ಕೃಷಿ ಇನ್ನು ಕೇವಲ ಬೆಳೆ ಬೆಳೆಯುವುದಲ್ಲ – ಯುವಕರಿಗೆ ಸ್ಟಾರ್ಟ್‌ಅಪ್ ಕ್ಷೇತ್ರ

ಕೃಷಿ ಮತ್ತು ಕೃಷಿ ಸಂಬಂಧಿತ ಕ್ಷೇತ್ರಗಳು ಯುವ ಉದ್ಯಮಶೀಲತೆಗೆ ಮುಂದಿನ ದೊಡ್ಡ ಅವಕಾಶಗಳಾಗಿವೆ ಎಂದು ಜಮ್ಮು–ಕಾಶ್ಮೀರದ ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಹೇಳಿದ್ದಾರೆ. ವಿದೇಶಿ ಮಾದರಿಗಳನ್ನು ನಕಲು ಮಾಡುವ ಬದಲು, ಸ್ಥಳೀಯ ರೈತರು, ಹವಾಮಾನ, ಕೃಷಿ ಸಮಸ್ಯೆಗಳು ಮತ್ತು ಮಾರುಕಟ್ಟೆಯ ಅಗತ್ಯಗಳನ್ನು ಅರ್ಥಮಾಡಿಕೊಂಡು ಸ್ಥಳೀಯ ಪರಿಹಾರಗಳನ್ನು ರೂಪಿಸುವಂತೆ ಅವರು ಯುವಕರಿಗೆ ಕರೆ ನೀಡಿದ್ದಾರೆ.

ಶೇರ್-ಎ-ಕಾಶ್ಮೀರ್ ಕೃಷಿ ವಿಜ್ಞಾನ ಮತ್ತು ತಂತ್ರಜ್ಞಾನ ವಿಶ್ವವಿದ್ಯಾಲಯ, ಜಮ್ಮುವಿನಲ್ಲಿ ಹಲವು ಹೊಸ ಕೃಷಿ ಮೂಲಸೌಕರ್ಯಗಳನ್ನು ಉದ್ಘಾಟಿಸಿ ಹಾಗೂ ಸ್ಟಾರ್ಟ್‌ಅಪ್ ಔಟ್‌ರೀಚ್ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಕೃಷಿ ಮತ್ತು ಅದರ ಸಂಬಂಧಿತ ವಲಯಗಳಲ್ಲಿ ವಿಶ್ವದಾದ್ಯಂತ ತಂತ್ರಜ್ಞಾನ ಆಧಾರಿತ ಹೊಸ ಉದ್ಯಮಗಳು ಬೆಳೆಯುತ್ತಿವೆ ಎಂದರು. ಕೃಷಿ ಎಂದರೆ ಕೇವಲ ಸಾಂಪ್ರದಾಯಿಕ ಬೆಳೆ ಬೆಳೆಯುವುದು ಎಂಬ ಕಲ್ಪನೆ ಬದಲಾಗುತ್ತಿದೆ.  AIಯಿಂದ ಅಣಬೆ, ಕೋಲ್ಡ್‌ಚೈನ್‌ನಿಂದ ಡಿಜಿಟಲ್ ಮಾರುಕಟ್ಟೆವರೆಗೆ ಅವಕಾಶಗಳು ಇವೆ. ಕೃಷಿಯಲ್ಲಿ ಹೊಸ ಉದ್ಯಮ ಅವಕಾಶಗಳತ್ತ ಯುವಕರಿಗೆ ಕರೆ ನೀಡಿದರು.

