ಭಾರತದಿಂದ ನೇಪಾಳಕ್ಕೆ ರಫ್ತಾಗುವ ಮಾವಿನ ಹಣ್ಣಿನ ಆಮದಿಗೆ ನೇಪಾಳ ಸರ್ಕಾರ ನಿಷೇಧ ಅಥವಾ ಅಮಾನತು ವಿಧಿಸಿದೆ ಎಂಬ ಕೆಲವು ಮಾಧ್ಯಮ ವರದಿಗಳನ್ನು ಕೇಂದ್ರ ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯ ಸ್ಪಷ್ಟವಾಗಿ ತಳ್ಳಿಹಾಕಿದೆ.
ಈ ಕುರಿತು ಪ್ರಕಟಣೆ ನೀಡಿರುವ ಸಚಿವಾಲಯ, ಭಾರತೀಯ ಮಾವಿನ ಹಣ್ಣಿನ ಆಮದಿಗೆ ನೇಪಾಳ ನಿಷೇಧ ಹೇರಿದೆ ಎಂಬ ವರದಿಗಳು ವಾಸ್ತವಿಕತೆಯಿಂದ ದೂರವಾಗಿದ್ದು, ಜನರನ್ನು ದಾರಿತಪ್ಪಿಸುವಂತಿವೆ ಎಂದು ತಿಳಿಸಿದೆ. ಭಾರತದ ಕೃಷಿ ಮತ್ತು ರೈತ ಕಲ್ಯಾಣ ಸಚಿವಾಲಯದ ಪ್ರಕಾರ, ನೇಪಾಳವು ಭಾರತದಿಂದ ಮಾವಿನ ಹಣ್ಣಿನ ಆಮದಿನ ಮೇಲೆ ಯಾವುದೇ ನಿಷೇಧ ಅಥವಾ ನಿರ್ಬಂಧ ಹೇರಿಲ್ಲ. ಮಾವಿನ ರಫ್ತು ಮತ್ತು ಆಮದು ಪ್ರಕ್ರಿಯೆಗಳು ಹಿಂದಿನಂತೆ ನಿರಂತರವಾಗಿ ನಡೆಯುತ್ತಿವೆ.
ನೇಪಾಳ ಸರ್ಕಾರದ ರಾಷ್ಟ್ರೀಯ ಸಸ್ಯ ಸಂರಕ್ಷಣಾ ಸಂಸ್ಥೆ (NPPO) ಆಗಿರುವ ಸಸ್ಯ ಕ್ವಾರಂಟೈನ್ ಮತ್ತು ಕೀಟನಾಶಕ ನಿರ್ವಹಣಾ ಕೇಂದ್ರವು ಕೂಡ ಭಾರತೀಯ ಮಾವಿನ ಹಣ್ಣಿನ ಆಮದಿನ ಮೇಲೆ ಯಾವುದೇ ನಿರ್ಬಂಧವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಭಾರತ ಸರ್ಕಾರ ನೀಡುವ ಮಾನ್ಯ ಫೈಟೊಸಾನಿಟರಿ ಪ್ರಮಾಣಪತ್ರದ ಆಧಾರದ ಮೇಲೆ ಆಮದು ಪರವಾನಗಿಗಳು ಹಾಗೂ ಸರಕು ಬಿಡುಗಡೆ ಆದೇಶಗಳನ್ನು ನೀಡಲಾಗುತ್ತಿದೆ ಎಂದು ತಿಳಿಸಿದೆ.
2,005 ಮೆಟ್ರಿಕ್ ಟನ್ ಮಾವಿನ ಹಣ್ಣು ರಫ್ತು : ಜನವರಿ 2026ರಿಂದ ಭಾರತದಿಂದ ನೇಪಾಳಕ್ಕೆ ಒಟ್ಟು 149 ಸರಕುಗಳಲ್ಲಿ 2,005 ಮೆಟ್ರಿಕ್ ಟನ್ ಮಾವಿನ ಹಣ್ಣು ರಫ್ತು ಮಾಡಲಾಗಿದೆ. ಜೂನ್ ತಿಂಗಳಲ್ಲೇ 18 ಸರಕುಗಳಲ್ಲಿ 266 ಮೆಟ್ರಿಕ್ ಟನ್ ಮಾವಿನ ಹಣ್ಣುಗಳನ್ನು ನೇಪಾಳಕ್ಕೆ ಕಳುಹಿಸಲಾಗಿದೆ. ಈ ಅಂಕಿಅಂಶಗಳು ರಫ್ತು ಪ್ರಕ್ರಿಯೆ ಯಾವುದೇ ಅಡೆತಡೆಯಿಲ್ಲದೆ ನಡೆಯುತ್ತಿರುವುದನ್ನು ತೋರಿಸುತ್ತವೆ.
ಹೊಸ ಜೈವಿಕ ಸುರಕ್ಷತಾ ಷರತ್ತು : ಇತ್ತೀಚೆಗೆ ನೇಪಾಳ ಸರ್ಕಾರವು ಮಾವಿನ ಹಣ್ಣಿನ ಆಮದುಗೆ ಸಂಬಂಧಿಸಿದಂತೆ ಕೆಲವು ಹೊಸ ಜೈವಿಕ ಸುರಕ್ಷತಾ ನಿಯಮಗಳನ್ನು ಜಾರಿಗೊಳಿಸಿದೆ. ಪ್ರಮುಖವಾಗಿ 48 ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ ಒಂದು ಗಂಟೆಯ ಬಿಸಿನೀರಿನ ಸಂಸ್ಕರಣೆ (Hot Water Treatment-HWT) ಹಾಗೂ ಕೆಲವು ನಿರ್ದಿಷ್ಟ ಕೀಟಗಳಿಂದ ಮುಕ್ತವಾಗಿರಬೇಕೆಂಬ ಷರತ್ತುಗಳನ್ನು ವಿಧಿಸಲಾಗಿದೆ.
