ರೈತನ ಹೊಲದಿಂದ ನಿಮ್ಮ ತಟ್ಟೆಯವರೆಗೆ… AI ಬರಲಿದೆ..!

ರೈತನ ಹೊಲದಲ್ಲಿ ಬಿತ್ತಿದ ಬೆಳೆ ಎಲ್ಲಿ ಸಾಗಿತು, ಹೇಗೆ ಸಂಸ್ಕರಣೆಯಾಯಿತು, ಕೊನೆಗೆ ಗ್ರಾಹಕರ ಕೈಗೆ ಹೇಗೆ ತಲುಪಿತು ಎಂಬುದನ್ನು ಪತ್ತೆಹಚ್ಚಲು ಕರ್ನಾಟಕ ಸರ್ಕಾರ ಕೃತಕ ಬುದ್ಧಿಮತ್ತೆ (AI) ಆಧಾರಿತ ವ್ಯವಸ್ಥೆ ರೂಪಿಸುತ್ತಿದೆ. ಈ ಉದ್ದೇಶಕ್ಕಾಗಿ ಕೃಷಿ ಮತ್ತು ತೋಟಗಾರಿಕೆ ಕ್ಷೇತ್ರದ 27 ತಂತ್ರಜ್ಞಾನ ಆವಿಷ್ಕಾರಗಳನ್ನು(Start up) ಆಯ್ಕೆ ಮಾಡಲಾಗಿದೆ ಎಂದು ರಾಜ್ಯದ ಮುಖ್ಯ ಕಾರ್ಯದರ್ಶಿ ಶಾಲಿನಿ ರಜನೀಶ್ ತಿಳಿಸಿದ್ದಾರೆ.

ಬೆಂಗಳೂರುನಲ್ಲಿ ನಡೆದ “ಮನಿಕಂಟ್ರೋಲ್ ಸ್ಟಾರ್ಟ್‌ಅಪ್‌” ಸಮಾವೇಶದಲ್ಲಿ ಮಾತನಾಡಿದ ಅವರು, ಕೃಷಿ ಕ್ಷೇತ್ರದಲ್ಲಿ AI ಬಳಕೆಯನ್ನು ವಿಸ್ತರಿಸುವ ನಿಟ್ಟಿನಲ್ಲಿ ರಾಜ್ಯ ಸರ್ಕಾರ ಮುಂದಾಗಿದ್ದು, ಈಗಾಗಲೇ ಅಗ್ರಿಟೆಕ್ ಮಿಷನ್‌ ಅನ್ನು 100 ದಿನಗಳ ಕಾರ್ಯಕ್ರಮದ ಭಾಗವಾಗಿ ಆರಂಭಿಸಲಾಗಿದೆ ಎಂದು ತಿಳಿಸಿದ್ದಾರೆ.

ರೈತನಿಗೆ ಹವಾಮಾನ ಆಧಾರಿತ ಸಲಹೆ :  ಕರ್ನಾಟಕದಲ್ಲಿ ಈಗಾಗಲೇ AI ಆಧಾರಿತ ವ್ಯವಸ್ಥೆಯ ಮೂಲಕ ರೈತರಿಗೆ ವೈಯಕ್ತಿಕ ಬೆಳೆ ಸಲಹೆಗಳನ್ನು ನೀಡಲಾಗುತ್ತಿದೆ. ವಿಶೇಷವಾಗಿ ಮಳೆಯ ಅನಿಶ್ಚಿತತೆ ಇರುವ ಸಂದರ್ಭದಲ್ಲಿ ರೈತನ ಪ್ರದೇಶ ಹಾಗೂ ಬೆಳೆಯ ಪರಿಸ್ಥಿತಿಗೆ ಅನುಗುಣವಾಗಿ ಸಲಹೆಗಳನ್ನು ಕಳುಹಿಸಲಾಗುತ್ತಿದೆ.

