ಮುಂಗಾರು ಬೇಗನೆ ವಿದಾಯ ಹೇಳುತ್ತಿದೆಯೇ..? ಸೆಪ್ಟೆಂಬರ್‌ನಲ್ಲಿ ಮಳೆ ಕಡಿಮೆಯಾಗುವ ಮುನ್ಸೂಚನೆ..?

ಮುಂಗಾರು ಹಂಗಾಮಿನ ಕೊನೆಯ ಹಂತಕ್ಕೆ ಭಾರತ ಪ್ರವೇಶಿಸುತ್ತಿರುವಾಗಲೇ ಮಳೆಯ ಬಗ್ಗೆ ಮತ್ತೊಂದು ಆತಂಕ ಎದುರಾಗಿದೆ. ವಿಸ್ತೃತ ಅವಧಿಯ ಹವಾಮಾನ ಮಾದರಿಗಳ ಪ್ರಕಾರ ಸೆಪ್ಟೆಂಬರ್ ಮೊದಲ ವಾರದ ನಂತರ ದೇಶದ ಹಲವು ಭಾಗಗಳಲ್ಲಿ ಮಳೆ ಚಟುವಟಿಕೆ ಗಣನೀಯವಾಗಿ ಕಡಿಮೆಯಾಗುವ ಸಾಧ್ಯತೆಯಿದೆ. ಸೆಪ್ಟೆಂಬರ್ 5 ರಿಂದ 10 ರ ಅವಧಿಯ ನಂತರ ಮಳೆ ಇಳಿಕೆಯಾಗುವ ಸೂಚನೆ ಕಂಡುಬರುತ್ತಿದ್ದು, ತಿಂಗಳ ದ್ವಿತೀಯಾರ್ಧದಲ್ಲಿ ಈ ಒಣ ಪರಿಸ್ಥಿತಿ ಮತ್ತಷ್ಟು ಬಲವಾಗಬಹುದು ಎಂದು ಹವಾಮಾನ ಮುನ್ಸೂಚನೆ ತಿಳಿಸಿದೆ.

ಇದರಿಂದ ಮಳೆ ಆಧಾರಿತ ಕೃಷಿ ಪ್ರದೇಶಗಳಿಗೆ ಸೆಪ್ಟೆಂಬರ್‌ನ ಮಳೆ ಮತ್ತೊಂದು ನಿರ್ಣಾಯಕ ಹಂತವಾಗಬಹುದು. ಈಗಾಗಲೇ ಮಳೆ ಕೊರತೆ ಎದುರಿಸುತ್ತಿರುವ ಪ್ರದೇಶಗಳಲ್ಲಿ ಸೆಪ್ಟೆಂಬರ್‌ನಲ್ಲೂ ಮಳೆ ಕಡಿಮೆಯಾದರೆ ಬೆಳೆಗಳ ಮೇಲೆ ಒತ್ತಡ ಹೆಚ್ಚಾಗಬಹುದು.

ಐಎಂಡಿಯ ಅಧಿಕೃತ ಮಾನದಂಡದ ಪ್ರಕಾರ ವಾಯವ್ಯ ಭಾರತದ ಪಶ್ಚಿಮ ಭಾಗಗಳಿಂದ ಮುಂಗಾರು ಹಿಂಬರುವುದು ಸೆಪ್ಟೆಂಬರ್ 1ಕ್ಕೂ ಮೊದಲು ಪರಿಗಣಿಸುವುದಿಲ್ಲ. ಹಿಂತೆಗೆತ ಆರಂಭವಾಗಿದೆ ಎಂದು ಘೋಷಿಸಲು ನಿರ್ದಿಷ್ಟ ಪ್ರದೇಶದಲ್ಲಿ ಸತತ ಐದು ದಿನ ಮಳೆ ಚಟುವಟಿಕೆ ನಿಲ್ಲುವುದು ಹಾಗೂ ತೇವಾಂಶದಲ್ಲಿ ಗಣನೀಯ ಇಳಿಕೆ ಸೇರಿದಂತೆ ಹಲವು ಪರಿಸ್ಥಿತಿಗಳು ಬೇಕಾಗುತ್ತವೆ. ಹೀಗಾಗಿ ಈಗಿನ ವರದಿ ಮುಂಗಾರು ಹಿಂತೆಗೆತದ ಅಧಿಕೃತ ಘೋಷಣೆ ಅಲ್ಲ.  ಮುಂದಿನ ವಾರಗಳ ಮಳೆ ಕಡಿಮೆಯಾಗುವ ಮುನ್ಸೂಚನೆ ಎಂಬುದನ್ನು ಗಮನಿಸಬೇಕು.

