ಬ್ರಿಕ್ಸ್ ‘ಇಂದೋರ್ ಘೋಷಣೆ’ ಅಂಗೀಕಾರ – ಜಾಗತಿಕ ಕೃಷಿ ಸಹಕಾರಕ್ಕೆ ಹೊಸ ದಿಕ್ಕು

ಭಾರತದ ಅಧ್ಯಕ್ಷತೆಯಲ್ಲಿ ಇಂದೋರ್‌ನಲ್ಲಿ ನಡೆದ ಬ್ರಿಕ್ಸ್ (BRICS) ಕೃಷಿ ಸಚಿವರ ಸಭೆ ಐತಿಹಾಸಿಕ “ಇಂದೋರ್ ಘೋಷಣೆ”ಯನ್ನು ಸರ್ವಾನುಮತದಿಂದ ಅಂಗೀಕರಿಸಿದೆ. ಆಹಾರ ಭದ್ರತೆ, ರೈತರ ಕಲ್ಯಾಣ, ಹವಾಮಾನ ನಿರೋಧಕ ಕೃಷಿ, ಕೃಷಿ ವ್ಯಾಪಾರ ಮತ್ತು ಡಿಜಿಟಲ್ ಕೃಷಿಗೆ ಹೊಸ ಮಾರ್ಗಸೂಚಿಗಳನ್ನು ನೀಡುವ ಹಲವು ಮಹತ್ವದ ನಿರ್ಧಾರಗಳನ್ನು ಈ ಘೋಷಣೆಯಲ್ಲಿ ಒಳಗೊಂಡಿದೆ.

ಕೇಂದ್ರ ಕೃಷಿ ಮತ್ತು ರೈತರ ಕಲ್ಯಾಣ ಸಚಿವ ಶಿವರಾಜ್ ಸಿಂಗ್ ಚೌಹಾಣ್ ಮಾತನಾಡಿ, ಜಾಗತಿಕ ಬಿಕ್ಕಟ್ಟು ಮತ್ತು ಅನಿಶ್ಚಿತತೆಯ ನಡುವೆಯೂ ಬ್ರಿಕ್ಸ್ ರಾಷ್ಟ್ರಗಳು ಒಗ್ಗಟ್ಟಿನ ಸಂದೇಶವನ್ನು ಜಗತ್ತಿಗೆ ನೀಡಿವೆ ಎಂದು ಹೇಳಿದರು. ವಿಶ್ವದ ಜನಸಂಖ್ಯೆಯ ಅರ್ಧದಷ್ಟು ಜನರನ್ನು ಪ್ರತಿನಿಧಿಸುವ ಬ್ರಿಕ್ಸ್ ರಾಷ್ಟ್ರಗಳು ಜಾಗತಿಕ ಕೃಷಿ ಭೂಮಿಯ ಶೇ.42ರಷ್ಟು ಭಾಗ ಹಾಗೂ ಆಹಾರ ಧಾನ್ಯ ಉತ್ಪಾದನೆಯ ಶೇ.42ರಷ್ಟು ಕೊಡುಗೆಯನ್ನು ಹೊಂದಿವೆ ಎಂದು ಅವರು ವಿವರಿಸಿದರು.

ನಾಲ್ಕು ಪ್ರಮುಖ ಆದ್ಯತೆಗಳಿಗೆ ಒತ್ತು : ಸಭೆಯಲ್ಲಿ ನಾಲ್ಕು ಪ್ರಮುಖ ಕ್ಷೇತ್ರಗಳ ಮೇಲೆ ವಿಶೇಷ ಗಮನ ಹರಿಸಲಾಯಿತು. ಆಹಾರ ಭದ್ರತೆ ಮತ್ತು ಪೌಷ್ಟಿಕ ಆಹಾರ, ಹವಾಮಾನ ಬದಲಾವಣೆಗೆ ಹೊಂದಿಕೊಳ್ಳುವ ಕೃಷಿ, ಕೃಷಿ ವ್ಯಾಪಾರ ಮತ್ತು ಅಂತರರಾಷ್ಟ್ರೀಯ ಸಹಕಾರ,  ತಂತ್ರಜ್ಞಾನ ಹಾಗೂ ಡಿಜಿಟಲ್ ಕೃಷಿ ಅಭಿವೃದ್ಧಿ.  ವಿಶೇಷವಾಗಿ ಸಣ್ಣ ಮತ್ತು ಅತಿಸಣ್ಣ ರೈತರ ಸಮಸ್ಯೆಗಳು, ಸಾಲ ಸೌಲಭ್ಯ, ಕೃಷಿ ಇನ್‌ಪುಟ್‌ಗಳ ಲಭ್ಯತೆ, ನ್ಯಾಯಯುತ ಬೆಲೆ ಹಾಗೂ ಮಾರುಕಟ್ಟೆ ಸಂಪರ್ಕಗಳ ಕುರಿತು ಆಳವಾದ ಚರ್ಚೆ ನಡೆಸಲಾಯಿತು. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ

