ಅಡಿಕೆ ಬೆಳೆಯುವ ನಾಡಿನಲ್ಲಿ ಮಣ್ಣಿನಲ್ಲಿ ಫಲವತ್ತತೆಯ ಸ್ಥಿತಿ ಹೇಗಿದೆ…? ಅಧ್ಯಯನ ಹೇಳಿದ್ದೇನು..?

ಮಲೆನಾಡು ಪ್ರದೇಶದ ಪ್ರಮುಖ ಅಡಿಕೆ ಬೆಳೆಯುವ ತಾಲೂಕುಗಳಾದ ಕೊಪ್ಪ, ಶೃಂಗೇರಿ ಮತ್ತು ತೀರ್ಥಹಳ್ಳಿಗಳಲ್ಲಿ ನಡೆಸಿದ ಮಣ್ಣು ಸಮೀಕ್ಷಾ ಅಧ್ಯಯನವು ಮಣ್ಣು ಫಲವತ್ತತೆ ಹಾಗೂ ಪೌಷ್ಟಿಕಾಂಶಗಳ ಲಭ್ಯತೆ ಕುರಿತು ಮಹತ್ವದ ಮಾಹಿತಿಯನ್ನು ಬಹಿರಂಗಪಡಿಸಿದೆ. ಅಧ್ಯಯನದಲ್ಲಿ ಸಂಗ್ರಹಿಸಿದ ಮಣ್ಣಿನ ಮಾದರಿಗಳ ವಿಶ್ಲೇಷಣೆಯ ಪ್ರಕಾರ, ಮಣ್ಣಿನ ಸ್ವಭಾವ ಸಡಿಲ ಮರಳು ಮಣ್ಣಿನಿಂದ ಸ್ವಲ್ಪ ಜಿಗುಟು ಮಿಶ್ರಿತ ಮರಳು ಮಣ್ಣಿನವರೆಗೆ ಬದಲಾಗುತ್ತಿದೆ.

ಮಾದರಿಗಳಲ್ಲಿನ pH ಮೌಲ್ಯವು ಸ್ವಲ್ಪ ಆಮ್ಲೀಯದಿಂದ ಹಿಡಿದು ಅತ್ಯಂತ ತೀವ್ರ ಆಮ್ಲೀಯ ಮಟ್ಟದವರೆಗೆ ಬದಲಾಗಿದ್ದು, ಮೂರು ತಾಲೂಕಿನ ಎಲ್ಲಾ ಮಾದರಿಗಳಲ್ಲಿಯೂ ಮಣ್ಣಿನಲ್ಲಿ ಉಪ್ಪಿನ ಅಂಶ ಕಡಿಮೆಯಿರುವುದು ಕಂಡುಬಂದಿದೆ, ಇದು ಅಡಿಕೆ ಬೆಳೆಗೆ ಉತ್ತಮ ಎಂದು ಅಧ್ಯಯನ ತಿಳಿಸಿದೆ. ಈ ಆಮ್ಲೀಯತೆ ಅಡಿಕೆ ಬೆಳೆ ಉತ್ಪಾದಕತೆ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ. ಹಳ್ಳಿಯ ಮಣ್ಣಿನಲ್ಲಿ ಜೈವಿಕ ಕಾರ್ಬನ್ ಮಟ್ಟಗಳು ಮಧ್ಯಮವಾಗಿದೆ , ಇದು ಮಣ್ಣಿನ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಮಣ್ಣಿನ ವಿನಿಮಯಯೋಗ್ಯ ಆಧಾರಗಳಲ್ಲಿ ಕ್ಯಾಲ್ಸಿಯಂ ಹಾಗೂ ಮ್ಯಾಗ್ನೇಶಿಯಂ ಪ್ರಮುಖ ಕ್ಯಾಟಿಯನ್‌ಗಳಾಗಿ ಕಂಡುಬಂದಿದ್ದು, ನಂತರ ಸೋಡಿಯಂ ಹಾಗೂ ಪೊಟ್ಯಾಸಿಯಂ ಸ್ಥಾನ ಪಡೆದಿವೆ. ಇದರ ಪರಿಣಾಮವಾಗಿ ಮೇಲ್ಮಟ್ಟದ ಮಣ್ಣುಗಳು ಕಡಿಮೆ CEC ಇದೆ. ಅಂದರೆ ಮಣ್ಣು ಪೌಷ್ಟಿಕಾಂಶಗಳನ್ನು ಹಿಡಿದುಕೊಳ್ಳುವ ಸಾಮರ್ಥ್ಯ ಕಡಿಮೆ  ಹೊಂದಿರುವುದಾಗಿ ಅಧ್ಯಯನ ತಿಳಿಸಿದೆ.

