ಅಂಗಾಂಶ ಕೃಷಿ ಅಡಿಕೆ ಗಿಡಗಳ ಹಾರ್ಡನಿಂಗ್‌ಗೆ ನೂತನ ವಿಧಾನ – ಸಿಪಿಸಿಆರ್‌ಐಗೆ ಪೇಟೆಂಟ್

ಅಂಗಾಂಶ ಕೃಷಿ (ಟಿಶ್ಯೂ ಕಲ್ಚರ್) ಮೂಲಕ ಉತ್ಪಾದಿಸಿದ ಅಡಿಕೆ ಗಿಡಗಳ ಬದುಕುಳಿಯುವಿಕೆ ಮತ್ತು ಬೆಳವಣಿಗೆಯನ್ನು ಹೆಚ್ಚಿಸುವ ನೂತನ ಹಾರ್ಡನಿಂಗ್ ವಿಧಾನಕ್ಕೆ ಕಾಸರಗೋಡಿನ ಐಸಿಎಆರ್‌–ಕೇಂದ್ರೀಯ ತೋಟಗಾರಿಕಾ ಬೆಳೆಗಳ ಸಂಶೋಧನಾ ಸಂಸ್ಥೆ (ಸಿಪಿಸಿಆರ್‌ಐ) ಪೇಟೆಂಟ್ ಪಡೆದುಕೊಂಡಿದೆ. ಮಾರ್ಪಡಿಸಿದ ಹೈಡ್ರೋಪೋನಿಕ್ಸ್ ಪದ್ಧತಿಯನ್ನು ಬಳಸಿಕೊಂಡು ಅಭಿವೃದ್ಧಿಪಡಿಸಿರುವ ಈ ತಂತ್ರಜ್ಞಾನವು ಅಡಿಕೆ ಅಂಗಾಂಶ ಕೃಷಿಯಲ್ಲಿನ ಪ್ರಮುಖ ತಾಂತ್ರಿಕ ಸವಾಲಿಗೆ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ.

2026 ರ ಅಕ್ಟೋಬರ್ 29 ರಂದು ಈ ಪೇಟೆಂಟ್ ಅಧಿಕೃತವಾಗಿ ಲಭಿಸಿದೆ. ಡಾ. ಕೆ.ಬಿ. ಹೆಬ್ಬಾರ್ ಅವರ ನೇತೃತ್ವದಲ್ಲಿ ನಡೆದ ಸಂಶೋಧನೆಯಲ್ಲಿ ಡಾ. ಕೆ.ಎಸ್. ಮುರಳೀಕೃಷ್ಣ, ಡಾ. ಎಸ್. ಪೌಲ್‌ರಾಜ್, ಡಾ. ಎಂ.ಕೆ. ರಾಜೇಶ್ ಹಾಗೂ ಡಾ. ವಿ. ನಿರಾಳ್ ಅವರು ಭಾಗವಹಿಸಿದ್ದರು.

ಬಾಳೆ, ದಾಳಿಂಬೆ ಹಾಗೂ ಆರ್ಕಿಡ್‌ಗಳಂತಹ ತೋಟಗಾರಿಕಾ ಬೆಳೆಗಳಲ್ಲಿ ಅಂಗಾಂಶ ಕೃಷಿ ವಾಣಿಜ್ಯಿಕವಾಗಿ ಯಶಸ್ಸು ಕಂಡಿದೆ. ಆದರೆ, ತಾಳೆ ಜಾತಿಯ ಬೆಳೆಗಳಲ್ಲಿ ಅಂಗಾಂಶ ಕೃಷಿ ತಂತ್ರಜ್ಞಾನವನ್ನು ಪರಿಣಾಮಕಾರಿಯಾಗಿ ಅನುಷ್ಠಾನಗೊಳಿಸುವುದು ವಿಜ್ಞಾನಿಗಳಿಗೆ ದೀರ್ಘಕಾಲದಿಂದ ಸವಾಲಾಗಿ ಉಳಿದಿದೆ.

ಸಿಪಿಸಿಆರ್‌ಐ ಹಲವು ವರ್ಷಗಳ ಹಿಂದೆಯೇ ಅಡಿಕೆಯಲ್ಲಿ ಅಂಗಾಂಶ ಕೃಷಿಯ ಮೂಲ ವಿಧಾನವನ್ನು ಅಭಿವೃದ್ಧಿಪಡಿಸಿತ್ತು. ಆದರೆ, ಪ್ರಯೋಗಾಲಯದಲ್ಲಿ ಬೆಳೆಸಿದ ಸಸಿಗಳನ್ನು ಹೊರಗಿನ ವಾತಾವರಣಕ್ಕೆ ಒಗ್ಗಿಸುವ ಹಂತದಲ್ಲಿ ಬೇರಿನ ಬೆಳವಣಿಗೆ ಮತ್ತು ಗಿಡಗಳ ಬದುಕುಳಿಯುವಿಕೆಯ ಪ್ರಮಾಣ ನಿರೀಕ್ಷಿತ ಮಟ್ಟದಲ್ಲಿ ಇರಲಿಲ್ಲ. ಇದರಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಗುಣಮಟ್ಟದ ಅಂಗಾಂಶ ಕೃಷಿ ಅಡಿಕೆ ಗಿಡಗಳನ್ನು ಉತ್ಪಾದಿಸುವುದಕ್ಕೆ ತೊಡಕಾಗಿತ್ತು.

