ತೆಂಗಿನ ಎಣ್ಣೆಯಿಂದ ವಿಮಾನದ ಇಂಧನ ? ಜೆಟ್‌ ಎಂಜಿನ್‌ ಪರೀಕ್ಷೆಯಲ್ಲಿ ಕುತೂಹಲ ಮೂಡಿಸಿದ ಫಲಿತಾಂಶ

ತೆಂಗಿನ ಎಣ್ಣೆ ಕೇವಲ ಅಡುಗೆ ಎಣ್ಣೆಯಾಗಿ ಉಳಿಯದೆ, ಭವಿಷ್ಯದಲ್ಲಿ ವಿಮಾನ ಇಂಧನದ ಕಚ್ಚಾ ವಸ್ತುವಾಗಬಹುದೇ? ಜಪಾನ್‌ನ ಸಂಶೋಧಕರ ಪ್ರಯೋಗವೊಂದು ಈ ಸಾಧ್ಯತೆಯ ಬಗ್ಗೆ ಹೊಸ ಚರ್ಚೆಗೆ ಕಾರಣವಾಗಿದೆ.

ಜಪಾನ್‌ನ ಒಸಾಕಾ ಮೆಟ್ರೋಪಾಲಿಟನ್ ವಿಶ್ವವಿದ್ಯಾಲಯದ ಸಂಶೋಧಕರು ತೆಂಗಿನ ಎಣ್ಣೆಯಿಂದ ತಯಾರಿಸಿದ ಜೈವಿಕ ಇಂಧನವನ್ನು ಸಣ್ಣ ಜೆಟ್‌ ಎಂಜಿನ್‌ನಲ್ಲಿ ಪರೀಕ್ಷಿಸಿದ್ದಾರೆ. ಸಾಂಪ್ರದಾಯಿಕ ಜೆಟ್‌ ಇಂಧನವಾದ ಕೆರೋಸಿನ್‌ನೊಂದಿಗೆ ತೆಂಗಿನ ಎಣ್ಣೆ ಆಧಾರಿತ ಇಂಧನವನ್ನು ವಿವಿಧ ಪ್ರಮಾಣದಲ್ಲಿ ಮಿಶ್ರಣ ಮಾಡಿ ಎಂಜಿನ್‌ನ ಕಾರ್ಯಕ್ಷಮತೆ ಹಾಗೂ ಹೊರಸೂಸುವಿಕೆಯನ್ನು ಪರಿಶೀಲಿಸಲಾಗಿದೆ.

50% ಮಿಶ್ರಣದಲ್ಲೂ ಕಾರ್ಯಕ್ಷಮತೆ ಗಮನಾರ್ಹ : ಪರೀಕ್ಷೆಯಲ್ಲಿ ತೆಂಗಿನ ಎಣ್ಣೆ ಆಧಾರಿತ ಇಂಧನವನ್ನು ಶೇ.10, ಶೇ.30 ಮತ್ತು ಶೇ.50ರ ಪ್ರಮಾಣದಲ್ಲಿ ಕೆರೋಸಿನ್‌ನೊಂದಿಗೆ ಮಿಶ್ರಣ ಮಾಡಲಾಯಿತು. ಶೇ.50 ರ ಮಿಶ್ರಣದಲ್ಲಿಯೂ ಎಂಜಿನ್‌ನ ಉಷ್ಣ ದಕ್ಷತೆ ಸಾಂಪ್ರದಾಯಿಕ ಕೆರೋಸಿನ್‌ಗೆ ಹೋಲಿಸಬಹುದಾದ ಮಟ್ಟದಲ್ಲಿತ್ತು. ತೆಂಗಿನ ಎಣ್ಣೆ ಆಧಾರಿತ ಇಂಧನದ ಪ್ರಮಾಣ ಹೆಚ್ಚಿದಂತೆ ಸುಡದೆ ಉಳಿಯುವ ಹೈಡ್ರೋಕಾರ್ಬನ್‌ಗಳ ಹೊರಸೂಸುವಿಕೆ ಕಡಿಮೆಯಾಗಿರುವುದು ಕೂಡ ಸಂಶೋಧಕರ ಗಮನಕ್ಕೆ ಬಂದಿದೆ. ಆದರೆ ಇಂಗಾಲದ ಮಾನಾಕ್ಸೈಡ್ ಹೊರಸೂಸುವಿಕೆಯಲ್ಲಿ ಸ್ವಲ್ಪ ಏರಿಕೆ ಕಂಡುಬಂದಿದೆ.