ಬ್ರಿಕ್ಸ್‌ನ ನಾಲ್ಕು ಹೊಸ ಜಾಗತಿಕ ಕೃಷಿ ಜಾಲಗಳು :

1. ಕೃಷಿ-ಪರಿಸರಶಾಸ್ತ್ರ ಮತ್ತು ಪುನರುತ್ಪಾದಕ ಕೃಷಿ ಶ್ರೇಷ್ಠತಾ ಕೇಂದ್ರಗಳ ಜಾಲ : ನೈಸರ್ಗಿಕ ಕೃಷಿ, ಸಾವಯವ ಕೃಷಿ ಹಾಗೂ ಪುನರುತ್ಪಾದಕ ಕೃಷಿ ವಿಧಾನಗಳ ಕುರಿತು ಸಂಶೋಧನೆ, ತರಬೇತಿ ಮತ್ತು ಜ್ಞಾನ ಹಂಚಿಕೆಗೆ ಈ ಜಾಲ ಕಾರ್ಯನಿರ್ವಹಿಸಲಿದೆ.

2. ಬ್ರಿಕ್ಸ್ ಡಿಜಿಟಲ್ ಕೃಷಿ ಜಾಲ : ಕೃತಕ ಬುದ್ಧಿಮತ್ತೆ (AI), ಜಿಯೋಸ್ಪೇಷಿಯಲ್ ತಂತ್ರಜ್ಞಾನ, ಡಿಜಿಟಲ್ ಪಬ್ಲಿಕ್ ಇನ್‌ಫ್ರಾಸ್ಟ್ರಕ್ಚರ್ ಹಾಗೂ ಡೇಟಾ ಆಧಾರಿತ ಕೃಷಿ ಪರಿಹಾರಗಳ ಅಭಿವೃದ್ಧಿಗೆ ಈ ಜಾಲ ನೆರವಾಗಲಿದೆ. ಇದರ ಸಮನ್ವಯವನ್ನು ಐಐಟಿ ದೆಹಲಿ ನಿರ್ವಹಿಸಲಿದೆ.

3. ಬೀಜ ವ್ಯವಸ್ಥೆಗಳಲ್ಲಿ ರೈತರ ಹಕ್ಕುಗಳ ಜಾಗತಿಕ ವೇದಿಕೆ :  ಸ್ಥಳೀಯ ಬೀಜಗಳು, ಸಾಂಪ್ರದಾಯಿಕ ಜ್ಞಾನ ಹಾಗೂ ರೈತರ ಬೀಜ ಹಕ್ಕುಗಳ ಸಂರಕ್ಷಣೆಗೆ ಈ ವೇದಿಕೆ ಕಾರ್ಯನಿರ್ವಹಿಸಲಿದೆ. ಹವಾಮಾನ ಬದಲಾವಣೆ ಮತ್ತು ಆಹಾರ ಭದ್ರತೆಯ ಹಿನ್ನೆಲೆಯಲ್ಲಿ ದೇಶೀ ಬೀಜಗಳ ಮಹತ್ವವನ್ನು ಬ್ರಿಕ್ಸ್ ರಾಷ್ಟ್ರಗಳು ಒತ್ತಿ ಹೇಳಿವೆ.

4. BRICS AgriN ಜಾಲ :  ಕೃಷಿ ಇನ್‌ಪುಟ್‌ಗಳು, ಬೀಜಗಳು, ತಳಿ ಸಂಪನ್ಮೂಲಗಳು ಹಾಗೂ ಮಾಹಿತಿ ವಿನಿಮಯಕ್ಕಾಗಿ ಹೊಸ BRICS AgriN ಜಾಲವನ್ನು ಸ್ಥಾಪಿಸಲು ನಿರ್ಧರಿಸಲಾಗಿದೆ.