ನೂತನ ಹಾರ್ಡನಿಂಗ್ ವಿಧಾನ : ಪ್ರಯೋಗಾಲಯದಲ್ಲಿ ಬೆಳೆಸಿದ ಸಸಿಗಳನ್ನು ಜಮೀನಿನಲ್ಲಿ ನಾಟಿ ಮಾಡುವ ಮೊದಲು ಹಸಿರುಮನೆ ಅಥವಾ ಹೊರಾಂಗಣದ ವಾತಾವರಣಕ್ಕೆ ಹಂತಹಂತವಾಗಿ ಒಗ್ಗಿಸುವ ಪ್ರಕ್ರಿಯೆಯನ್ನು ಹಾರ್ಡನಿಂಗ್ ಎಂದು ಕರೆಯಲಾಗುತ್ತದೆ.

ಈ ಹಂತದಲ್ಲಿನ ಸಮಸ್ಯೆಗಳನ್ನು ನಿವಾರಿಸಲು ಡಾ. ಹೆಬ್ಬಾರ್ ನೇತೃತ್ವದ ತಂಡವು ಮಾರ್ಪಡಿಸಿದ ಹೈಡ್ರೋಪೋನಿಕ್ಸ್ ವ್ಯವಸ್ಥೆಯನ್ನು ಸಂಯೋಜಿಸಿದೆ. ಈ ವಿಧಾನವು ಸಸಿಗಳ ಬೇರುಗಳ ಬೆಳವಣಿಗೆ ಹಾಗೂ ಒಟ್ಟಾರೆ ಗಿಡದ ಬೆಳವಣಿಗೆಯನ್ನು ಉತ್ತಮಪಡಿಸಲು ನೆರವಾಗಿದೆ. ಪರಿಣಾಮವಾಗಿ ಪ್ರಯೋಗಾಲಯದಿಂದ ಮಣ್ಣಿಗೆ ಸ್ಥಳಾಂತರಿಸುವಾಗ ಸಸಿಗಳು ಬದುಕುಳಿಯುವ ಮತ್ತು ಯಶಸ್ವಿಯಾಗಿ ಬೆಳೆಯುವ ಪ್ರಮಾಣದಲ್ಲಿ ಗಮನಾರ್ಹ ಸುಧಾರಣೆ ಕಂಡುಬಂದಿದೆ.

ಅಡಿಕೆ ಕೃಷಿಗೆ ಹೊಸ ಸಾಧ್ಯತೆ:  ಅಡಿಕೆಯು ಪರಕೀಯ ಪರಾಗಸ್ಪರ್ಶ ಹೊಂದಿರುವ ಬೆಳೆಯಾಗಿರುವುದರಿಂದ, ಸಾಂಪ್ರದಾಯಿಕ ಬೀಜೋತ್ಪಾದನೆಯ ಮೂಲಕ ಮಾತೃಗಿಡದ ಎಲ್ಲ ಗುಣಲಕ್ಷಣಗಳನ್ನು ಹೊಂದಿರುವ (ಟ್ರೂ-ಟು-ಟೈಪ್) ಸಸಿಗಳನ್ನು ಉತ್ಪಾದಿಸುವುದು ಕಷ್ಟಸಾಧ್ಯ.

ಈ ಹಿನ್ನೆಲೆಯಲ್ಲಿ ಹೊಸ ತಂತ್ರಜ್ಞಾನವು ಅಡಿಕೆ ಕೃಷಿಗೆ ಮಹತ್ವದ ಅವಕಾಶಗಳನ್ನು ತೆರೆದಿಡುವ ನಿರೀಕ್ಷೆಯಿದೆ. ಗಿಡ್ಡ ತಳಿ, ರೋಗನಿರೋಧಕ ಶಕ್ತಿ ಹಾಗೂ ಇತರ ವಿಶೇಷ ಗುಣಲಕ್ಷಣಗಳನ್ನು ಹೊಂದಿರುವ ಅಡಿಕೆ ಮರಗಳನ್ನು ಅಂಗಾಂಶ ಕೃಷಿಯ ಮೂಲಕ ವೃದ್ಧಿಸಲು ಇದು ನೆರವಾಗಬಹುದು.