ಕೃಷಿ, ಪಶುಸಂಗೋಪನೆ, ಹೈನುಗಾರಿಕೆ, ಅಣಬೆ, ರೇಷ್ಮೆ, ನೀರಾವರಿ, ಸಂಗ್ರಹಣೆ, ಸಂಸ್ಕರಣೆ ಮತ್ತು ಮಾರುಕಟ್ಟೆ ಸೇರಿದಂತೆ ಕೃಷಿಯ ಸುತ್ತಲಿನ ಸಂಪೂರ್ಣ ಮೌಲ್ಯ ಸರಪಳಿಯಲ್ಲಿ ಹೊಸ ಉದ್ಯಮಗಳಿಗೆ ಅವಕಾಶವಿದೆ ಎಂದು ಸಿನ್ಹಾ ಹೇಳಿದ್ದಾರೆ. ನೆದರ್ಲೆಂಡ್ಸ್‌ನ ಹೈನುಗಾರಿಕೆಯಲ್ಲಿ ಕೃತಕ ಬುದ್ಧಿಮತ್ತೆ ಬಳಕೆ, ಇಸ್ರೇಲ್‌ನಲ್ಲಿ ಕೃಷಿ ಮತ್ತು ಹೈನುಗಾರಿಕೆಯಲ್ಲಿ ದತ್ತಾಂಶ ಆಧಾರಿತ ನಿರ್ವಹಣೆ, ನ್ಯೂಜಿಲೆಂಡ್‌ನ ಪಶುಸಂಗೋಪನೆಯಲ್ಲಿ ಡಿಜಿಟಲ್ ತಂತ್ರಜ್ಞಾನ ಮತ್ತು ಬ್ರೆಜಿಲ್‌ನ ನೀರಾವರಿ ಆಧಾರಿತ ಹೊಸ ಉದ್ಯಮಗಳ ಉದಾಹರಣೆಗಳನ್ನು ಅವರು ಉಲ್ಲೇಖಿಸಿದ್ದಾರೆ.

ವಿದೇಶಿ ಮಾದರಿ ನಕಲು ಬೇಡ : ವಿದೇಶದಲ್ಲಿ ಯಶಸ್ವಿಯಾಗಿದೆ ಎಂದ ಮಾತ್ರಕ್ಕೆ ಅದನ್ನೇ ನೇರವಾಗಿ ಇಲ್ಲಿಗೆ ತರುವುದು ಬೇಡ. ತಮ್ಮದೇ ಹೊಲ, ರೈತ, ಹವಾಮಾನ ಮತ್ತು ಸ್ಥಳೀಯ ಸಮಸ್ಯೆಗಳನ್ನು ಅರ್ಥಮಾಡಿಕೊಂಡು ಅದಕ್ಕೆ ಸೂಕ್ತವಾದ ಪರಿಹಾರ ರೂಪಿಸುವಂತೆ ಸಿನ್ಹಾ ಯುವಕರಿಗೆ ಹೇಳಿದ್ದಾರೆ.

ಕೃಷಿ ವಿಶ್ವವಿದ್ಯಾಲಯದಲ್ಲಿ AIಯಿಂದ ಅಣಬೆ ಸಂಶೋಧನೆಯವರೆಗೆ :  ಎಸ್‌ಕೆಯುಎಎಸ್‌ಟಿ–ಜಮ್ಮುವಿನಲ್ಲಿ ಉದ್ಘಾಟಿಸಲಾದ ಹೊಸ ಸೌಲಭ್ಯಗಳಲ್ಲಿ ಕೃಷಿಯಲ್ಲಿ AI ಮತ್ತು ಯಂತ್ರ ಕಲಿಕೆ ಕೇಂದ್ರ,  ಅಣಬೆ ಸಂಶೋಧನೆ ಮತ್ತು ನವೋದ್ಯಮ ಕೇಂದ್ರ, ಸುಧಾರಿತ ರೇಷ್ಮೆ ಪ್ರಯೋಗಾಲಯ, ಡಿಜಿಟಲ್ ಮಾಧ್ಯಮ ಮತ್ತು ಪ್ರಕಟಣಾ ಕೇಂದ್ರ, ವಿದ್ಯಾರ್ಥಿನಿಯರಿಗಾಗಿ ಉನ್ನತಿ ವಸತಿ ನಿಲಯ ಸೇರಿವೆ. ಹೀಗಾಗಿ ಇವು ಕೇವಲ ಕಟ್ಟಡಗಳಲ್ಲ; ಸಂಶೋಧಕರು, ಯುವ ಉದ್ಯಮಿಗಳು, ರೈತ ಕುಟುಂಬಗಳು ಮತ್ತು ನವೋದ್ಯಮಿಗಳಿಗೆ ಬೆಂಬಲ ನೀಡುವ ವ್ಯವಸ್ಥೆಯ ಭಾಗ ಎಂದು ಸಿನ್ಹಾ ಹೇಳಿದ್ದಾರೆ.