ಈ ಸಲಹೆಗಳು ಕನ್ನಡದಲ್ಲಿ ಧ್ವನಿ ಮತ್ತು ದೃಶ್ಯ ರೂಪದಲ್ಲಿಯೂ ರೈತರಿಗೆ ತಲುಪುತ್ತಿವೆ. ಉತ್ತರ ಕರ್ನಾಟಕದ ಕೆಲವು ಪ್ರದೇಶಗಳಲ್ಲಿ ಮುಂದಿನ ವಾರಗಳಲ್ಲಿ ಮಳೆಯ ಕೊರತೆಯಿಂದ ಬೆಳೆ ಉಳಿಯುವ ಸಾಧ್ಯತೆ ಕಡಿಮೆ ಎಂದು AI ಆಧಾರಿತ ಸಲಹೆ ನೀಡಲಾಗಿತ್ತು. ನಂತರ ರೈತರಿಗೆ ಪರ್ಯಾಯ ಬೆಳೆಯ ಬೀಜಗಳನ್ನು ಒದಗಿಸಲಾಗಿದ್ದು, ಕೆಲವರು ರಾಗಿ ಸೇರಿದಂತೆ ಪರ್ಯಾಯ ಬೆಳೆಗಳನ್ನು ಬೆಳೆಸಿ ಯಶಸ್ವಿಯಾಗಿದ್ದಾರೆ ಎಂದು ಮುಖ್ಯ ಕಾರ್ಯದರ್ಶಿ ಉದಾಹರಣೆ ನೀಡಿದ್ದಾರೆ.

ಈಗ ಹೊಲದಿಂದ ಗ್ರಾಹಕನ ಕೈವರೆಗೆ :  ಮುಂದಿನ ಹಂತದಲ್ಲಿ AI ವ್ಯವಸ್ಥೆಯ ವ್ಯಾಪ್ತಿಯನ್ನು ಇನ್ನಷ್ಟು ವಿಸ್ತರಿಸುವ ಉದ್ದೇಶವಿದೆ. ಬಿತ್ತನೆ ಬೀಜದಿಂದ ಆರಂಭಿಸಿ ಬೆಳೆ ಬೆಳೆಯುವ ಹಂತ, ಕೊಯ್ಲು, ಸಂಸ್ಕರಣೆ, ಮಾರುಕಟ್ಟೆ, ಗ್ರಾಹಕ ಅಥವಾ ರಫ್ತು ತಾಣದವರೆಗೆ ಉತ್ಪನ್ನದ ಪ್ರಯಾಣವನ್ನು ದಾಖಲಿಸುವ ವ್ಯವಸ್ಥೆ ರೂಪಿಸಲಾಗುತ್ತಿದೆ.

ಪ್ರಸ್ತುತ ರೈತನ ಹೊಲದಿಂದ ಕೃಷಿ ಉತ್ಪನ್ನ ಹೊರಬಂದ ನಂತರ ಅದು ಯಾವ ಹಂತಗಳನ್ನು ದಾಟುತ್ತದೆ ಎಂಬುದರ ಕುರಿತು ಸರ್ಕಾರಕ್ಕೆ ಸೀಮಿತ ಮಾಹಿತಿ ಇದೆ. ಈ ಕೊರತೆಯನ್ನು ನಿವಾರಿಸುವುದು ಹೊಸ ವ್ಯವಸ್ಥೆಯ ಪ್ರಮುಖ ಉದ್ದೇಶವಾಗಿದೆ.

ರೈತ, ಎಫ್‌ಪಿಒ, ಸ್ಟಾರ್ಟ್‌ಅಪ್‌ಗಳು ಒಂದೇ ವೇದಿಕೆಯಲ್ಲಿ:  ಕೃಷಿ ತಂತ್ರಜ್ಞಾನವನ್ನು ಕೇವಲ ತಂತ್ರಜ್ಞಾನ ಕಂಪನಿಗಳ ವ್ಯಾಪ್ತಿಯಲ್ಲಿ ಇರಿಸದೆ ರೈತರು, ರೈತ ಉತ್ಪಾದಕ ಸಂಸ್ಥೆಗಳು (FPO), ಸ್ಟಾರ್ಟ್‌ಅಪ್‌ಗಳು, ಸಂಸ್ಕರಣಾ ಘಟಕಗಳು ಮತ್ತು ರಫ್ತುದಾರರನ್ನು ಒಂದೇ ವ್ಯವಸ್ಥೆಯೊಂದಿಗೆ ಸಂಪರ್ಕಿಸುವ ಉದ್ದೇಶವನ್ನೂ ಸರ್ಕಾರ ಹೊಂದಿದೆ. ಮುಂಬರುವ ಕೃಷಿ ಮೇಳವು ಈ ಕ್ಷೇತ್ರದ ವಿವಿಧ ಪಾಲುದಾರರು ನೇರವಾಗಿ ಸಂಪರ್ಕ ಸಾಧಿಸಲು ವೇದಿಕೆಯಾಗಲಿದೆ ಎಂದು ತಿಳಿಸಲಾಗಿದೆ.

