ಉತ್ತರಪ್ರದೇಶದ ಗಾಜಿಯಾಬಾದ್‌ನಲ್ಲಿ ಎಲ್ಲಾ ನಾಯಿಗಳಿಗೂ ಮಾಸ್ಕ್ ಕಡ್ಡಾಯವಾಗಿದೆ. ಇಲ್ಲಿ ಮಾಸ್ಕ್ ಕಡ್ಡಾಯ ಮಾಡಿರುವುದು ಕೊರೋನಾಕ್ಕೆ ಅಲ್ಲ…!. ಬದಲಾಗಿ ನಾಯಿ ಧಾಳಿಯನ್ನು ತಪ್ಪಿಸಲು…!. . ಕೆಲವು ಪ್ರದೇಶಗಳಲ್ಲಿ ಮನುಷ್ಯರ ಮೇಲೆ ನಾಯಿ ದಾಳಿ ಹೆಚ್ಚಾಗಿದ್ದು, ಗಾಜಿಯಾಬಾದ್‌ನ ಮುನ್ಸಿಪಲ್ ಕಾರ್ಪೋರೇಷನ್ ಮಾಸ್ಕ್ ಕಡ್ಡಾಯ ಎಂದು ನೂತನ ನಿಯಮಾವಳಿ ರೂಪಿಸಿದೆ.
ಕಂಡಕಂಡವರಿಗೆ ನಾಯಿ ಕಚ್ಚುವುದು ಹೆಚ್ಚಾಗುತ್ತಿದ್ದು, ಆಡಳಿತವು ನಾಯಿ ಸಾಕುವುದಕ್ಕೆ ಹೊಸದಾಗಿ ನಿಯಮಾವಳಿಗಳನ್ನು ರೂಪಿಸಿದೆ. ಹೋರಾಟ ಮನೋಭಾವ ಇರುವ ಪಿಟ್‌ಬುಲ್, ರೋಟ್‌ವೀಲರ್ ಮತ್ತು ಡೊಗೊ ಅರ್ಜಂಟಿನೋ ತಳಿಗಳನ್ನು ಮುದ್ದಿನ ನಾಯಿಯಂತೆ ಮನೆಯಲ್ಲಿ ಸಾಕುವುದಕ್ಕೆ ನಿಷೇಧ ಹೇರಲಾಗಿದೆ.
ನಾಯಿಗಳನ್ನು ಸಾಕಿದವರಿಗೆ ಅದು ಮುದ್ದಿನ ಪ್ರಾಣಿ, ಆದರೆ ಕಚ್ಚಿಸಿಕೊಂಡವರಿಗೆ ಅದರ ನೋವು ಗೊತ್ತು. ನಾಯಿಯಿಂದ ತಪ್ಪಿಸಿಕೊಳ್ಳಲಾರದ ಮಕ್ಕಳು ಹೆಚ್ಚು ನೋವು ಅನುಭವಿಸುತ್ತಾರೆ. ಪಿಟ್‌ಬುಲ್ ನಾಯಿ ಕಡಿತದಿಂದ ಮಗುವಿನ ಮುಖಕ್ಕೆ 150 ಹೊಲಿಗೆ ಹಾಕಲಾಗಿದೆ ಎಂದು ಗಾಜಿಯಾಬಾದ್ ಮೇಯರ್ ಆಸಾ ಶರ್ಮಾ ಹೇಳಿದ್ದಾರೆ.