ಕೃಷಿಯಿಂದ ಸ್ಟಾರ್ಟ್‌ಅಪ್‌ವರೆಗೆ : ಪದವಿ ನಿಮ್ಮ ಗುರಿಯಲ್ಲ; ಅದು ಯಶಸ್ಸಿನ ಹಾರಾಟಕ್ಕೆ ರನ್‌ವೇ  ಎಂಬ ಸಂದೇಶವನ್ನು ಯುವಕರಿಗೆ ನೀಡಿದ ಸಿನ್ಹಾ, ಜ್ಞಾನವನ್ನು ಹೊಸ ಆಲೋಚನೆಗಳಾಗಿ ಪರಿವರ್ತಿಸಿ, ಧೈರ್ಯದಿಂದ ಅದನ್ನು ಸ್ಟಾರ್ಟ್‌ಅಪ್ ಆಗಿ ರೂಪಿಸುವಂತೆ ಕರೆ ನೀಡಿದ್ದಾರೆ. ಕೃಷಿ ವಿಶ್ವವಿದ್ಯಾಲಯಗಳು ಕೇವಲ ಕೃಷಿ ಪದವಿ ನೀಡುವ ಸಂಸ್ಥೆಗಳಾಗಿರದೆ ಸಂಶೋಧನೆ , ತಂತ್ರಜ್ಞಾನ , ಉದ್ಯಮ , ಮಾರುಕಟ್ಟೆ ಸಂಪರ್ಕಿಸುವ ಕೇಂದ್ರಗಳಾಗಬೇಕೆಂಬ ಆಲೋಚನೆ ಇಲ್ಲಿ ಕಾಣಿಸುತ್ತದೆ.

150 ವಿದ್ಯಾರ್ಥಿಗಳ ಐಡಿಯಾ ಇನ್‌ಕ್ಯುಬೇಷನ್, 56 ಸ್ಟಾರ್ಟ್‌ಅಪ್‌ಗಳಿಗೆ ಬೆಂಬಲ :  ಎಸ್‌ಕೆಯುಎಎಸ್‌ಟಿ–ಜಮ್ಮು ಇದುವರೆಗೆ 150ಕ್ಕೂ ಹೆಚ್ಚು ವಿದ್ಯಾರ್ಥಿಗಳನ್ನು ಐಡಿಯಾ ಇನ್‌ಕ್ಯುಬೇಷನ್‌ಗೆ ಆಯ್ಕೆ ಮಾಡಿದ್ದು, 56 ಭರವಸೆಯ ಸ್ಟಾರ್ಟ್‌ಅಪ್‌ಗಳಿಗೆ ಬೆಂಬಲ ನೀಡಿದೆ ಎಂದು ಸಿನ್ಹಾ ತಿಳಿಸಿದ್ದಾರೆ. ಗ್ರಾಮೀಣ ಹಾಗೂ ದೂರದ ಪ್ರದೇಶಗಳಿಗೂ ಸ್ಟಾರ್ಟ್‌ಅಪ್ ಔಟ್‌ರೀಚ್ ವಿಸ್ತರಿಸಲಾಗುತ್ತಿದೆ. ಅಂದರೆ ಕೃಷಿ ಉದ್ಯಮಶೀಲತೆಯನ್ನು ಕೇವಲ ನಗರ ಯುವಕರಿಗೆ ಸೀಮಿತಗೊಳಿಸದೆ ಗ್ರಾಮೀಣ ಯುವಕರಿಗೂ ತಲುಪಿಸುವ ಪ್ರಯತ್ನ ನಡೆಯುತ್ತಿದೆ.

