ಗ್ರಾಮೀಣ ಕರಕುಶಲ ಗ್ರಾಮಗಳಿಗೆ ಹೊಸ ಜೀವ ತುಂಬುತ್ತಿರುವ ಪ್ರವಾಸೋದ್ಯಮ – ವಿಯೆಟ್ನಾಂ ಮಾದರಿ ಗಮನ ಸೆಳೆಯುತ್ತಿದೆ

ವಿಯೆಟ್ನಾಂನಲ್ಲಿ ಗ್ರಾಮೀಣ ಪ್ರವಾಸೋದ್ಯಮ (Rural Tourism) ಪರಂಪರಾಗತ ಕರಕುಶಲ ಗ್ರಾಮಗಳಿಗೆ ಹೊಸ ಶಕ್ತಿ ತುಂಬುತ್ತಿರುವ ಪ್ರಮುಖ ಆರ್ಥಿಕ ಮಾದರಿಯಾಗಿ ಬೆಳೆಯುತ್ತಿದೆ. ಸಾಂಪ್ರದಾಯಿಕ ಕೈಗಾರಿಕೆ, ಸ್ಥಳೀಯ ಸಂಸ್ಕೃತಿ ಹಾಗೂ ಗ್ರಾಮೀಣ ಜೀವನಶೈಲಿಯನ್ನು ಪ್ರವಾಸೋದ್ಯಮದೊಂದಿಗೆ ಜೋಡಿಸುವ ಮೂಲಕ ಅನೇಕ ಗ್ರಾಮಗಳು ಆರ್ಥಿಕವಾಗಿ ಪುನಶ್ಚೇತನಗೊಳ್ಳುತ್ತಿರುವುದು ಗಮನ ಸೆಳೆಯುತ್ತಿದೆ. ಭಾರತದ ಹಳ್ಳಿಗಳಿಗೂ ಇದೊಂದು ಮಾದರಿಯಾಗುತ್ತಿದೆ.

ಆಧುನಿಕ ಜೀವನಶೈಲಿ, ನಗರಗಳಿಗೆ ವಲಸೆ ಹಾಗೂ ಮಾರುಕಟ್ಟೆ ಬದಲಾವಣೆಗಳಿಂದ ಅನೇಕ ಸಾಂಪ್ರದಾಯಿಕ ಗ್ರಾಮೀಣ ಕೈಗಾರಿಕೆಗಳು ಅಸ್ತಿತ್ವ ಕಳೆದುಕೊಳ್ಳುವ ಹಂತ ತಲುಪಿದ್ದವು. ಆದರೆ ಗ್ರಾಮೀಣ ಪ್ರವಾಸೋದ್ಯಮದ ಮೂಲಕ ಸ್ಥಳೀಯ ಕರಕುಶಲ ಕಲೆ, ಮಣ್ಣಿನ ಪಾತ್ರೆ ತಯಾರಿಕೆ, ರೇಷ್ಮೆ ನೇಕಾರಿಕೆ, ಹೂವಿನ ಕಲಾಕೃತಿಗಳು ಸೇರಿದಂತೆ ಹಲವು ವೃತ್ತಿಗಳಿಗೆ ಹೊಸ ಮಾರುಕಟ್ಟೆ ಸಿಕ್ಕಿದೆ.

ವರದಿಯ ಪ್ರಕಾರ, ವಿಯೆಟ್ನಾಂನಲ್ಲಿ ಸಾವಿರಾರು ಕರಕುಶಲ ಗ್ರಾಮಗಳ ಪೈಕಿ ನೂರಾರು ಗ್ರಾಮಗಳು ಈಗ ಪ್ರವಾಸೋದ್ಯಮ ಚಟುವಟಿಕೆಗಳೊಂದಿಗೆ ಸಂಪರ್ಕ ಹೊಂದಿವೆ. ಪ್ರವಾಸಿಗರು ಕೇವಲ ಉತ್ಪನ್ನ ಖರೀದಿಸುವುದಷ್ಟೇ ಅಲ್ಲದೆ, ಉತ್ಪಾದನಾ ಪ್ರಕ್ರಿಯೆಯನ್ನು ನೇರವಾಗಿ ವೀಕ್ಷಿಸುವುದು, ಸ್ವತಃ ಕೈಚಳಕದ ಅನುಭವ ಪಡೆಯುವುದು ಹಾಗೂ ಸ್ಥಳೀಯ ಸಂಸ್ಕೃತಿಯನ್ನು ಅರಿಯುವ ಅವಕಾಶವನ್ನು ಪಡೆಯುತ್ತಿದ್ದಾರೆ.

