ಗ್ರಾಮೀಣ ಮಹಿಳೆಯರು ಆರ್ಥಿಕವಾಗಿ ಸ್ವಾವಲಂಬಿಗಳಾಗಲು ಕೌಶಲ್ಯ ತರಬೇತಿ ಪ್ರಮುಖ ಸಾಧನವಾಗುತ್ತಿದೆ. ಈ ನಿಟ್ಟಿನಲ್ಲಿ ಕಸೂತಿ ಕಲೆಯ ಬಗ್ಗೆ ಆಸಕ್ತಿ ಹೊಂದಿರುವ ಮಹಿಳೆಯರಿಗೆ ಉಚಿತ ತರಬೇತಿ ನೀಡುವ ಮೂಲಕ ಕೊಪ್ಪಳ ಜಿಲ್ಲೆಯ ಕಿನ್ನಾಳ ಗ್ರಾಮದಲ್ಲಿ ಮಹಿಳೆಯರಿಗೆ ಸ್ವ ಉದ್ಯೋಗದ ದಾರಿ ತೋರಿಸಲಾಗುತ್ತಿದೆ.
ಸೀರೆ, ರವಿಕೆ ಸೇರಿದಂತೆ ವಿವಿಧ ವಸ್ತ್ರಗಳಿಗೆ ಬಣ್ಣಬಣ್ಣದ ದಾರ, ಮಣಿಗಳನ್ನು ಬಳಸಿ ಆಕರ್ಷಕ ಚಿತ್ತಾರ ಮೂಡಿಸುವುದು, ಮಗ್ಗಂ ಮತ್ತು ಆರಿ ವರ್ಕ್ ಮೂಲಕ ಉಡುಪುಗಳ ಅಂದ ಹೆಚ್ಚಿಸುವ ಕಸೂತಿ ಕಲೆಯನ್ನು ಮಹಿಳೆಯರು ಇಲ್ಲಿ ಕಲಿಯುತ್ತಿದ್ದಾರೆ.
ಗಂಗಾವತಿ ತಾಲೂಕಿನ ಸುಗ್ರೀವ ಜನಸೇವಾ ಸಮಿತಿ ಹಾಗೂ ಕಿನ್ನಾಳ ಗ್ರಾಮ ಪಂಚಾಯಿತಿ ಸಹಯೋಗದಲ್ಲಿ ಗ್ರಾಮ ಪಂಚಾಯಿತಿ ಆವರಣದಲ್ಲಿ ಒಂದು ತಿಂಗಳ ಉಚಿತ ಮಗ್ಗಂ ಮತ್ತು ಆರಿ ವರ್ಕ್ ತರಬೇತಿ ಆಯೋಜಿಸಲಾಗಿದೆ. ಕಸೂತಿ ಕೆಲಸ ಕಲಿಯಲು ಆಸಕ್ತಿ ಹೊಂದಿರುವ ಗ್ರಾಮೀಣ ಮಹಿಳೆಯರಿಗೆ ತರಬೇತಿ ನೀಡಲಾಗುತ್ತಿದ್ದು, ತರಬೇತಿ ಬಳಿಕ ಸ್ವ ಉದ್ಯೋಗ ಆರಂಭಿಸಿ ಆದಾಯ ಗಳಿಸಬೇಕು ಎಂಬ ಉದ್ದೇಶ ಹೊಂದಲಾಗಿದೆ.
ಕಸೂತಿ ಕಲೆಗೆ ಮಾರುಕಟ್ಟೆಯಲ್ಲಿ ಬೇಡಿಕೆ ಇರುವುದರಿಂದ ಈ ಕೌಶಲ್ಯವನ್ನು ಕಲಿಯುವುದರಿಂದ ಮಹಿಳೆಯರಿಗೆ ಮನೆಯಲ್ಲಿಯೇ ಕೆಲಸ ಮಾಡುವ ಅವಕಾಶವೂ ಸಿಗಲಿದೆ. ಸೀರೆ, ರವಿಕೆ ಹಾಗೂ ಇತರ ಉಡುಪುಗಳಿಗೆ ಕಸೂತಿ ಹಾಕುವ ಮೂಲಕ ಹೆಚ್ಚುವರಿ ಆದಾಯ ಗಳಿಸಬಹುದು ಎಂದು ತರಬೇತಿ ಪಡೆಯುತ್ತಿರುವ ಮಹಿಳೆಯರು ಹೇಳಿದ್ದಾರೆ.