ಕೃಷಿ ಉತ್ಪನ್ನಕ್ಕೆ ಮಾರುಕಟ್ಟೆ ಕಟ್ಟುವ ಯುವಕರು ಬೇಕು :  ಸಾಂಪ್ರದಾಯಿಕ ಕೃಷಿಯಿಂದ ಹೊರತಾಗಿ ಯುವಕರು ಕೋಲ್ಡ್‌ಚೈನ್, ಗ್ರೇಡಿಂಗ್, ಪ್ಯಾಕೇಜಿಂಗ್, ಪ್ರಾದೇಶಿಕ ಬ್ರ್ಯಾಂಡಿಂಗ್ ಮತ್ತು ಡಿಜಿಟಲ್ ಮಾರುಕಟ್ಟೆಗಳತ್ತ ಗಮನಹರಿಸಬೇಕು ಎಂದು ಸಿನ್ಹಾ ಹೇಳಿದ್ದಾರೆ. ಜಮ್ಮು–ಕಾಶ್ಮೀರದ ಕೃಷಿ ಉತ್ಪನ್ನಗಳನ್ನು ದೆಹಲಿ, ದುಬೈ ಮತ್ತು ಇತರ ಮಾರುಕಟ್ಟೆಗಳಿಗೆ ಕೊಂಡೊಯ್ಯುವ ಸಾಮರ್ಥ್ಯವನ್ನು ಬೆಳೆಸಬೇಕಾಗಿದೆ ಎಂದಿದ್ದಾರೆ.

ಇದರ ಅರ್ಥ ರೈತನೇ ಎಲ್ಲವನ್ನೂ ಮಾಡಬೇಕು ಎಂದಲ್ಲ : ರೈತನ ಉತ್ಪನ್ನದ ಸುತ್ತ ಹೊಸ ಉದ್ಯಮಗಳು ಹುಟ್ಟಬೇಕು ಎಂಬುದು ಇದರ ಹಿಂದಿನ ದೊಡ್ಡ ಆಲೋಚನೆ. ಒಬ್ಬ ಯುವಕ ಕೋಲ್ಡ್‌ಚೈನ್ ಉದ್ಯಮ ಆರಂಭಿಸಬಹುದು. ಮತ್ತೊಬ್ಬ ಗ್ರೇಡಿಂಗ್–ಪ್ಯಾಕೇಜಿಂಗ್ ಘಟಕ ಮಾಡಬಹುದು. ಇನ್ನೊಬ್ಬ ಸ್ಥಳೀಯ ಉತ್ಪನ್ನಕ್ಕೆ ಬ್ರ್ಯಾಂಡ್ ಕಟ್ಟಬಹುದು. ಮತ್ತೊಬ್ಬ ಡಿಜಿಟಲ್ ಮಾರುಕಟ್ಟೆ ವೇದಿಕೆ ನಿರ್ಮಿಸಬಹುದು. ಇವೆಲ್ಲವೂ ಕೃಷಿಯ ಆದಾಯ ಸರಪಳಿಯನ್ನು ಬಲಪಡಿಸಬಹುದು. ಮಹಿಳೆಯರ ಪಾಲ್ಗೊಳ್ಳುವಿಕೆ ಇಲ್ಲದೆ ಉದ್ಯಮ ಕ್ರಾಂತಿಕಾರಿಯಾಗಲಾರದು. ಕೃಷಿ ಉದ್ಯಮಶೀಲತೆಯಲ್ಲಿ ಮಹಿಳೆಯರ ಪಾತ್ರಕ್ಕೂ ಸಿನ್ಹಾ ಒತ್ತು ನೀಡಿದ್ದಾರೆ. ಮಹಿಳಾ ಸ್ವಸಹಾಯ ಸಂಘಗಳು ಮತ್ತು ರೈತ ಉತ್ಪಾದಕ ಸಂಸ್ಥೆಗಳಿಗೆ ಹಣಕಾಸು, ತಂತ್ರಜ್ಞಾನ ಮತ್ತು ಮಾರುಕಟ್ಟೆ ಸಂಪರ್ಕ ದೊರೆಯುವಂತೆ ಮಾಡಬೇಕು ಎಂದು ಅವರು ಹೇಳಿದ್ದಾರೆ. ಗ್ರಾಮೀಣ ಮಹಿಳೆಯರು ಆಹಾರ ಸಂಸ್ಕರಣೆ, ಮೌಲ್ಯವರ್ಧನೆ, ಬೀಜ ಉತ್ಪಾದನೆ, ಹಸ್ತಕಲೆ, ಪಶುಸಂಗೋಪನೆ ಮತ್ತು ಸ್ಥಳೀಯ ಕೃಷಿ ಉತ್ಪನ್ನಗಳ ಬ್ರ್ಯಾಂಡಿಂಗ್ ಮೂಲಕ ಉದ್ಯಮಿಗಳಾಗುವ ಅವಕಾಶವಿದೆ.