ರೈತರಿಗೆ ಏನು ಉಪಯೋಗ..? :  AI ಆಧಾರಿತ ಕೃಷಿ ವ್ಯವಸ್ಥೆ ಸರಿಯಾಗಿ ಜಾರಿಯಾದರೆ, ರೈತನಿಗೆ ಹವಾಮಾನ, ಬೆಳೆ ನಿರ್ವಹಣೆ, ಪರ್ಯಾಯ ಬೆಳೆ, ಮಾರುಕಟ್ಟೆ ಸರಪಳಿ ಮತ್ತು ಉತ್ಪನ್ನದ ಸಾಗಣೆ ಕುರಿತ ಹೆಚ್ಚು ಪ್ರದೇಶ-ನಿರ್ದಿಷ್ಟ ಮಾಹಿತಿಯನ್ನು ನೀಡುವ ಸಾಧ್ಯತೆಯಿದೆ.

ಆದರೆ ತಂತ್ರಜ್ಞಾನ ಯಶಸ್ವಿಯಾಗಲು ಕೇವಲ AI ಸಾಕಾಗುವುದಿಲ್ಲ. ಸ್ಥಳೀಯ ಮಟ್ಟದ ನಿಖರ ದತ್ತಾಂಶ, ವಿಶ್ವಾಸಾರ್ಹ ಹವಾಮಾನ ಮಾಹಿತಿ, ಬೆಳೆವಾರು ವೈಜ್ಞಾನಿಕ ಸಲಹೆ, ರೈತರ ಭಾಷೆಯಲ್ಲಿ ಮಾಹಿತಿ ಮತ್ತು ರೈತರಿಗೆ ಸುಲಭವಾಗಿ ಬಳಸಬಹುದಾದ ವ್ಯವಸ್ಥೆ ಅಗತ್ಯವಾಗಲಿದೆ.

ಕರ್ನಾಟಕ ಈಗಾಗಲೇ ಪ್ರದೇಶಾಧಾರಿತ AI ಕೃಷಿ ಸಲಹೆ ವ್ಯವಸ್ಥೆಯತ್ತ ಹೆಜ್ಜೆ ಹಾಕಿದ್ದು, ಮುಂದಿನ ಹಂತದಲ್ಲಿ “ಹೊಲದಿಂದ ತಟ್ಟೆಯವರೆಗೆ” ಕೃಷಿ ಉತ್ಪನ್ನದ ಸಂಪೂರ್ಣ ಪಯಣವನ್ನು ಡಿಜಿಟಲ್‌ ಆಗಿ ದಾಖಲಿಸುವ ಪ್ರಯತ್ನ ಆರಂಭವಾಗುತ್ತಿದೆ.

ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಫಾಲೋಮಾಡಲು ಇಲ್ಲಿ ಕ್ಲಿಕ್‌ ಮಾಡಿ

Karnataka is expanding the use of artificial intelligence in agriculture, with the state working on an AI-based system to track agricultural produce from cultivation to processing and eventually to consumers or export destinations. Chief Secretary Shalini Rajneesh said 27 agri-tech innovations have been shortlisted under the Sampurna Grand Challenge for this purpose. The state is also already using AI-based, personalised crop advisories, including weather-related recommendations delivered to farmers in Kannada through voice and audiovisual formats. The broader objective is to connect farmers, FPOs, startups, processors and exporters while improving visibility across the agricultural value chain