ಸುಂಕರಹಿತ ಅಡಿಕೆ ಆಮದು ದಂಧೆಗೆ ಹೈಕೋರ್ಟ್ ಹೊಡೆತ – ₹20 ಕೋಟಿ ಸುಂಕ ವಿವಾದದಲ್ಲಿ ಮೇಲ್ಮನವಿಗಳು ವಜಾ

ಭಾರತದಲ್ಲಿ ಅಡಿಕೆ ಆಮದು ನಿಯಂತ್ರಣಕ್ಕಾಗಿ ಸರ್ಕಾರ ಹಲವು ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೆ ತಂದಿದ್ದರೂ, ಸುಂಕರಹಿತ ಆಮದು ಯೋಜನೆಗಳ ದುರುಪಯೋಗವಾಗುತ್ತಿರುವ ಬಗ್ಗೆ ಆತಂಕ ವ್ಯಕ್ತವಾಗಿದೆ.

ಅಡಿಕೆಗೆ ಸಂಬಂಧಿಸಿ ಸುಂಕ ರಹಿತ ಆಮದು ಯೋಜನೆಯ ದುರುಪಯೋಗ ಪ್ರಕರಣದಲ್ಲಿ ಮದ್ರಾಸ್‌  ಹೈಕೋರ್ಟ್  ಮಹತ್ವದ ತೀರ್ಪು ನೀಡಿದ್ದು, ಆಮದುದಾರರು ಸಲ್ಲಿಸಿದ್ದ ಮೇಲ್ಮನವಿಗಳನ್ನು ವಜಾಗೊಳಿಸಿದೆ.‌ ನ್ಯಾಯಮೂರ್ತಿಗಳಾದ ಜಿ. ಜಯಚಂದ್ರನ್ ಮತ್ತು ಆರ್. ಶಕ್ತಿವೇಲ್ ಅವರ ಪೀಠವು ಸೇವಾ ತೆರಿಗೆ ಮೇಲ್ಮನವಿ ನ್ಯಾಯಮಂಡಳಿ ( CESTAT) ನೀಡಿದ್ದ ಆದೇಶವನ್ನು ಎತ್ತಿಹಿಡಿದಿದೆ.

ಈ ಪ್ರಕರಣದಲ್ಲಿ ಸಂಸ್ಥೆಯು ₹10 ಕೋಟಿ ಹಾಗೂ ಅದರ ಪಾಲುದಾರರು ತಲಾ ₹10 ಲಕ್ಷ ಪೂರ್ವ ಠೇವಣಿ ಇಡಬೇಕೆಂದು ನ್ಯಾಯಮಂಡಳಿ ಷರತ್ತು ವಿಧಿಸಿತ್ತು. ಆದರೆ, ಈ ಷರತ್ತುಗಳನ್ನು ಪಾಲಿಸಲು ವಿಫಲವಾದ ಹಿನ್ನೆಲೆಯಲ್ಲಿ ಮೇಲ್ಮನವಿಗಳನ್ನು ವಜಾಗೊಳಿಸಲಾಯಿತು.

ಈ ವಿವಾದವು ಅಧಿಸೂಚನೆ ಸಂಖ್ಯೆ 32/1997 ಅಡಿಯಲ್ಲಿ ಸುಂಕ ರಹಿತವಾಗಿ ಅಡಿಕೆ ಆಮದು ಮಾಡಿಕೊಳ್ಳುವುದಕ್ಕೆ ಸಂಬಂಧಿಸಿದೆ. ನಿಯಮಾನುಸಾರ, ಆಮದು ಮಾಡಿದ ಅಡಿಕೆಯನ್ನು ಸಂಸ್ಕರಿಸಿ ಮರು-ರಫ್ತು ಮಾಡಬೇಕಾಗಿದ್ದರೂ, ತನಿಖೆಯಲ್ಲಿ ದೊಡ್ಡ ಪ್ರಮಾಣದ ಅಡಿಕೆಯನ್ನು ದೇಶೀಯ ಮಾರುಕಟ್ಟೆಯಲ್ಲಿ ಪಾನ್ ಮಸಾಲ ಮತ್ತು ಗುಟ್ಕಾ ಉತ್ಪಾದನೆಗೆ ಬಳಸಲಾಗಿದೆ ಎಂದು ಆರೋಪಿಸಲಾಗಿದೆ.