ಮುಂದಿನ ಎರಡು ವಾರಗಳಲ್ಲಿ ಎಲ್ಲೆಲ್ಲಿ ಮಳೆ ಇರಬಹುದು? :  ಮುಂಬರುವ ಎರಡು ವಾರಗಳಲ್ಲಿ ಪೂರ್ವ ಮತ್ತು ಈಶಾನ್ಯ ಭಾರತದ ಕೆಲವು ಭಾಗಗಳಲ್ಲಿ ಮಳೆ ಮುಂದುವರಿಯುವ ಸಾಧ್ಯತೆ ಇದೆ. ಆದರೆ ದೇಶದ ಉಳಿದ ಭಾಗಗಳಲ್ಲಿ ಮಳೆ ಚಟುವಟಿಕೆ ಹೆಚ್ಚು ಚದುರಿದ ಮತ್ತು ದುರ್ಬಲವಾಗುವ ಸಾಧ್ಯತೆಯಿದೆ ಎಂದು ವಿಸ್ತೃತ ಮಾದರಿಗಳು ಸೂಚಿಸುತ್ತವೆ. ಅಂದರೆ, ದೇಶದ ಎಲ್ಲೆಡೆ ಒಂದೇ ರೀತಿಯ ಒಣ ಪರಿಸ್ಥಿತಿ ನಿರ್ಮಾಣವಾಗಲಿದೆ ಎಂದಲ್ಲ. ಪ್ರದೇಶದಿಂದ ಪ್ರದೇಶಕ್ಕೆ ಮಳೆಯ ವ್ಯತ್ಯಾಸ ಹೆಚ್ಚಾಗಬಹುದು.

ಸೆಪ್ಟೆಂಬರ್ ಏಕೆ ಮುಖ್ಯ? : ಸೆಪ್ಟೆಂಬರ್ ಮುಂಗಾರು ಹಂಗಾಮಿನ ಕೊನೆಯ ಪ್ರಮುಖ ಮಳೆ ತಿಂಗಳು. ಜೂನ್–ಆಗಸ್ಟ್ ಅವಧಿಯಲ್ಲಿ ಮಳೆ ಕೊರತೆ ಕಂಡಿರುವ ಪ್ರದೇಶಗಳಿಗೆ ಸೆಪ್ಟೆಂಬರ್ ಮಳೆ ಬಹಳ ಮುಖ್ಯವಾಗುತ್ತದೆ. ಹೀಗಾಗಿ ಸೆಪ್ಟೆಂಬರ್‌ನಲ್ಲಿ ದೀರ್ಘಾವಧಿಯ ಮಳೆ ವಿರಾಮ ಕಂಡುಬಂದರೆ, ಈಗಾಗಲೇ ಮಳೆ ಕೊರತೆಯಲ್ಲಿರುವ ಪ್ರದೇಶಗಳ ಕೃಷಿ, ಜಲಾಶಯಗಳ ನೀರಿನ ಲಭ್ಯತೆ ಮತ್ತು ಮಣ್ಣಿನ ತೇವಾಂಶದ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ.

ರೈತರಿಗೆ ಮುನ್ಸೂಚನೆ ಏನು ? : ಈ ಮುನ್ಸೂಚನೆ ವಿಶೇಷವಾಗಿ ಮಳೆ ಆಧಾರಿತ ಕೃಷಿ ಪ್ರದೇಶಗಳ ರೈತರು ಗಮನಿಸಬೇಕಾದದ್ದು. ಮುಂಗಾರು ಮಳೆ ಇಳಿಕೆಯಾಗುವ ಸಾಧ್ಯತೆಯಿದ್ದರೆ, ಈಗಾಗಲೇ ಬಿತ್ತನೆಯಾಗಿರುವ ಬೆಳೆಗಳಲ್ಲಿ ಮಣ್ಣಿನ ತೇವಾಂಶವನ್ನು ಕಾಪಾಡಿಕೊಳ್ಳುವುದು, ನೀರಿನ ಲಭ್ಯತೆ ಇದ್ದರೆ ಅಗತ್ಯ ನೀರಾವರಿ ಯೋಜನೆ ಮಾಡುವುದು ಮತ್ತು ಮುಂದಿನ ಕೃಷಿ ಚಟುವಟಿಕೆಗಳನ್ನು ಸ್ಥಳೀಯ ಮಳೆ ಮುನ್ಸೂಚನೆಗೆ ಅನುಗುಣವಾಗಿ ರೂಪಿಸುವುದು ಮುಖ್ಯವಾಗಬಹುದು.

