ಭಾರತದ ಹೆಮ್ಮೆಯ ಬಾಹ್ಯಾಕಾಶ ಸಂಸ್ಥೆ ಇಸ್ರೋ ಕೈಗೊಂಡ ಚಂದ್ರಯಾನ3 ನಿರೀಕ್ಷೆಯಂತೆ ಯಶಸ್ಸು ಕಂಡಿದೆ. ಪೂರ್ವ ನಿಗದಿತ ಗುರಿಯಂತೆ ಶೇ.100 ರಷ್ಟು ಯಶಸ್ಸು ಕಂಡಿದೆ.ಈ ನಡುವೆ ಚಂದ್ರನ ಮೇಲ್ಮೈಯಲ್ಲಿ ಪ್ರಗ್ಯಾನ್ ರೋವರ್ ಲ್ಯಾಂಡರ್‌ನಿಂದ 100 ಮೀಟರ್‌ಗಳನ್ನು ಯಶಸ್ವಿಯಾಗಿ ಕ್ರಮಿಸಿದೆ, ಇನ್ನೂ ಚಲಿಸುತ್ತಿದೆ. ಇನ್ನೀಗ ಚಂದ್ರನ ಅಂಗಳದಲ್ಲಿ ರಾತ್ರಿ ಹತ್ತಿರವಾಗುತ್ತಿದೆ. ಹೀಗಾಗಿ ಪ್ರಗ್ಯಾನ್ ರೋವರ್, ವಿಕ್ರಮ್ ಲ್ಯಾಂಡರ್ ಸ್ಲೀಪ್‌ ಮೋಡ್‌ ಗೆ ತೆರಳಲಿವೆ ಎಂದು ಇಸ್ರೋ ಮಾಹಿತಿ ನೀಡಿದೆ.
ವಿಕ್ರಮ್ ಲ್ಯಾಂಡರ್ ಮತ್ತು ಪ್ರಗ್ಯಾನ್ ರೋವರ್ ಎರಡೂ ಚಂದ್ರನ ಅಂಗಳದ ಅಧ್ಯಯನದ ಎರಡು ಪ್ರಮುಖ ಘಟಕಗಳಾಗಿವೆ. ಚಂದ್ರನ ಮೇಲ್ಮೈಯಲ್ಲಿ ಸ್ವತಂತ್ರವಾಗಿ ಚಲಿಸಬಲ್ಲ ಚಕ್ರಗಳ ಮೇಲೆ ತೆವಳುತ್ತಿರುವುದು ಕಂಡುಬಂದಿದ್ದು, 100 ಮೀಟರ್ ದೂರಕ್ಕೆ ಚಲಿಸಿದೆ ಎಂದು ಇಸ್ರೋ ಹೇಳಿದೆ. ಮುಂಬರುವ ಒಂದು ಅಥವಾ ಎರಡು ದಿನಗಳಲ್ಲಿ ಎರಡೂ ಸ್ಲೀಪ್‌ ಮೋಡ್‌ಗೆ ಜಾರಲಿವೆ. ಚಂದ್ರನ ರಾತ್ರಿಯಲ್ಲಿ ತಾಪಮಾನವು -200 ಡಿಗ್ರಿ ಸೆಲ್ಸಿಯಸ್‌ಗಿಂತ ಕಡಿಮೆಯಾಗುವ ನಿರೀಕ್ಷೆಯಿದೆ ಎಂದು ಡಾ ಸೋಮನಾಥ್ ಶನಿವಾರ ಹೇಳಿದರು.
Source:News Agencies