ಮೂರು ತಾಲೂಕಿನಲ್ಲಿಯೂ ಮಣ್ಣಿನ ಆಳ ಹೆಚ್ಚಾದಂತೆ CEC (ಮಣ್ಣು ಪೌಷ್ಟಿಕಾಂಶಗಳನ್ನು ಹಿಡಿದುಕೊಳ್ಳುವ ಸಾಮರ್ಥ್ಯ) ಈ ಪ್ರದೇಶದ ಮೇಲ್ಮಣ್ಣುಗಳಲ್ಲಿ  ಕಡಿಮೆ ಕಂಡುಬಂದಿದೆ. ಆದರೆ ತಾಲೂಕುಗಳ ನಡುವೆ CEC ಮೌಲ್ಯ ವ್ಯಾಪ್ತಿಯಲ್ಲಿ ವ್ಯತ್ಯಾಸ ಕಂಡುಬಂದಿದ್ದು, ಇದು ಮಣ್ಣಿನಲ್ಲಿ ಬೆಳೆಗಳಿಗೆ ಲವಣಗಳ  ಹಾಗೂ ಸಾವಯವ ದ್ರವ್ಯದ ಪ್ರಮಾಣ ವ್ಯತ್ಯಾಸಕ್ಕೆ ಸಂಬಂಧಿಸಿದೆ ಎನ್ನಲಾಗಿದೆ.

NPK ಪೌಷ್ಟಿಕಾಂಶ ಮಧ್ಯಮ ಮಟ್ಟದಲ್ಲಿರುವುದು ಬೆಳಕಿಗೆ ಬಂದಿದೆ. ಇಲ್ಲಿನ ಮಾದರಿಗಳ ವಿಶ್ಲೇಷಣೆಯಲ್ಲಿ ಪ್ರಾಥಮಿಕ ಪೌಷ್ಟಿಕಾಂಶಗಳಾದ ನೈಟ್ರೋಜನ್ (N), ಫಾಸ್ಫರಸ್ (P), ಪೊಟ್ಯಾಸಿಯಂ (K) ಲಭ್ಯತೆ ಮಧ್ಯಮ ಮಟ್ಟದಲ್ಲಿ ಇರುವುದಾಗಿ ತಿಳಿದುಬಂದಿದೆ. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ

ಅಧ್ಯಯನದ ಫಲಿತಾಂಶಗಳ ಪ್ರಕಾರ, ಈ ಮೂರು ತಾಲ್ಲೂಕುಗಳಲ್ಲಿ ಸಾರಜನಕ, ರಂಜಕ ಮತ್ತು ಪೊಟ್ಯಾಸಿಯಮ್ (NPK) ಲಭ್ಯತೆಯು ವಿಭಿನ್ನ ಮಟ್ಟದಲ್ಲಿ ಕಂಡುಬಂದಿದೆ. ಸಾರಜನಕದ (Nitrogen) ವಿಷಯಕ್ಕೆ ಬಂದರೆ, ತೀರ್ಥಹಳ್ಳಿ ತಾಲ್ಲೂಕಿನ ಶೇಕಡಾ 90 ರಷ್ಟು ಮಾದರಿಗಳು ಮಧ್ಯಮ ಮಟ್ಟದಲ್ಲಿದ್ದರೆ, ಕೊಪ್ಪದಲ್ಲಿ ಶೇಕಡಾ 56.67 ರಷ್ಟು ಮಧ್ಯಮ ಮಟ್ಟದಲ್ಲಿ ಮತ್ತು ಶೃಂಗೇರಿಯಲ್ಲಿ ಶೇಕಡಾ 46.67 ರಷ್ಟು ಮಾದರಿಗಳು ಮಧ್ಯಮದಿಂದ ಹೆಚ್ಚಿನ ಮಟ್ಟದಲ್ಲಿವೆ. ರಂಜಕದ (Phosphorus) ಲಭ್ಯತೆಯಲ್ಲಿ ಹೆಚ್ಚಿನ ವ್ಯತ್ಯಾಸವಿದ್ದು, ಕೊಪ್ಪ (60%) ಮತ್ತು ತೀರ್ಥಹಳ್ಳಿ (56.67%) ತಾಲ್ಲೂಕುಗಳ ಹೆಚ್ಚಿನ ಮಣ್ಣಿನ ಮಾದರಿಗಳು ಕಡಿಮೆ ಮಟ್ಟದಲ್ಲಿವೆ; ಆದರೆ ಶೃಂಗೇರಿಯಲ್ಲಿ ಶೇಕಡಾ 56.67 ರಷ್ಟು ಮಾದರಿಗಳು ಮಧ್ಯಮ ಮಟ್ಟದಲ್ಲಿವೆ. ಇನ್ನು ಪೊಟ್ಯಾಸಿಯಮ್ (Potassium) ವಿಚಾರದಲ್ಲಿ ಮೂರೂ ತಾಲ್ಲೂಕುಗಳ ಬಹುತೇಕ ಮಣ್ಣಿನ ಮಾದರಿಗಳು ಮಧ್ಯಮದಿಂದ ಹೆಚ್ಚಿನ ಲಭ್ಯತೆಯನ್ನು ಪ್ರದರ್ಶಿಸಿವೆ. ಈ ಅಂಕಿಅಂಶಗಳು ಆಯಾ ಪ್ರದೇಶದ ಮಣ್ಣಿನ ಗುಣಲಕ್ಷಣಗಳಿಗೆ ಅನುಗುಣವಾಗಿ ಸಮರ್ಪಕ ಗೊಬ್ಬರ ನಿರ್ವಹಣೆಯ ಅಗತ್ಯತೆಯನ್ನು ಒತ್ತಿಹೇಳುತ್ತವೆ.

2022 ರಲ್ಲಿ ಮಲೆನಾಡು ಪ್ರದೇಶದ  ತಾಲೂಕುಗಳಾದ ಕೊಪ್ಪ, ಶೃಂಗೇರಿ ಮತ್ತು ತೀರ್ಥಹಳ್ಳಿಯ ಅಡಿಕೆ ತೋಟಗಳಲ್ಲಿ ಈ ಸಮೀಕ್ಷೆಯನ್ನು ನಡೆಸಲಾಯಿತು. ಮಣ್ಣಿನ ಮಾದರಿಗಳನ್ನು ಮೇಲ್ಮೈ (0-30 ಸೆಂ.ಮೀ) ಮತ್ತು ಭೂಮಿಯ ಆಳದಲ್ಲಿ (30-60 ಸೆಂ.ಮೀ) ಸಂಗ್ರಹಿಸಲಾಯಿತು ಮತ್ತು ರಾಸಾಯನಿಕ ಗುಣಲಕ್ಷಣಗಳು ಮತ್ತು ಲಭ್ಯವಿರುವ ಪೋಷಕಾಂಶಗಳಿಗಾಗಿ ಈ ಅಧ್ಯಯನ ಮಾಡಲಾಗಿತ್ತು. ಮೇಲ್ಮೈ ಮಾದರಿಗಳಲ್ಲಿ ಆಮ್ಲೀಯತೆ ಹೆಚ್ಚಿರುವುದು ಕಂಡುಬಂದರೆ, ಆಳದಲ್ಲೂ ಈ ಸ್ಥಿತಿಗೆ ಬರುತ್ತಿರುವುದು ಕಂಡುಬಂದಿದೆ ಎಂದು ಈ ವರದಿ ಎಚ್ಚರಿಸಿದೆ. ಈ ಅಧ್ಯಯನವು ಮಣ್ಣಿನಲ್ಲಿರುವ ಪೋಷಕಾಂಶಗಳ ಅಸಮತೋಲನ ಮತ್ತು ಪೋಷಕಾಂಶಗಳು ಮಳೆಯಿಂದಾಗಿ ತೊಳೆದು ಹೋಗುವ (Leaching) ಸಮಸ್ಯೆಗಳನ್ನು ಎತ್ತಿ ತೋರಿಸುತ್ತದೆ.