ಹೆಚ್ಚಿನ ಸಂಖ್ಯೆಯ ಮಹಿಳೆಯರು ತರಬೇತಿ ಪಡೆದು ತಮ್ಮ ಬದುಕನ್ನು ಕಟ್ಟಿಕೊಳ್ಳಲು ಹಾಗೂ ಆರ್ಥಿಕವಾಗಿ ಸಬಲರಾಗಲು ಈ ತರಬೇತಿ ನೆರವಾಗುತ್ತಿದೆ ಎನ್ನುತ್ತಾರೆ ಸುಗ್ರೀವ ಜನಸೇವಾ ಸಮಿತಿ ಸದಸ್ಯೆ ಶಕುಂತಲಾ.
ತರಬೇತುದಾರರಾದ ಸರಸ್ವತಿ ಅವರ ಪ್ರಕಾರ, ಗ್ರಾಮೀಣ ಮಹಿಳೆಯರಿಗೆ ಮಾರುಕಟ್ಟೆಯಲ್ಲಿ ಬೇಡಿಕೆ ಇರುವ ವಿವಿಧ ರೀತಿಯ ಕಸೂತಿ ಕೆಲಸಗಳನ್ನು ಕಲಿಸಲಾಗುತ್ತಿದೆ ಎನ್ನುತ್ತಾರೆ.
ಗ್ರಾಮ ಪಂಚಾಯಿತಿ ಮಾಜಿ ಸದಸ್ಯ ಪ್ರಶಾಂತ ಕುಲಕರ್ಣಿ, ಮಹಿಳೆಯರು ತರಬೇತಿ ಪಡೆದು ಸ್ವ ಉದ್ಯೋಗ ಆರಂಭಿಸಬೇಕು ಎಂಬ ಉದ್ದೇಶದಿಂದ ಒಂದು ತಿಂಗಳ ಉಚಿತ ತರಬೇತಿ ನೀಡಲಾಗುತ್ತಿದೆ ಎಂದು ಹೇಳಿದರು.
ತರಬೇತಿ ಪಡೆದ ವೀಣಾ ಸಿರಿಗೇರಿ, ಕರಕುಶಲ ಕಲೆ ಮೂಲಕ ಕಸೂತಿ ಮಾಡಲಾದ ವಸ್ತ್ರಗಳಿಗೆ ಮಾರುಕಟ್ಟೆಯಲ್ಲಿ ಉತ್ತಮ ಬೇಡಿಕೆ ಇದೆ ಎಂದರು. ತರಬೇತಿ ಪಡೆಯುತ್ತಿರುವ ವಿದ್ಯಾಶ್ರೀ, ಕಸೂತಿ ಕಲಿಯಲು ಹೊರಗಡೆ ಸಾವಿರಾರು ರೂಪಾಯಿ ವೆಚ್ಚವಾಗುತ್ತದೆ. ಆದರೆ ಗ್ರಾಮದಲ್ಲಿಯೇ ಉಚಿತವಾಗಿ ಸಂಪೂರ್ಣ ತರಬೇತಿ ದೊರೆಯುತ್ತಿರುವುದು ಅನುಕೂಲವಾಗಿದೆ ಎಂದು ಹೇಳಿದರು.
ಮನೆ, ಅಡುಗೆ ಮತ್ತು ಆರೈಕೆಯ ಜವಾಬ್ದಾರಿಗಳ ಜೊತೆಗೆ ಹೊಸ ಕೌಶಲ್ಯ ಕಲಿತು ಆದಾಯ ಗಳಿಸುವ ಅವಕಾಶವನ್ನು ಮಹಿಳೆಯರು ಪಡೆದುಕೊಳ್ಳುತ್ತಿದ್ದಾರೆ. ಕಸೂತಿ ತರಬೇತಿ ಗ್ರಾಮೀಣ ಮಹಿಳೆಯರ ಕೈಗೆ ಕೌಶಲ್ಯ ನೀಡುವುದರ ಜೊತೆಗೆ, ಸ್ವಾವಲಂಬಿ ಬದುಕಿನತ್ತ ಹೆಜ್ಜೆ ಇಡಲು ದಾರಿಯಾಗುತ್ತಿದೆ.
Free embroidery training in Kinnal village of Koppal district is helping rural women acquire skills for self-employment and financial independence. Organised by Sugriva Jan Seva Samiti in association with the Kinnal Gram Panchayat, the one-month training covers Maggam and Aari work, enabling women to create embroidered sarees, blouses and other garments that have market demand. The initiative aims to strengthen women’s economic and social empowerment through practical skill development.