ಆದರೆ ಈ ಹೊಸ ಸಸ್ಯ-ಸ್ಯಾನಿಟರಿ ಷರತ್ತುಗಳನ್ನು ಪೂರ್ವ ಸಮಾಲೋಚನೆ ಇಲ್ಲದೆ ಜಾರಿಗೊಳಿಸಿರುವ ಬಗ್ಗೆ ಭಾರತ ಆಕ್ಷೇಪ ವ್ಯಕ್ತಪಡಿಸಿದೆ. ಈ ವಿಷಯವನ್ನು WTOಯ SPS ಒಪ್ಪಂದ ಮತ್ತು ಅಂತರರಾಷ್ಟ್ರೀಯ ಸಸ್ಯ ಸಂರಕ್ಷಣಾ ಸಮಾವೇಶ (IPPC) ಚೌಕಟ್ಟಿನಡಿ ದ್ವಿಪಕ್ಷೀಯ ಮಾತುಕತೆಯ ಮೂಲಕ ಚರ್ಚಿಸಲಾಗುತ್ತಿದೆ. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ ನಮ್ಮ “ದ ರೂರಲ್ ಮಿರರ್.ಕಾಂ”WhatsApp Channel ಗೆ ಇಲ್ಲಿ ಕ್ಲಿಕ್ ಮಾಡಿ
ವದಂತಿಗಳಿಗೆ ಕಿವಿಗೊಡದಂತೆ ಮನವಿ : ಸಚಿವಾಲಯದ ಪ್ರಕಾರ, ನೇಪಾಳ ಇತ್ತೀಚೆಗೆ ಮಾವಿನ ಹಣ್ಣಿನ ಆಮದುಗೆ ಸಂಬಂಧಿಸಿದ ಕೆಲವು ಷರತ್ತುಗಳನ್ನು ಪರಿಷ್ಕರಿಸಿದೆ. ವಿಶೇಷವಾಗಿ “ಹಾಟ್ ವಾಟರ್ ಟ್ರೀಟ್ಮೆಂಟ್” (Hot Water Treatment) ಸೇರಿದಂತೆ ಕೆಲವು ಸಸ್ಯಸಂರಕ್ಷಣಾ ನಿಯಮಗಳನ್ನು ಕಡ್ಡಾಯಗೊಳಿಸಲಾಗಿದೆ. ಆದರೆ ಈ ಹೊಸ ನಿಯಮಗಳನ್ನು ಪಾಲಿಸಿಕೊಂಡು ಭಾರತದಿಂದ ಮಾವಿನ ಹಣ್ಣಿನ ರಫ್ತು ಪ್ರಕ್ರಿಯೆ ಎಂದಿನಂತೆ ಮುಂದುವರಿದಿದೆ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.
ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳು ಹಾಗೂ ಕೆಲವು ಮಾಧ್ಯಮಗಳಲ್ಲಿ ಭಾರತೀಯ ಮಾವಿನ ಹಣ್ಣಿನ ಆಮದಿಯನ್ನು ನೇಪಾಳ ಸ್ಥಗಿತಗೊಳಿಸಿದೆ ಎಂಬ ಸುದ್ದಿ ಹರಿದಾಡಿತ್ತು. ಇದರಿಂದ ಮಾವು ಬೆಳೆಗಾರರು ಮತ್ತು ರಫ್ತುದಾರರಲ್ಲಿ ಆತಂಕ ಉಂಟಾಗಿತ್ತು. ಆದರೆ ಭಾರತ ಹಾಗೂ ನೇಪಾಳ ಎರಡೂ ದೇಶಗಳ ಅಧಿಕಾರಿಗಳು ಈ ವರದಿಗಳನ್ನು ಸುಳ್ಳು ಮತ್ತು ದಾರಿತಪ್ಪಿಸುವ ಮಾಹಿತಿಯೆಂದು ಸ್ಪಷ್ಟಪಡಿಸಿರುವುದರಿಂದ ರಫ್ತುದಾರರಿಗೆ ನಿರಾಳತೆ ದೊರೆತಿದೆ.
ಭಾರತವು ನೇಪಾಳಕ್ಕೆ ಪ್ರಮುಖ ಕೃಷಿ ಉತ್ಪನ್ನಗಳ ರಫ್ತು ದೇಶಗಳಲ್ಲಿ ಒಂದಾಗಿದ್ದು, ಮಾವಿನ ಹಣ್ಣಿಗೂ ಉತ್ತಮ ಬೇಡಿಕೆ ಇದೆ. ಹೊಸ ಆಮದು ನಿಯಮಗಳನ್ನು ಪಾಲಿಸುವ ಮೂಲಕ ಭಾರತದಿಂದ ನೇಪಾಳಕ್ಕೆ ಮಾವಿನ ಹಣ್ಣಿನ ರಫ್ತು ನಿರಂತರವಾಗಿ ಮುಂದುವರಿಯಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ ನಮ್ಮ “ದ ರೂರಲ್ ಮಿರರ್.ಕಾಂ”WhatsApp Channel ಗೆ ಇಲ್ಲಿ ಕ್ಲಿಕ್ ಮಾಡಿ
India’s Ministry of Agriculture and Farmers’ Welfare has clarified that Nepal has not imposed any ban on mango imports from India. Nepal has only revised certain import conditions, including Hot Water Treatment requirements, and exports from India continue as usual.
