸುವಲ್ಲಿ ಯಶಸ್ವಿಯಾಗಿದ್ದೇವೆ ಎಂದು ಡಾ. ಮಂಜ ನಾಯ್ಕ್ ತಿಳಿಸಿದ್ದಾರೆ.

ಇದೀಗ ಮೀನಿನ ಮುಳ್ಳು ಮತ್ತು ಹುರುಪೆಯಿಂದ ನ್ಯಾನೋ ಹೈಡ್ರಾಕ್ಸಿ ಅಪಟೈಟ್ ಅಭಿವೃದ್ಧಿಪಡಿಸಿರುವುದು ಮೀನು ಸಂಸ್ಕರಣಾ ತ್ಯಾಜ್ಯಕ್ಕೆ ಮತ್ತೊಂದು ಹೊಸ ಬಳಕೆಯನ್ನು ನೀಡಿದೆ.

ಸಂಶೋಧನೆಯ ಮುಂದಿನ ಹಂತವೇನು? :  ಮೀನಿನ ತ್ಯಾಜ್ಯದಿಂದ ತಯಾರಿಸಿದ ನ್ಯಾನೋ ಹೈಡ್ರಾಕ್ಸಿ ಅಪಟೈಟ್ ವೈದ್ಯಕೀಯ ಕ್ಷೇತ್ರದಲ್ಲಿ ದೊಡ್ಡ ಸಾಧ್ಯತೆಯನ್ನು ಹೊಂದಿದ್ದರೂ, ಸಂಶೋಧನಾ ಹಂತದ ಉತ್ಪನ್ನವನ್ನು ನೇರವಾಗಿ ಮಾನವ ಚಿಕಿತ್ಸೆಗೆ ಬಳಸಲಾಗುತ್ತದೆ ಎಂದು ಹೇಳಲು ಇನ್ನೂ ಹೆಚ್ಚಿನ ಪರೀಕ್ಷೆಗಳು ಅಗತ್ಯ.

ಆದರೆ ಸಮುದ್ರ ಸಂಪನ್ಮೂಲದಿಂದ ಆಹಾರ ಮಾತ್ರವಲ್ಲದೆ ವೈದ್ಯಕೀಯ, ಕೈಗಾರಿಕಾ ಹಾಗೂ ಪರಿಸರ ಸ್ನೇಹಿ ಮೌಲ್ಯವರ್ಧಿತ ಉತ್ಪನ್ನಗಳನ್ನು ಅಭಿವೃದ್ಧಿಪಡಿಸುವ ಸಾಧ್ಯತೆಯನ್ನು ಈ ಸಂಶೋಧನೆ ತೋರಿಸಿಕೊಟ್ಟಿದೆ.

Researchers from the Fisheries Processing Technology Division of Mangalore Fisheries College have developed nano-hydroxyapatite from discarded fish bones and scales. The biomaterial has potential applications in dental reconstruction and surgery and could also support bone repair. The research demonstrates how fish-processing waste can be converted into high-value biomedical material while reducing environmental pollution.