ಅಡಿಕೆ ವಹಿವಾಟಿನ ಮೇಲೆ ಹೆಚ್ಚಿದ ಕಣ್ಗಾವಲು..!, ಗಮನ ಸೆಳೆದ ಪ್ರತ್ಯೇಕ ಮೂರು ಘಟನೆಗಳು

ಅಡಿಕೆ ಸಾಗಣೆ, ತೆರಿಗೆ ಹಾಗೂ ಆಮದು ಅಡಿಕೆಯ ಗುಣಮಟ್ಟಕ್ಕೆ ಸಂಬಂಧಿಸಿದಂತೆ ಇತ್ತೀಚಿನ ಮೂರು ಪ್ರತ್ಯೇಕ ಪ್ರಕರಣಗಳು ಗಮನ ಸೆಳೆದಿವೆ. ಅಸ್ಸಾಂನಲ್ಲಿ 5,740 ಕೆ.ಜಿ. ಅಡಿಕೆಯನ್ನು ವಶಪಡಿಸಿಕೊಂಡು ಲಾರಿ ಚಾಲಕನನ್ನು ಬಂಧಿಸಲಾಗಿದೆ, ಕೇರಳದಲ್ಲಿ ಜಿಎಸ್‌ಟಿ ಕಾಯ್ದೆಯಡಿ ವಶಪಡಿಸಿಕೊಂಡ 380 ಚೀಲ ಅಡಿಕೆಯನ್ನು ಬಿಡುಗಡೆ ಮಾಡುವಂತೆ ಸಲ್ಲಿಸಿದ್ದ ಅರ್ಜಿಯನ್ನು ಹೈಕೋರ್ಟ್ ವಜಾಗೊಳಿಸಿದೆ. ಮತ್ತೊಂದೆಡೆ, FSSAI ಪರೀಕ್ಷೆಯಲ್ಲಿ ‘ಅಸುರಕ್ಷಿತ’ ಎಂದು ಗುರುತಿಸಲ್ಪಟ್ಟ ಆಮದು ಅಡಿಕೆಯನ್ನು ಕಲ್ಕತ್ತಾ ಹೈಕೋರ್ಟ್ ಮಾನವ ಬಳಕೆಗೆ ಅಲ್ಲದೆ ಕೈಗಾರಿಕಾ ಉದ್ದೇಶಕ್ಕೆ ಮಾತ್ರ ಷರತ್ತುಬದ್ಧವಾಗಿ ಬಿಡುಗಡೆ ಮಾಡಲು ಅವಕಾಶ ನೀಡಿದೆ.

ಅಸ್ಸಾಂನ ಶ್ರೀರಾಮಪುರದಲ್ಲಿ ಪೊಲೀಸರು ಲಾರಿಯೊಂದನ್ನು ತಡೆದು ಪರಿಶೀಲಿಸಿದಾಗ 5,740 ಕೆ.ಜಿ. ಅಡಿಕೆ ಸಾಗಾಟ ಪತ್ತೆಯಾಗಿದೆ. ಅಡಿಕೆಯನ್ನು ಅಕ್ರಮವಾಗಿ ಸಾಗಿಸಲಾಗುತ್ತಿತ್ತು ಎಂಬ ಶಂಕೆಯ ಹಿನ್ನೆಲೆಯಲ್ಲಿ ವಶಪಡಿಸಿಕೊಂಡು ಲಾರಿ ಚಾಲಕನನ್ನು ಬಂಧಿಸಲಾಗಿದೆ. ಅಡಿಕೆಯ ಮೂಲ, ಸಾಗಣೆ ಮಾರ್ಗ ಮತ್ತು ಎಲ್ಲಿಗೆ ಸಾಗಿಸಲಾಗುತ್ತಿತ್ತು ಎಂಬುದರ ಕುರಿತು ತನಿಖೆ ಮುಂದುವರಿದಿದೆ.