ಅಲ್ಲದೆ, ಹೆಚ್ಚಿನ ಏಕರೂಪತೆಯ ವಾಣಿಜ್ಯ ಹೈಬ್ರಿಡ್ ತಳಿಗಳ ಅಭಿವೃದ್ಧಿಗೆ ಅಗತ್ಯವಿರುವ ಗಿಡ್ಡ ಮತ್ತು ಎತ್ತರದ ತಳಿಗಳ ಮಾತೃವೃಕ್ಷಗಳ ತಾಕುಗಳನ್ನು (ಮದರ್ ಬ್ಲಾಕ್ಸ್) ನಿರ್ಮಿಸಲು ಸಂಶೋಧಕರು ಹಾಗೂ ನರ್ಸರಿಗಳಿಗೆ ಈ ತಂತ್ರಜ್ಞಾನ ಉಪಯುಕ್ತವಾಗಲಿದೆ.

ವಿಟ್ಲದಲ್ಲಿ ಕ್ಷೇತ್ರ ಪ್ರಯೋಗ ಆರಂಭ :  ಈ ತಂತ್ರಜ್ಞಾನದ ಪ್ರಾಯೋಗಿಕ ಸಾಮರ್ಥ್ಯವನ್ನು ಪರಿಶೀಲಿಸುವ ನಿಟ್ಟಿನಲ್ಲಿ ಸಿಪಿಸಿಆರ್‌ಐ ಈಗಾಗಲೇ ಕ್ಷೇತ್ರ ಪ್ರಯೋಗಗಳನ್ನು ಆರಂಭಿಸಿದೆ. ಹಳದಿ ಎಲೆ ರೋಗ (YLD) ಬಾಧಿತ ಪ್ರದೇಶಗಳಲ್ಲಿ ಗುರುತಿಸಲಾದ ರೋಗಮುಕ್ತ ಅಡಿಕೆ ಮರಗಳು ಹಾಗೂ ಗಿಡ್ಡ ಹೈಬ್ರಿಡ್ ತಳಿಗಳ ಸಸಿಗಳ ವೃದ್ಧಿಗೆ ಈ ವಿಧಾನವನ್ನು ಬಳಸಲಾಗುತ್ತಿದೆ.

‘ವಿಟಿಎಲ್‌ಎಎಚ್-2’ (VTLAH-2) ಎಂಬ ಗಿಡ್ಡ ಹೈಬ್ರಿಡ್ ತಳಿಯ ಅಂಗಾಂಶ ಕೃಷಿ ಸಸಿಗಳನ್ನು ವಿಟ್ಲದಲ್ಲಿರುವ ಸಿಪಿಸಿಆರ್‌ಐ ಆವರಣದಲ್ಲಿ ಪ್ರಾಯೋಗಿಕವಾಗಿ ನಾಟಿ ಮಾಡಲಾಗಿದೆ ಎಂದು ಸಂಸ್ಥೆಯ ನಿರ್ದೇಶಕರು ವಿಟ್ಲದಲ್ಲಿ ಅಕ್ಟೋಬರ್ 26ರಂದು ನಡೆದ ಕಾರ್ಯಕ್ರಮದಲ್ಲಿ ಮಾಹಿತಿ ನೀಡಿದ್ದಾರೆ.

ಅಡಿಕೆ ಅಂಗಾಂಶ ಕೃಷಿಯ ತಾಂತ್ರಿಕ ಸವಾಲುಗಳನ್ನು ನಿವಾರಿಸುವಲ್ಲಿ ಈ ಆವಿಷ್ಕಾರ ಮಹತ್ವದ ಹೆಜ್ಜೆಯಾಗಿದ್ದು, ಮುಂದಿನ ದಿನಗಳಲ್ಲಿ ಗುಣಮಟ್ಟದ ಅಡಿಕೆ ಸಸಿಗಳ ಉತ್ಪಾದನೆ, ಸುಧಾರಿತ ತಳಿಗಳ ಅಭಿವೃದ್ಧಿ ಹಾಗೂ ನರ್ಸರಿ ವಲಯದ ಬೆಳವಣಿಗೆಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುವ ನಿರೀಕ್ಷೆಯಿದೆ.

ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಫಾಲೋಮಾಡಲು ಇಲ್ಲಿ ಕ್ಲಿಕ್‌ ಮಾಡಿ

ICAR-Central Plantation Crops Research Institute (CPCRI), Kasaragod, has secured a patent on October 29, 2026, for an innovative hardening technique for tissue-cultured arecanut plants using a modified hydroponics system. Developed by a research team led by Dr. K.B. Hebbar, the technology improves root development, overall plant growth and survival during transplantation from laboratory conditions to the field. The innovation could support the production of uniform, true-to-type arecanut planting materials, including dwarf and disease-resistant varieties. Field trials of the dwarf hybrid VTLAH-2 have already begun at CPCRI’s Vittal campus.