ಕರ್ನಾಟಕದ ಯುವಕರಿಗೂ ಇದು ಪಾಠ :   ಜಮ್ಮು–ಕಾಶ್ಮೀರದ ಕಾರ್ಯಕ್ರಮವಾದರೂ ಇದರ ಸಂದೇಶ ಕರ್ನಾಟಕದ ಯುವಕರಿಗೂ ಅನ್ವಯಿಸುತ್ತದೆ. ಕರಾವಳಿಯಲ್ಲಿ  ತೆಂಗು,  ಅಡಿಕೆ,  ಕಾಳುಮೆಣಸು,  ಬಾಳೆ,  ಹಲಸು ಇತ್ಯಾದಿಗಳು, ಮಲೆನಾಡಿನಲ್ಲಿ  ಕಾಫಿ,  ಮಸಾಲೆ ಬೆಳೆಗಳು,  ಪಶುಸಂಗೋಪನೆ, ಉತ್ತರ ಕರ್ನಾಟಕದಲ್ಲಿ ಒಣಭೂಮಿ ಬೆಳೆಗಳು,  ಎಣ್ಣೆಬೀಜ,  ಬೇಳೆ,  ನೀರು ನಿರ್ವಹಣೆ  ಇವುಗಳ ಸುತ್ತ ಸ್ಥಳೀಯ ಸಮಸ್ಯೆಗಳಿಗೆ ಪರಿಹಾರ ನೀಡುವ ಸ್ಟಾರ್ಟ್‌ಅಪ್‌ಗಳಿಗೆ ದೊಡ್ಡ ಅವಕಾಶವಿದೆ.

ಭಾರತದ ಕೃಷಿ ಸ್ಟಾರ್ಟ್‌ಅಪ್‌ಗಳಿಗೆ ಅತ್ಯಂತ ಮುಖ್ಯವಾದ ದೃಷ್ಟಿಕೋನ : ಕರ್ನಾಟಕದ ಮಲೆನಾಡಿನ ಸಮಸ್ಯೆ ಒಂದು ರೀತಿಯದ್ದಾದರೆ, ಉತ್ತರ ಕರ್ನಾಟಕದ ಒಣಭೂಮಿ ಕೃಷಿಯ ಸಮಸ್ಯೆ ಮತ್ತೊಂದು. ಕರಾವಳಿಯ ತೋಟಗಾರಿಕೆ ಸಮಸ್ಯೆಗಳು ಬೇರೆ. ಹೀಗಾಗಿ ಸ್ಥಳೀಯ ಸಮಸ್ಯೆ ಆಧಾರಿತ ಕೃಷಿ ಉದ್ಯಮಗಳೇ ಹೆಚ್ಚು ಪರಿಣಾಮಕಾರಿ ಆಗಬಹುದು.

