ಬಿಳಿ ಅಕ್ಕಿ ತಿನ್ನುವುದರಿಂದ ದಪ್ಪ ಆಗುತ್ತದೆಯೇ..? ಆಹಾರ ವಿಜ್ಞಾನ ಏನು ಹೇಳುತ್ತದೆ..?

ಭಾರತೀಯ ಆಹಾರ ಪದ್ಧತಿಯಲ್ಲಿ ಬಿಳಿ ಅಕ್ಕಿ ಶತಮಾನಗಳಿಂದ ಪ್ರಮುಖ ಸ್ಥಾನ ಹೊಂದಿದೆ. ಆದರೆ ಇತ್ತೀಚಿನ ದಿನಗಳಲ್ಲಿ ಬಿಳಿ ಅಕ್ಕಿ ತೂಕ ಹೆಚ್ಚಿಸುವ ಆಹಾರವೇ ಎಂಬ ಪ್ರಶ್ನೆ ಸಾರ್ವಜನಿಕ ಚರ್ಚೆಯ ಕೇಂದ್ರಬಿಂದುವಾಗಿದೆ. ಈ ಕುರಿತು ಆಹಾರ ತಜ್ಞರು ಮಹತ್ವದ ಸ್ಪಷ್ಟನೆ ನೀಡಿದ್ದಾರೆ.

ಗುರ್ಗಾಂವ್‌ನ ಮರೆಂಗೋ ಏಷ್ಯಾ ಆಸ್ಪತ್ರೆಯ ಆಹಾರ ತಜ್ಞೆ ಡಾ.ಪರ್ಮೀತ್‌ ಕೌರ್‌ ಅವರ ಪ್ರಕಾರ, “ಯಾವುದೇ ಒಂದು ಆಹಾರವನ್ನು ಮಾತ್ರ ತೂಕ ಹೆಚ್ಚಿಸುವುದಕ್ಕೆ ಹೊಣೆ ಮಾಡುವುದು ಸರಿಯಲ್ಲ.” ದೇಹಕ್ಕೆ ಅಗತ್ಯಕ್ಕಿಂತ ಹೆಚ್ಚು ಕ್ಯಾಲೊರಿಗಳನ್ನು ನಿರಂತರವಾಗಿ ಸೇವಿಸಿದಾಗ ತೂಕ ಹೆಚ್ಚಾಗುತ್ತದೆ. ಒಂದೇ ಒಂದು ಆಹಾರವೇ ಇದಕ್ಕೆ ಕಾರಣವಾಗುವುದಿಲ್ಲ ಎಂದು ಅವರು ಹೇಳಿದ್ದಾರೆ.

ಕಂದು ಅಕ್ಕಿಗೆ ಹೋಲಿಸಿದರೆ ಬಿಳಿ ಅಕ್ಕಿಯಲ್ಲಿ ಕ್ಯಾಲೊರಿಗಳು ಮತ್ತು ಸಂಸ್ಕರಿತ ಕಾರ್ಬೋಹೈಡ್ರೇಟ್‌ಗಳ ಪ್ರಮಾಣ ಸ್ವಲ್ಪ ಹೆಚ್ಚಿರುತ್ತದೆ. ಇದರಿಂದ ಬಿಳಿ ಅಕ್ಕಿ ವೇಗವಾಗಿ ಜೀರ್ಣವಾಗಿ, ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ತ್ವರಿತವಾಗಿ ಹೆಚ್ಚಿಸಬಹುದು. ವಿಶೇಷವಾಗಿ ದೊಡ್ಡ ಪ್ರಮಾಣದಲ್ಲಿ ಅಥವಾ ಹೆಚ್ಚು ಕೊಬ್ಬಿನ ಗ್ರೇವಿಗಳೊಂದಿಗೆ ಸೇವಿಸಿದರೆ ತೂಕ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ ಎಂದು ಡಿಟಿ ಕೌರ್ ವಿವರಿಸಿದ್ದಾರೆ.

ಆದರೆ ಬಿಳಿ ಅಕ್ಕಿಯನ್ನು ಸಂಪೂರ್ಣವಾಗಿ ತ್ಯಜಿಸಬೇಕೆಂಬ ಅಭಿಪ್ರಾಯವನ್ನು ಅವರು ತಳ್ಳಿಹಾಕಿದ್ದಾರೆ. ಭಾರತೀಯ ಆಹಾರ ಸಂಸ್ಕೃತಿಯಲ್ಲಿ ಬಿಳಿ ಅಕ್ಕಿಗೆ ಸಾಂಸ್ಕೃತಿಕ ಹಾಗೂ ಪ್ರಾದೇಶಿಕ ಮಹತ್ವವಿದೆ. ಜೊತೆಗೆ, ಹಲವರಿಗೆ ಇದು ಸುಲಭವಾಗಿ ಜೀರ್ಣವಾಗುವ ಆಹಾರವೂ ಹೌದು. ನಾರಿನಾಂಶ ಹೆಚ್ಚಿರುವ ಕಂದು ಅಕ್ಕಿ ತೂಕ ನಿಯಂತ್ರಣಕ್ಕೆ ಹೆಚ್ಚು ಸಹಕಾರಿ, ಏಕೆಂದರೆ ಅದು ಹೆಚ್ಚು ಸಮಯ ಹೊಟ್ಟೆ ತುಂಬಿರುವ ಭಾವನೆ ನೀಡುತ್ತದೆ.

ಬಿಳಿ ಅಕ್ಕಿ ಸೇವಿಸುವವರು ಪ್ರಮಾಣದ ಬಗ್ಗೆ ಎಚ್ಚರ ವಹಿಸಬೇಕು ಎಂದು ತಜ್ಞರು ಸಲಹೆ ನೀಡುತ್ತಾರೆ. ಬೇಯಿಸಿದ ಅನ್ನವನ್ನು ತಣ್ಣಗಾಗಿಸಿ ನಂತರ ಮತ್ತೆ ಬಿಸಿ ಮಾಡಿದರೆ ‘ನಿರೋಧಕ ಪಿಷ್ಟ’ ಪ್ರಮಾಣ ಹೆಚ್ಚಾಗುತ್ತದೆ. ಇದರಿಂದ ರಕ್ತದಲ್ಲಿನ ಸಕ್ಕರೆಯ ಏರಿಕೆ ಕಡಿಮೆಯಾಗಲು ಸಹಾಯವಾಗುತ್ತದೆ ಎಂಬುದನ್ನು ಇತ್ತೀಚಿನ ಪೌಷ್ಟಿಕಾಂಶ ಅಧ್ಯಯನಗಳು ಸೂಚಿಸುತ್ತವೆ.

ತೂಕ ಹೆಚ್ಚಳಕ್ಕೆ ಒಂದೇ ಆಹಾರ ಕಾರಣವಲ್ಲ. ಒಟ್ಟಾರೆ ಆಹಾರದ ಪ್ರಮಾಣ, ಕ್ಯಾಲೊರಿ ಸಮತೋಲನ, ಜೊತೆಯ ಪದಾರ್ಥಗಳು ಮತ್ತು ಜೀವನಶೈಲಿ ತೂಕದ ಮೇಲೆ ಪರಿಣಾಮ ಬೀರುತ್ತವೆ. ಮಿತವಾಗಿ ಸೇವಿಸಿದರೆ ಬಿಳಿ ಅಕ್ಕಿಯೂ ಸಮತೋಲನಿತ ಭಾರತೀಯ ಆಹಾರಕ್ರಮದ ಭಾಗವಾಗಿಯೇ ಇರಬಹುದು.