ತೋಟಗಾರಿಕಾ ಬೆಳೆಗಳಲ್ಲಿಯೂ ಇದೇ ಎಚ್ಚರಿಕೆ ಅಗತ್ಯ. ಮಳೆ ಕಡಿಮೆಯಾಗುವುದರಿಂದ ತಕ್ಷಣವೇ ಬೆಳೆ ಹಾನಿಯಾಗುತ್ತದೆ ಎಂದಲ್ಲ; ಆದರೆ ದೀರ್ಘ ಮಳೆ ವಿರಾಮ ಬಂದರೆ ನೀರಿನ ಒತ್ತಡ ಹೆಚ್ಚಾಗಬಹುದು.  ವಿಶೇಷವಾಗಿ ಅಡಿಕೆ, ತೆಂಗು, ಕಾಳುಮೆಣಸು ಸೇರಿದಂತೆ ತೇವಾಂಶದ ಮೇಲೆ ಹೆಚ್ಚು ಅವಲಂಬಿತ ಬೆಳೆಗಳಲ್ಲಿ ಮಳೆ ವಿರಾಮದ ಅವಧಿಯನ್ನು ಗಮನಿಸುವುದು ಅಗತ್ಯ. ಮುಂಗಾರು ದುರ್ಬಲವಾದಾಗ ಮಳೆ ಸಂಪೂರ್ಣ ನಿಲ್ಲುವುದು ಅನಿವಾರ್ಯವಲ್ಲ. ಕೆಲವೆಡೆ ಭಾರೀ ಮಳೆ ಬಂದರೂ ಮತ್ತೊಂದು ಪ್ರದೇಶದಲ್ಲಿ ದೀರ್ಘ ಮಳೆ ವಿರಾಮ ಇರಬಹುದು.

ಮುಂಗಾರು ಮುಗಿಯಿತು ಎಂದು ಈಗಲೇ ಭಾವಿಸುವ ಅಗತ್ಯವಿಲ್ಲ. ಆದರೆ ಸೆಪ್ಟೆಂಬರ್‌ನಲ್ಲಿ ಮಳೆ ಕಡಿಮೆಯಾಗುವ ಸಾಧ್ಯತೆಯನ್ನು ಗಮನದಲ್ಲಿಟ್ಟುಕೊಂಡು ನೀರು ಮತ್ತು ಬೆಳೆ ನಿರ್ವಹಣೆಯ ಯೋಜನೆ ಮಾಡುವುದು ಸೂಕ್ತ. ಮುಂದಿನ ಎರಡು ವಾರಗಳಲ್ಲಿ ಮಳೆಯ ವಿತರಣೆ ಹೇಗಿರುತ್ತದೆ ಎಂಬುದು ಹೆಚ್ಚು ಮುಖ್ಯ. ವಿಶೇಷವಾಗಿ ಮಳೆ ಕೊರತೆಯಲ್ಲಿರುವ ಪ್ರದೇಶಗಳಿಗೆ ಸೆಪ್ಟೆಂಬರ್‌ನ ಪ್ರತಿಯೊಂದು ಉತ್ತಮ ಮಳೆಯೂ ಬೆಳೆ ಮತ್ತು ನೀರಿನ ಸ್ಥಿತಿಗೆ ಮಹತ್ವದ್ದಾಗಬಹುದು.

ಆದರೆ ಹವಾಮಾನ ಮಾದರಿಗಳು ಬದಲಾಗಬಹುದು. ಹೊಸ ಕಡಿಮೆ ಒತ್ತಡದ ಪ್ರದೇಶ ಅಥವಾ ದೊಡ್ಡ ಮಟ್ಟದ ವಾತಾವರಣದ ಬದಲಾವಣೆ ಉಂಟಾದರೆ ಮಳೆಯ ಚಿತ್ರಣವೂ ಬದಲಾಗುವ ಸಾಧ್ಯತೆಯಿದೆ ಎಂದು ವರದಿ ಸ್ಪಷ್ಟಪಡಿಸಿದೆ.

ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಫಾಲೋಮಾಡಲು ಇಲ್ಲಿ ಕ್ಲಿಕ್‌ ಮಾಡಿ

India’s southwest monsoon could weaken significantly after the first week or two of September, according to extended-range weather models. Rainfall may remain relatively active over parts of East and Northeast India during the next two weeks, while much of the country could see increasingly patchy and subdued rainfall. Models indicate a significant reduction in rainfall after September 5–10 and a possible start to monsoon withdrawal from extreme northwest India around mid-September. However, this is not an official withdrawal announcement; IMD requires specific atmospheric and rainfall conditions before declaring withdrawal.