ವಿಮಾನ ಇಂಧನವಾಗಲು ಇನ್ನೂ ಅಡೆತಡೆಗಳಿವೆ : ಇದರರ್ಥ ತೆಂಗಿನ ಎಣ್ಣೆಯನ್ನು ನೇರವಾಗಿ ವಿಮಾನಗಳಲ್ಲಿ ಬಳಸಬಹುದು ಎಂದಲ್ಲ. ಇಂಧನದಲ್ಲಿರುವ ಆಮ್ಲಜನಕದ ಪ್ರಮಾಣವು ಪ್ರಸ್ತುತ ವಿಮಾನ ಇಂಧನ ಮಾನದಂಡಗಳಿಗೆ ಹೊಂದಿಕೆಯಾಗದಿರುವುದು ಪ್ರಮುಖ ಸಮಸ್ಯೆಯಾಗಿದೆ. ಅದರ ಜೊತೆಗೆ ಸಂಗ್ರಹಣೆ ವೇಳೆ ಸ್ಥಿರತೆ, ಆಕ್ಸಿಡೀಕರಣ ಹಾಗೂ ಲೋಹದ ಭಾಗಗಳ ಮೇಲೆ ಉಂಟಾಗಬಹುದಾದ ತುಕ್ಕು ಸೇರಿದಂತೆ ಹಲವು ತಾಂತ್ರಿಕ ಸಮಸ್ಯೆಗಳನ್ನು ಪರಿಹರಿಸಬೇಕಾಗಿದೆ. ಇದಲ್ಲದೆ, ಈ ಪರೀಕ್ಷೆ ಸಣ್ಣ ಜೆಟ್‌ ಎಂಜಿನ್‌ನಲ್ಲಿ ನಡೆದಿರುವುದರಿಂದ ವಾಣಿಜ್ಯ ವಿಮಾನಗಳ ದೊಡ್ಡ ಎಂಜಿನ್‌ಗಳಲ್ಲೂ ಇದೇ ಫಲಿತಾಂಶ ಸಿಗುತ್ತದೆ ಎಂದು ಈಗಲೇ ನಿರ್ಧರಿಸಲಾಗದು.

ತೆಂಗು ಬೆಳೆಗಾರರಿಗೆ ಏನು ಸಂದೇಶ? : ಇಲ್ಲಿ ಗಮನಿಸಬೇಕಾದದ್ದು “ತೆಂಗಿನ ಎಣ್ಣೆ ವಿಮಾನದ ಇಂಧನವಾಗಲಿದೆ” ಎನ್ನುವುದಕ್ಕಿಂತಲೂ, ತೆಂಗಿನ ಉತ್ಪನ್ನಗಳಿಗೆ ಆಹಾರೇತರ ಬಳಕೆಯ ಮೂಲಕ ಹೆಚ್ಚುವರಿ ಮೌಲ್ಯ ಸೃಷ್ಟಿಸುವ ಸಾಧ್ಯತೆ.  ವಿಶೇಷವಾಗಿ ತೆಂಗಿನ ಸಂಸ್ಕರಣೆಯಲ್ಲಿ ಉಳಿಯುವ ವಸ್ತುಗಳನ್ನು ಜೈವಿಕ ಇಂಧನದ ಕಚ್ಚಾ ವಸ್ತುವಾಗಿ ಬಳಸುವ ಸಾಧ್ಯತೆಯೂ ಸಂಶೋಧನೆಯಲ್ಲಿ ಪರಿಶೀಲಿಸಲಾಗಿದೆ. ಹೀಗಾಗಿ ಭವಿಷ್ಯದಲ್ಲಿ ತೆಂಗಿನ ಉತ್ಪನ್ನಗಳ ಮೌಲ್ಯ ಸರಪಳಿಯಲ್ಲಿ ಆಹಾರ, ಕೈಗಾರಿಕೆ ಮತ್ತು ಇಂಧನ ಕ್ಷೇತ್ರಗಳ ಹೊಸ ಅವಕಾಶಗಳು ತೆರೆದುಕೊಳ್ಳಬಹುದೇ ಎಂಬುದು ಗಮನಿಸಬೇಕಾದ ವಿಷಯ.

ಆದರೆ, ಈ ಹಂತದಲ್ಲಿ ಇದನ್ನು ವಾಣಿಜ್ಯ ವಿಮಾನ ಇಂಧನದ ಪರ್ಯಾಯ ಎಂದು ಘೋಷಿಸುವುದು ಅವಸರದ ಮಾತು. ತಾಂತ್ರಿಕ ಮಾನದಂಡಗಳು, ದೊಡ್ಡ ಪ್ರಮಾಣದ ಉತ್ಪಾದನೆ, ವೆಚ್ಚ, ಕಚ್ಚಾ ವಸ್ತುವಿನ ಲಭ್ಯತೆ ಹಾಗೂ ಪರಿಸರ ಪರಿಣಾಮಗಳ ಬಗ್ಗೆ ಇನ್ನಷ್ಟು ಸಂಶೋಧನೆ ಅಗತ್ಯ.

ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಫಾಲೋಮಾಡಲು ಇಲ್ಲಿ ಕ್ಲಿಕ್‌ ಮಾಡಿ

Researchers in Japan have tested coconut-oil-derived biofuel in a small jet engine, finding that blends containing up to 50% of the fuel showed thermal efficiency comparable to conventional kerosene. The study also observed lower unburned hydrocarbon emissions, although carbon monoxide increased slightly. However, coconut-oil-based fuel is not yet ready for commercial aviation because of challenges related to oxygen content, storage stability, oxidation and corrosion. The research nevertheless highlights a potential future pathway for adding value to coconut-derived products and processing residues.