ಭವಿಷ್ಯದ ಬಾಳೆ ಬೆಳೆ ಉಳಿಸುವ ಗುಟ್ಟು ಕಾಡು ಬಾಳೆ ಜಾತಿಯಲ್ಲಿ!

ಭಾರತದ ಈಶಾನ್ಯ ಭಾಗದ ಅರಣ್ಯಗಳಲ್ಲಿ ಬೆಳೆಯುವ ‘ಸಿಕ್ಕಿಂ ಬಾಳೆ’ (Musa sikkimensis) ಎಂಬ ಕಾಡು ಬಾಳೆ ಜಾತಿಯಲ್ಲಿ ಹವಾಮಾನ ಬದಲಾವಣೆಗೆ ಶಕ್ತಿ ನೀಡುವ ಪ್ರಮುಖ ಜಿನೀಯ ಗುಣಗಳನ್ನು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ. ಈ ಸಂಶೋಧನೆ ಭವಿಷ್ಯದ ಬಾಳೆ ಬೆಳೆ ಸುಧಾರಣೆ ಹಾಗೂ ಹವಾಮಾನ ಪ್ರತಿರೋಧಕ ಕೃಷಿಗೆ ಮಹತ್ವದ ದಾರಿಯನ್ನು ತೆರೆದಿದೆ.

ಈ ಅಧ್ಯಯನವನ್ನು ನಾಗಾಲ್ಯಾಂಡ್ ವಿಶ್ವವಿದ್ಯಾಲಯದ ತೋಟಗಾರಿಕಾ ವಿಭಾಗದ ವಿಜ್ಞಾನಿಗಳು ನಡೆಸಿದ್ದು, ಬಾಳೆ ಜಾತಿಗಳ ಜಿನೀಯ ವೈವಿಧ್ಯತೆಯ ಮಹತ್ವವನ್ನು ಈ ಸಂಶೋಧನೆ ಸ್ಪಷ್ಟಪಡಿಸಿದೆ.

ಸಿಕ್ಕಿಂ ಬಾಳೆ ಎಂಬ ಈ ಕಾಡು ಜಾತಿ ಪೂರ್ವ ಹಿಮಾಲಯ ಮತ್ತು ಈಶಾನ್ಯ ಭಾರತದಲ್ಲಿ ಕಂಡುಬರುವ ವಿಶಿಷ್ಟ ಸಸ್ಯವಾಗಿದ್ದು, ಇದು ಸಾಮಾನ್ಯವಾಗಿ ಆಹಾರಕ್ಕಾಗಿ ಬೆಳೆಸುವ ಬಾಳೆಯಲ್ಲ. ಆದರೆ ಇದರ ಜಿನೀಯ ಗುಣಗಳು ಭವಿಷ್ಯದ ಕೃಷಿಗೆ ಬಹುಮುಖ್ಯವಾಗಿವೆ ಎಂದು ಸಂಶೋಧಕರು ತಿಳಿಸಿದ್ದಾರೆ.

ರೋಗ ನಿರೋಧಕತೆ ಮತ್ತು ಹವಾಮಾನ ಸಹಿಷ್ಣುತೆ ಸಿಕ್ಕಿಂ ಬಾಳೆ ಜಾತಿಯಲ್ಲಿ ಇದೆ, ಪ್ರಮುಖವಾಗಿ

• ರೋಗ ತಡೆಯುವ ಸಾಮರ್ಥ್ಯ

• ಪರಿಸರ ಒತ್ತಡವನ್ನು ಸಹಿಸುವ ಗುಣ

• ಹವಾಮಾನ ಬದಲಾವಣೆಗೆ ಹೊಂದಿಕೊಳ್ಳುವ ಶಕ್ತಿ

ಇವುಗಳಂತಹ ಪ್ರಮುಖ ಲಕ್ಷಣಗಳು ಕಂಡುಬಂದಿವೆ. ಈ ಗುಣಗಳು ಮುಂದಿನ ದಿನಗಳಲ್ಲಿ ರೋಗ ನಿರೋಧಕ ಮತ್ತು ಹೆಚ್ಚು ಉತ್ಪಾದಕ ಬಾಳೆ ಜಾತಿಗಳನ್ನು ಅಭಿವೃದ್ಧಿಪಡಿಸಲು ಸಹಾಯ ಮಾಡಬಹುದು ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

ಈಶಾನ್ಯ ಭಾರತದ ಅರಣ್ಯ ಪ್ರದೇಶಗಳಲ್ಲಿ ಹಲವು ಸ್ಥಳೀಯ ಬಾಳೆ ಜಾತಿಗಳು ಕಂಡುಬರುತ್ತಿವೆ. ಆದರೆ, ಅರಣ್ಯ ನಾಶ,  ಭೂ ಬಳಕೆ ಬದಲಾವಣೆ, ಹೈಬ್ರಿಡ್ ಮತ್ತು ಟಿಶ್ಯೂ ಕಲ್ಚರ್ ಬಾಳೆ ಜಾತಿಗಳ ಬಳಕೆ ಇವುಗಳಿಂದ ಪರಂಪರೆಯ ಹಾಗೂ ಕಾಡು ಬಾಳೆ ಜಾತಿಗಳು ನಾಶವಾಗುವ ಅಪಾಯ ಎದುರಿಸುತ್ತಿವೆ ಎಂದು ಸಂಶೋಧಕರು ಎಚ್ಚರಿಸಿದ್ದಾರೆ.

ಈ ಹಿನ್ನೆಲೆಯಲ್ಲಿ ನಾಗಾಲ್ಯಾಂಡ್ ವಿಶ್ವವಿದ್ಯಾಲಯದಲ್ಲಿ Banana Biodiversity Corridor ಎಂಬ ಜೀವವೈವಿಧ್ಯ ಸಂರಕ್ಷಣಾ ಯೋಜನೆಯನ್ನು ಆರಂಭಿಸಲಾಗಿದೆ. ಇದು ಕಾಡು ಬಾಳೆ ಜಾತಿಗಳ ಸಂರಕ್ಷಣೆ, ಜಿನೀಯ ಸಂಶೋಧನೆ, ಹವಾಮಾನ ಪ್ರತಿರೋಧಕ ಬಾಳೆ ಸಂಕರ ಜಾತಿ ಅಭಿವೃದ್ಧಿ ಇವುಗಳಿಗೆ ನೆರವಾಗಲಿದೆ.

ವಿಜ್ಞಾನಿಗಳ ಪ್ರಕಾರ, ಇಂತಹ ಕಾಡು ಜಾತಿಗಳ ಸಂರಕ್ಷಣೆ ಭವಿಷ್ಯದ ಆಹಾರ ಭದ್ರತೆ ಹಾಗೂ ಹವಾಮಾನ ಬದಲಾವಣೆಯ ಎದುರಾಟಕ್ಕೆ ಬಹಳ ಮುಖ್ಯವಾಗಿದೆ. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ

Researchers from Nagaland University have identified climate-resilient genetic traits in the wild banana species Musa sikkimensis, commonly known as the Sikkim or Darjeeling banana. The study highlights the importance of conserving wild banana germplasm, which may help develop disease-resistant and climate-adapted banana varieties for future agriculture.