ಇದರಿಂದ ಸ್ಥಳೀಯ ಕಲಾವಿದರು ಹಾಗೂ ಗ್ರಾಮೀಣ ಸಮುದಾಯಗಳಿಗೆ ಹೆಚ್ಚುವರಿ ಆದಾಯ ದೊರೆಯುತ್ತಿದ್ದು, ಯುವಜನತೆ ಮತ್ತೆ ಸಾಂಪ್ರದಾಯಿಕ ವೃತ್ತಿಗಳತ್ತ ಆಸಕ್ತಿ ತೋರುತ್ತಿದ್ದಾರೆ. ಜೊತೆಗೆ ಗ್ರಾಮಗಳ ಸ್ವಚ್ಛತೆ, ಪರಿಸರ ಸಂರಕ್ಷಣೆ ಹಾಗೂ ಮೂಲಸೌಕರ್ಯ ಅಭಿವೃದ್ಧಿಗೂ ಉತ್ತೇಜನ ಸಿಕ್ಕಿದೆ.

ತಜ್ಞರ ಅಭಿಪ್ರಾಯದಂತೆ, ಕೃಷಿ, ಸಂಸ್ಕೃತಿ ಹಾಗೂ ಗ್ರಾಮೀಣ ಜೀವನವನ್ನು ಒಟ್ಟುಗೂಡಿಸುವ ಇಂತಹ ಮಾದರಿಗಳು ಗ್ರಾಮೀಣ ಆರ್ಥಿಕತೆಯನ್ನು ಬಹುಮುಖವಾಗಿ ಅಭಿವೃದ್ಧಿಪಡಿಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ. ಗ್ರಾಮೀಣ ಪ್ರವಾಸೋದ್ಯಮವು ಕೇವಲ ಆದಾಯದ ಮೂಲವಲ್ಲ, ಸ್ಥಳೀಯ ಪರಂಪರೆ ಮತ್ತು ಸಾಂಸ್ಕೃತಿಕ ಗುರುತಿನ ಸಂರಕ್ಷಣೆಯ ಸಾಧನವಾಗಿಯೂ ಪರಿಣಮಿಸುತ್ತಿದೆ.

ಭಾರತದ ಅನೇಕ ಗ್ರಾಮೀಣ ಪ್ರದೇಶಗಳಲ್ಲಿಯೂ ಇದೇ ರೀತಿಯ ಅವಕಾಶಗಳಿದ್ದು, ಕೃಷಿ, ಅಡಿಕೆ ತೋಟಗಳು, ಸಾಂಪ್ರದಾಯಿಕ ಆಹಾರ, ಗ್ರಾಮೀಣ ಕಲೆ ಹಾಗೂ ಸ್ಥಳೀಯ ಉತ್ಪನ್ನಗಳನ್ನು ಪ್ರವಾಸೋದ್ಯಮದೊಂದಿಗೆ ಜೋಡಿಸಿದರೆ ಗ್ರಾಮೀಣ ಉದ್ಯಮಶೀಲತೆಗೆ ಹೊಸ ದಾರಿ ತೆರೆಯಬಹುದು ಎಂಬ ಅಭಿಪ್ರಾಯಗಳು ಇವೆ. ಭಾರತದಲ್ಲೂ ನಮ್ಮ ಹಳ್ಳಿಗಳಿಗೆ ಇಂತಹ ಮಾದರಿಗಳನ್ನು ಬೆಳೆಸಬಹುದಾಗಿದೆ. ಹಳ್ಳಿ, ಗ್ರಾಮೀಣ ಭಾಗದ ಆರ್ಥಿಕತೆ ಹೆಚ್ಚಿಸಲು ಇದು ಸಹಕಾರಿಯಾಗಬಹುದು. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ

Rural tourism is emerging as a major force in reviving traditional craft villages in Vietnam. By combining cultural heritage, handicrafts, agriculture, and tourism experiences, many rural communities are generating new income opportunities while preserving local traditions and creating sustainable rural development.