ಸೂಚಿಸಲಾದ ಕ್ರಮಗಳು:

• ಸುಣ್ಣದ ಬಳಕೆ: ಮಣ್ಣಿನ ಅತಿಯಾದ ಆಮ್ಲೀಯತೆಯನ್ನು ಕಡಿಮೆ ಮಾಡಲು ಮತ್ತು ಪೋಷಕಾಂಶಗಳನ್ನು ಗಿಡಗಳು ಹೀರಿಕೊಳ್ಳುವಂತೆ ಮಾಡಲು ಸುಣ್ಣ ಅಥವಾ ಡೋಲಮೈಟ್ ಬಳಕೆ ಅಗತ್ಯ.
• ನಿರ್ದಿಷ್ಟ ಗೊಬ್ಬರ ಬಳಕೆ: ಎಲ್ಲ ಕಡೆ ಒಂದೇ ರೀತಿ ಗೊಬ್ಬರ ಹಾಕುವ ಬದಲು, ಮಣ್ಣಿನ ಪರೀಕ್ಷೆಯ ವರದಿಗೆ ಅನುಗುಣವಾಗಿ ರಂಜಕದಂತಹ ಪೋಷಕಾಂಶಗಳ ಪ್ರಮಾಣವನ್ನು ಹೊಂದಿಸಬೇಕು.
• ಸಾವಯವ ಗೊಬ್ಬರ: ಮಣ್ಣಿನ ಪೋಷಕಾಂಶ ಹಿಡಿದಿಟ್ಟುಕೊಳ್ಳುವ ಸಾಮರ್ಥ್ಯವನ್ನು ಹೆಚ್ಚಿಸಲು ಹೆಚ್ಚಿನ ಪ್ರಮಾಣದಲ್ಲಿ ಸಾವಯವ ಗೊಬ್ಬರ ಬಳಸಬೇಕು.

ಮಲೆನಾಡು ಪ್ರದೇಶದ ಅಡಿಕೆ ಬೆಳೆಯುವ ಪ್ರದೇಶಗಳಲ್ಲಿ ಮಣ್ಣಿನ ಫಲವತ್ತತೆಯ ಕುರಿತು ಸಮಗ್ರ ಡೇಟಾವನ್ನು ಒದಗಿಸುವುದರಿಂದ, ದೀರ್ಘಕಾಲಿಕ ಬೆಳೆ ಉತ್ಪಾದಕತೆಯ ಮೇಲೆ ಪ್ರಭಾವ ಬೀರುವ ಅಧಿಕ ಮಳೆ, ಆಮ್ಲೀಯ ಮಣ್ಣಿನಲ್ಲಿನ ಪೋಷಕಾಂಶಗಳ ಚಲನಶೀಲತೆ ಹಾಗೂ ರೋಗ ಬಾಧೆಗಳನ್ನು ಅರ್ಥಮಾಡಿಕೊಳ್ಳುವಲ್ಲಿ  ವೈಜ್ಞಾನಿಕ ಸಮುದಾಯಕ್ಕೆ ಮಹತ್ವದ್ದಾಗಿದೆ. ಮಲೆನಾಡಿನ ಹವಾಮಾನಕ್ಕೆ ತಕ್ಕಂತೆ ಇಂತಹ ವೈಜ್ಞಾನಿಕ ಕ್ರಮಗಳನ್ನು ಕೈಗೊಳ್ಳುವುದರಿಂದ ಅಡಿಕೆ ಇಳುವರಿಯನ್ನು ಹೆಚ್ಚಿಸುವುದಲ್ಲದೆ, ದೀರ್ಘಕಾಲದವರೆಗೆ ಮಣ್ಣಿನ ಫಲವತ್ತತೆಯನ್ನು ಕಾಪಾಡಿಕೊಳ್ಳಬಹುದು.

ಈ ಅಧ್ಯಯನ ವರದಿಯು ‌International Journal of Plant & Soil Science ನಲ್ಲಿ ಪ್ರಕಟವಾಗಿದ್ದು ಶಿವಮೊಗ್ಗ ಕೃಷಿವಿಶ್ವವಿದ್ಯಾನಿಲಯದ ತಂಡದ ರೇಷ್ಮಾ ,ಸರ್ವಜ್ಞ.ಬಿ.ಸಾಲಿಮಠ್ ,ಧನಂಜಯ , ತಿಪ್ಪೇಶಪ್ಪ , ರವಿಕುಮಾರ್ ಎಂ.ಇ ಮತ್ತು ರಾಘವೇಂದ್ರ ಎಸ್. ಅಧ್ಯಯನ ಮಾಡಿದ್ದಾರೆ. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