ಇನ್ನೊಂದು ಪ್ರಕರಣದಲ್ಲಿ, ಕೇರಳದಲ್ಲಿ ವಶಪಡಿಸಿಕೊಂಡಿದ್ದ 380 ಚೀಲ ಅಡಿಕೆಯನ್ನು ಬಿಡುಗಡೆ ಮಾಡುವಂತೆ ಕೋರಿ ವ್ಯಾಪಾರಿಯೊಬ್ಬರು ಹೈಕೋರ್ಟ್ ಮೆಟ್ಟಿಲೇರಿದ್ದರು. ಆದರೆ ಜಿಎಸ್‌ಟಿ ಕಾಯ್ದೆಯ ಅಡಿಯಲ್ಲಿ ತೆರಿಗೆ ಪ್ರಾಧಿಕಾರ ನಡೆಸುತ್ತಿರುವ ವಿಚಾರಣೆಯಲ್ಲಿ ಈ ಹಂತದಲ್ಲಿ ನ್ಯಾಯಾಲಯ ಮಧ್ಯಪ್ರವೇಶಿಸಲು ನಿರಾಕರಿಸಿದೆ. ಸಂಬಂಧಪಟ್ಟ ವ್ಯಾಪಾರಿ ತನ್ನ ಆಕ್ಷೇಪಣೆಗಳು ಮತ್ತು ದಾಖಲೆಗಳನ್ನು ಮೊದಲು ತೆರಿಗೆ ಪ್ರಾಧಿಕಾರದ ಮುಂದೆ ಮಂಡಿಸಬೇಕು ಎಂದು ನ್ಯಾಯಾಲಯ ತಿಳಿಸಿದೆ.

ಇದೇ ವೇಳೆ ಕಲ್ಕತ್ತಾ ಹೈಕೋರ್ಟ್‌ನಲ್ಲಿ ನಡೆದ ಮತ್ತೊಂದು ಪ್ರಕರಣದಲ್ಲಿ, ಆಹಾರ ಸುರಕ್ಷತಾ ಪರೀಕ್ಷೆಯಲ್ಲಿ ‘ಅಸುರಕ್ಷಿತ’ ಹಾಗೂ ಗುಣಮಟ್ಟಕ್ಕೆ ಹೊಂದಿಕೆಯಾಗದ ಅಡಿಕೆ ಎಂದು ಗುರುತಿ ವಶಪಡಿಸಿಕೊಂಡ ಆಮದು ಅಡಿಕೆಯನ್ನು ಷರತ್ತುಗಳೊಂದಿಗೆ ಬಿಡುಗಡೆ ಮಾಡಲು ಅವಕಾಶ ನೀಡಲಾಗಿದೆ. ಆದರೆ ಈ ಅಡಿಕೆಯನ್ನು ಮಾನವ ಬಳಕೆಗೆ ಬಳಸುವಂತಿಲ್ಲ; ಕೈಗಾರಿಕಾ ಉದ್ದೇಶಗಳಿಗೆ ಮಾತ್ರ ಬಳಸಬೇಕು ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.

ಅಡಿಕೆ ಹಾಳಾಗುವ ಸಾಧ್ಯತೆಯಿರುವುದನ್ನು ಪರಿಗಣಿಸಿ, ಸೂಕ್ತ ಭದ್ರತೆ ಮತ್ತು ನಿಯಮಗಳನ್ನು ಪಾಲಿಸಿದರೆ ಅಡಿಕೆ ಬಿಡುಗಡೆ ಮಾಡಬಹುದು ಎಂದು ನ್ಯಾಯಾಲಯದ ಆದೇಶದಲ್ಲಿ ಹೇಳಲಾಗಿದೆ. ಆದರೆ ಇದರಿಂದ ಕಸ್ಟಮ್ಸ್ ಪ್ರಕರಣ ಮುಕ್ತಾಯಗೊಂಡಿಲ್ಲ. ಆಮದು ಮತ್ತು ಕಸ್ಟಮ್ಸ್ ಸಂಬಂಧಿತ ವಿಚಾರಣೆ ಮುಂದುವರಿಯಲಿದ್ದು, ಅದನ್ನು ಪೂರ್ಣಗೊಳಿಸಲು ನ್ಯಾಯಾಲಯ ಸಮಯಮಿತಿಯನ್ನೂ ವಿಧಿಸಿದೆ.

ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಫಾಲೋಮಾಡಲು ಇಲ್ಲಿ ಕ್ಲಿಕ್‌ ಮಾಡಿ

Three separate recent cases involving areca nuts have highlighted increasing scrutiny over illegal transportation, GST compliance, customs procedures and food-safety standards. In Assam, 5,740 kg of areca nuts were seized from a truck and the driver was arrested. In Kerala, the High Court refused to release 380 seized bags of areca nuts while GST proceedings under Section 130 were pending before the tax authorities. In another case, the Calcutta High Court permitted conditional release of imported areca nuts classified as unsafe by food-safety authorities, but restricted their use to industrial purposes and not human consumption. Together, the cases underline the importance of proper documentation, tax compliance, lawful transportation and quality controls in the areca-nut trade.