ಹೊಸ ಐಫೋನ್ ಖರೀದಿಗಾಗಿ ಜನರು ಗಂಟೆಗಟ್ಟಲೆ ಸರದಿಯಲ್ಲಿ ನಿಂತ ಘಟನೆಗಳು ಭಾರತದಲ್ಲಿ ಮತ್ತೆ ಗಮನ ಸೆಳೆದಿವೆ. ಸೆಪ್ಟೆಂಬರ್ 18ರಂದು ಐಫೋನ್ 18 ಪ್ರೊ ಮತ್ತು ಐಫೋನ್ 18 ಪ್ರೊ ಮ್ಯಾಕ್ಸ್ ಮಾರಾಟ ಆರಂಭವಾಗುತ್ತಿದ್ದಂತೆ ದೆಹಲಿ, ಮುಂಬೈ, ಬೆಂಗಳೂರು, ನೋಯ್ಡಾ ಸೇರಿದಂತೆ ಹಲವು ನಗರಗಳ ಆ್ಯಪಲ್ ಮಳಿಗೆಗಳ ಮುಂದೆ ಬೆಳಗ್ಗಿನಿಂದಲೇ ಗ್ರಾಹಕರು ಜಮಾಯಿಸಿದ್ದರು.
ಬೆಂಗಳೂರಿನಲ್ಲಿ ಕೆಲವರು ಬೆಳಗ್ಗೆ 5 ಗಂಟೆಯ ವೇಳೆಯೇ ಸರದಿಯಲ್ಲಿ ನಿಂತಿದ್ದ ಬಗ್ಗೆ ವರದಿಗಳು ಇವೆ. ಹರಿಯಾಣ, ದೆಹಲಿ, ಮುಂಬೈ ಸೇರಿದಂತೆ ವಿವಿಧ ಭಾಗಗಳಿಂದಲೂ ಜನರು ಬೆಂಗಳೂರಿಗೆ ಬಂದಿದ್ದರು ಎಂದು ಗ್ರಾಹಕರು ತಿಳಿಸಿದ್ದಾರೆ. ಮುಂಬೈನಲ್ಲಿ ನಾಸಿಕ್ನಿಂದ ಬಂದ ಗ್ರಾಹಕರೊಬ್ಬರು ಹಿಂದಿನ ರಾತ್ರಿ 10 ಗಂಟೆಯಿಂದಲೇ ಸರದಿಯಲ್ಲಿ ನಿಂತಿದ್ದರು. ಇನ್ನೊಬ್ಬರು ಸುಮಾರು 10 ರಿಂದ 12 ಗಂಟೆಗಳ ಕಾಲ ಕಾದು ಮೊದಲ ಫೋನ್ ಪಡೆಯಲು ಪ್ರಯತ್ನಿಸಿದ್ದರು. ನೋಯ್ಡಾದಲ್ಲಿ ಪಂಜಾಬ್ನಿಂದ ಬಂದ ಗ್ರಾಹಕರೊಬ್ಬರು ಬೆಳಗ್ಗೆ 6 ಗಂಟೆಯಿಂದ ಸರದಿಯಲ್ಲಿ ನಿಂತು ಎರಡು ಐಫೋನ್ 18 ಪ್ರೊ ಮ್ಯಾಕ್ಸ್ ಖರೀದಿಸಿರುವುದಾಗಿ ವರದಿಯಾಗಿವೆ.
ಆದರೆ ಈ ಬಾರಿ ಐಫೋನ್ ಖರೀದಿಗೆ ಮಳಿಗೆಯ ಮುಂದೆ ಗಂಟೆಗಟ್ಟಲೆ ಕಾಯುವವರಿದ್ದರೆ, ಕೆಲವರು ಆನ್ಲೈನ್ ಹಾಗೂ ತ್ವರಿತ ವಿತರಣಾ ವೇದಿಕೆಗಳ ಮೂಲಕ ಮನೆಯಲ್ಲೇ ಫೋನ್ ಪಡೆದುಕೊಂಡಿದ್ದಾರೆ. ವರದಿಯೊಂದರ ಪ್ರಕಾರ, ಮಾರಾಟ ಆರಂಭವಾದ ಮೊದಲ ಗಂಟೆಯಲ್ಲೇ ಬಿಗ್ಬಾಸ್ಕೆಟ್ ಮೂಲಕ 300 ಕ್ಕೂ ಹೆಚ್ಚು ಐಫೋನ್ 18 ಪ್ರೊ ಮತ್ತು ಪ್ರೊ ಮ್ಯಾಕ್ಸ್ ಸಾಧನಗಳನ್ನು ವಿತರಿಸಲಾಗಿತ್ತು.
₹3.29 ಲಕ್ಷದವರೆಗೂ ಬೆಲೆ : ಭಾರತದಲ್ಲಿ ಐಫೋನ್ 18 ಪ್ರೊ 256 ಜಿಬಿ ಮಾದರಿಯ ಬೆಲೆ ₹1,64,900ರಿಂದ ಆರಂಭವಾಗುತ್ತದೆ. 512 ಜಿಬಿ ಮಾದರಿ ₹1,89,900, 1 ಟಿಬಿ ಮಾದರಿ ₹2,39,900 ಹಾಗೂ 2 ಟಿಬಿ ಮಾದರಿ ₹3,14,900 ಬೆಲೆ ಹೊಂದಿದೆ.
ಐಫೋನ್ 18 ಪ್ರೊ ಮ್ಯಾಕ್ಸ್ 256 ಜಿಬಿ ಮಾದರಿ ₹1,79,900ರಿಂದ ಆರಂಭವಾಗುತ್ತದೆ. 512 ಜಿಬಿ ₹2,04,900, 1 ಟಿಬಿ ₹2,54,900 ಮತ್ತು 2 ಟಿಬಿ ಮಾದರಿ ₹3,29,900 ಬೆಲೆಯಲ್ಲಿದೆ.
ಅಂದರೆ, ಲಕ್ಷಾಂತರ ರೂಪಾಯಿ ಬೆಲೆ ಇದ್ದರೂ ಹೊಸ ಮಾದರಿಯನ್ನು ಮೊದಲ ದಿನವೇ ಪಡೆಯಬೇಕೆಂಬ ಆಸಕ್ತಿ ಕೆಲ ಗ್ರಾಹಕರಲ್ಲಿ ಮುಂದುವರಿದಿದೆ. ಮತ್ತೊಂದೆಡೆ, ತ್ವರಿತ ವಿತರಣಾ ವ್ಯವಸ್ಥೆ ಜನರಿಗೆ ಮಳಿಗೆಯ ಸರದಿಗೆ ಪರ್ಯಾಯವನ್ನೂ ನೀಡುತ್ತಿದೆ. ಐಫೋನ್ ಖರೀದಿಗೆ ಜನರು ಸರದಿಯಲ್ಲಿ ನಿಂತ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲೂ ವೈರಲ್ ಆಗಿದ್ದು, ಈ ಕುರಿತಾಗಿ ಹಲವು ಮೀಮ್ಗಳು ಹರಿದಾಡಿವೆ.
Apple’s iPhone 18 Pro and iPhone 18 Pro Max launch in India drew long queues in Bengaluru, Mumbai, Delhi and Noida, with some customers arriving as early as 5 am or waiting overnight. Despite prices starting at ₹1,64,900 for the iPhone 18 Pro, some buyers travelled from other cities to be among the first owners. At the same time, quick-commerce platforms delivered the new iPhones within minutes in select cities, highlighting the changing nature of premium smartphone launches in India