ಕಸ್ಟಮ್ಸ್ ಇಲಾಖೆಯ ಪ್ರಕಾರ, ಸುಮಾರು ₹19.8 ಕೋಟಿ ಮೌಲ್ಯದ 144 ಸಾಗಣೆಗಳಲ್ಲಿ ಆಮದು ಮಾಡಲಾದ ಅಡಿಕೆ ಈ ರೀತಿಯಾಗಿ ದುರುಪಯೋಗಗೊಂಡಿದೆ. ದಾಖಲೆ ತಿರುಚುವುದು, ತಪ್ಪು ರಫ್ತು ಕೋಡ್ ಬಳಕೆ, ಸಮಾನಾಂತರ ಇನ್‌ವಾಯ್ಸ್ ಸೃಷ್ಟಿ ಮುಂತಾದ ಅಕ್ರಮಗಳು ಕೂಡ ಬೆಳಕಿಗೆ ಬಂದಿವೆ. ಈ ಹಿನ್ನೆಲೆಯಲ್ಲಿ ₹20.12 ಕೋಟಿಗೂ ಅಧಿಕ ಕಸ್ಟಮ್ಸ್ ಸುಂಕ, ಬಡ್ಡಿ ಮತ್ತು ದಂಡ ವಿಧಿಸಲು ಕ್ರಮ ಕೈಗೊಳ್ಳಲಾಗಿದೆ. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ

ಪ್ರಸ್ತುತ ಅಡಿಕೆ ಆಮದು ಮೇಲೆ ಸುಮಾರು 100% ಸುಂಕ ವಿಧಿಸಲಾಗಿದ್ದು, ದೇಶೀಯ ರೈತರ ಹಿತವನ್ನು ರಕ್ಷಿಸಲು ಕನಿಷ್ಠ ಆಮದು ಬೆಲೆ (MIP) ₹351 ಪ್ರತಿ ಕೆಜಿಗೆ ನಿಗದಿಪಡಿಸಲಾಗಿದೆ. ಆದರೆ, ಕೆಲವು ವ್ಯಾಪಾರಿಗಳು ‘Advance Authorisation’ ಮತ್ತು ‘DFIA’ಯಂತಹ ಯೋಜನೆಗಳ ಮೂಲಕ ಸುಂಕ ರಹಿತ ಆಮದು ಮಾಡಿಕೊಳ್ಳುವ ಅವಕಾಶವನ್ನು ದುರುಪಯೋಗಪಡಿಸಿಕೊಂಡು ಕಡಿಮೆ ಬೆಲೆಯ ಅಡಿಕೆಯನ್ನು ದೇಶಕ್ಕೆ ತರಲಾಗುತ್ತಿದೆ ಎಂಬ ಆರೋಪಗಳು ಕೇಳಿಬಂದಿವೆ.

ಈ ಯೋಜನೆಗಳು ಮೂಲತಃ ಉತ್ಪಾದನಾ ಘಟಕಗಳಿಗೆ ಮಾತ್ರ ಉದ್ದೇಶಿತವಾಗಿದ್ದರೂ, ಕೆಲವರು ನಿಯಮಗಳ ಸಡಿಲತೆಯನ್ನು ಬಳಸಿಕೊಂಡು ವ್ಯಾಪಾರಿಕ ಉದ್ದೇಶಕ್ಕೆ ಅಡಿಕೆ ಆಮದು ಮಾಡುತ್ತಿರುವುದು ಗಮನಕ್ಕೆ ಬಂದಿದೆ.

ಇದರ ಪರಿಣಾಮವಾಗಿ ದೇಶೀಯ ಮಾರುಕಟ್ಟೆಯಲ್ಲಿ ಅಡಿಕೆ ಬೆಲೆ ಕುಸಿತವಾಗುವ ಸಾಧ್ಯತೆ ಇದ್ದು, ಕರ್ನಾಟಕ ಸೇರಿದಂತೆ ಅಡಿಕೆ ಬೆಳೆಗಾರರ ಆದಾಯದ ಮೇಲೆ ನೇರ ಪರಿಣಾಮ ಬೀರುತ್ತದೆ ಎಂಬ ಆತಂಕ ವ್ಯಕ್ತವಾಗಿದೆ.

ಅಡಿಕೆ ಆಮದು ಸಂಬಂಧಿತ ಅಕ್ರಮಗಳನ್ನು ತಡೆಯಲು ಕಸ್ಟಮ್ಸ್ ಮತ್ತು ಡಿಆರ್‌ಐ (DRI) ಅಧಿಕಾರಿಗಳು ನಿಗಾವಹಿಸುತ್ತಿದ್ದು, ಅಕ್ರಮ ಆಮದು ಪ್ರಕರಣಗಳಲ್ಲಿ ವಶಪಡಿಸಿಕೊಳ್ಳುವ ಕಾರ್ಯಾಚರಣೆಗಳು ಹೆಚ್ಚಾಗಿವೆ.

ತಜ್ಞರ ಪ್ರಕಾರ, ಸುಂಕ ರಹಿತ ಯೋಜನೆಗಳ ದುರುಪಯೋಗವನ್ನು ತಡೆಯಲು ಕಟ್ಟುನಿಟ್ಟಿನ ನಿಯಂತ್ರಣ ಹಾಗೂ ಮೇಲ್ವಿಚಾರಣೆ ಅಗತ್ಯವಾಗಿದೆ. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ

Madras High Court upheld CESTAT’s order in a major arecanut duty-free import misuse case and dismissed appeals for non-compliance with pre-deposit conditions. Authorities alleged diversion of imported arecanut worth ₹19.8 crore into domestic markets.

Concerns are rising over misuse of duty-free arecanut import schemes in India. Despite strict import duties and minimum price rules, loopholes in schemes like Advance Authorisation may impact domestic farmers.