ರೈತನ ಸಮಸ್ಯೆಯೇ ಮುಂದಿನ ಸ್ಟಾರ್ಟ್‌ಅಪ್‌ನ ಅವಕಾಶ : ಕೃಷಿ ಸ್ಟಾರ್ಟ್‌ಅಪ್ ಎಂದರೆ ಕೇವಲ ಮೊಬೈಲ್‌ ಆ್ಯಪ್ ಅಥವಾ ಕೃತಕ ಬುದ್ಧಿಮತ್ತೆ ಅಲ್ಲ. ರೈತನಿಗೆ ಹೆಚ್ಚು ವೆಚ್ಚವಾಗುತ್ತಿರುವ ಕೆಲಸವನ್ನು ಕಡಿಮೆ ಮಾಡುವುದು, ಬೆಳೆ ನಷ್ಟ ತಡೆಯುವುದು, ನೀರು ಉಳಿಸುವುದು, ಉತ್ಪನ್ನದ ಗುಣಮಟ್ಟ ಹೆಚ್ಚಿಸುವುದು, ಮಾರುಕಟ್ಟೆ ಸಂಪರ್ಕಿಸುವುದು ಅಥವಾ ಮೌಲ್ಯವರ್ಧನೆ ಮಾಡುವುದು  ಇವೆಲ್ಲವೂ ಉದ್ಯಮದ ಅವಕಾಶಗಳೇ. ಆದ್ದರಿಂದ ಮುಂದಿನ ಕೃಷಿ ಉದ್ಯಮಿಯ ದೊಡ್ಡ ಕಚೇರಿ ಬಹುಶಃ ರೈತನ ಹೊಲವೇ ಆಗಿರಬಹುದು. ಕೃಷಿಯ ಮುಂದಿನ ಹಂತದಲ್ಲಿ ರೈತ ಒಬ್ಬನೇ ಇರಲಾರ. ಅವನೊಂದಿಗೆ ತಂತ್ರಜ್ಞಾನ, ಸಂಶೋಧನೆ, ಸ್ಟಾರ್ಟ್‌ಅಪ್, ಸಂಸ್ಕರಣೆ, ಹಣಕಾಸು ಮತ್ತು ಮಾರುಕಟ್ಟೆ ಸೇರಬೇಕಿದೆ.

ಮನೋಜ್ ಸಿನ್ಹಾ ಅವರ ಸಂದೇಶವೂ ಇದೇ: ವಿದೇಶದ ಸಮಸ್ಯೆಗೆ ಕಂಡುಹಿಡಿದ ಪರಿಹಾರವನ್ನು ನಕಲು ಮಾಡುವುದಕ್ಕಿಂತ, ನಮ್ಮ ರೈತನ ಸಮಸ್ಯೆಯನ್ನು ಅರ್ಥಮಾಡಿಕೊಂಡು ಅದಕ್ಕೆ ಪರಿಹಾರ ಕಂಡುಹಿಡಿಯುವ ಯುವಕರೇ ಭಾರತದ ಕೃಷಿಯ ಮುಂದಿನ ಉದ್ಯಮಿಗಳು.

ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಫಾಲೋಮಾಡಲು ಇಲ್ಲಿ ಕ್ಲಿಕ್‌ ಮಾಡಿ

Jammu and Kashmir Lieutenant Governor Manoj Sinha has described agriculture and allied sectors as the next major frontier for youth entrepreneurship, urging young innovators to develop solutions suited to local farmers, climate and regional challenges rather than simply copying foreign models. At SKUAST-Jammu, he inaugurated facilities including a Centre for AI and ML in Agriculture, a Mushroom Research and Innovation Centre and an Advanced Sericulture Laboratory, besides launching a Startup Outreach Programme. SKUAST-Jammu has so far selected more than 150 students for idea incubation and supported 56 startups. Sinha also encouraged youth to explore cold chains, grading, packaging, regional branding and digital marketplaces to take agricultural products to wider markets