ಕೃಷಿ ವ್ಯಾಪಾರ ಮತ್ತು ಸಂಶೋಧನೆಗೆ ಉತ್ತೇಜನ :  ಈಗಾಗಲೇ ಕಾರ್ಯನಿರ್ವಹಿಸುತ್ತಿರುವ ಬ್ರಿಕ್ಸ್ ಕೃಷಿ ಸಂಶೋಧನಾ ವೇದಿಕೆಯನ್ನು ಮತ್ತಷ್ಟು ಬಲಪಡಿಸಿ, “ಲ್ಯಾಬ್ ಟು ಲ್ಯಾಂಡ್” ಮಾದರಿಯಲ್ಲಿ ಸಂಶೋಧನಾ ಫಲಿತಾಂಶಗಳನ್ನು ರೈತರ ಹೊಲಗಳಿಗೆ ತಲುಪಿಸುವ ಗುರಿ ಹೊಂದಲಾಗಿದೆ. ಕೃಷಿ ವ್ಯಾಪಾರದಲ್ಲಿ ನ್ಯಾಯಯುತ ಮತ್ತು ಪಾರದರ್ಶಕ ಬಹುಪಕ್ಷೀಯ ವ್ಯವಸ್ಥೆಗೆ ಬ್ರಿಕ್ಸ್ ರಾಷ್ಟ್ರಗಳು ಬದ್ಧತೆಯನ್ನು ಪುನರುಚ್ಚರಿಸಿವೆ.

ಹವಾಮಾನ ಬದಲಾವಣೆ ಮತ್ತು ಎಲ್‌ನಿನೋ ಸವಾಲು : ಎಲ್‌ನಿನೋ ಪರಿಣಾಮ ಭಾರತ ಸೇರಿದಂತೆ ಹಲವು ಏಷ್ಯಾ-ಪೆಸಿಫಿಕ್ ರಾಷ್ಟ್ರಗಳ ಮೇಲೆ ಪರಿಣಾಮ ಬೀರಬಹುದಾದ ಹಿನ್ನೆಲೆಯಲ್ಲಿ ಮಾಹಿತಿ ಹಂಚಿಕೆ ಮತ್ತು ಸಹಕಾರದ ಮೂಲಕ ಸವಾಲು ಎದುರಿಸಲು ಬ್ರಿಕ್ಸ್ ರಾಷ್ಟ್ರಗಳು ಸಿದ್ಧತೆ ನಡೆಸುತ್ತಿವೆ ಎಂದು ಸಚಿವರು ತಿಳಿಸಿದ್ದಾರೆ. ಕಾರ್ಬನ್ ಕ್ರೆಡಿಟ್‌, ಹವಾಮಾನ ಸ್ನೇಹಿ ಕೃಷಿ ಹಾಗೂ ಪುನರುತ್ಪಾದಕ ಕೃಷಿಗೂ ಸಭೆಯಲ್ಲಿ ಮಹತ್ವ ನೀಡಲಾಗಿದೆ.

ರೈತರಿಗೆ ಅಗ್ಗದ ರಸಗೊಬ್ಬರ ಮುಂದುವರಿಕೆ : ಜಾಗತಿಕ ಮಾರುಕಟ್ಟೆಯಲ್ಲಿ ರಸಗೊಬ್ಬರಗಳ ಬೆಲೆ ಏರಿಕೆಯಾಗಿದ್ದರೂ ಭಾರತ ಸರ್ಕಾರ ರೈತರಿಗೆ ಯೂರಿಯಾ ಚೀಲವನ್ನು ₹266 ಹಾಗೂ ಡಿಎಪಿ ಚೀಲವನ್ನು ₹1,350 ದರದಲ್ಲೇ ಒದಗಿಸುತ್ತಿದೆ. ಹೆಚ್ಚುವರಿ ವೆಚ್ಚವನ್ನು ಕೇಂದ್ರ ಸರ್ಕಾರವೇ ಭರಿಸುತ್ತಿದೆ ಎಂದು ಸಚಿವರು ತಿಳಿಸಿದ್ದಾರೆ.

ಬ್ರಿಕ್ಸ್ ‘ಇಂದೋರ್ ಘೋಷಣೆ’ ಅಂಗೀಕಾರ – ಜಾಗತಿಕ ಕೃಷಿ ಸಹಕಾರಕ್ಕೆ ಹೊಸ ದಿಕ್ಕು https://t.co/2t3k216vCu

— theruralmirror (@ruralmirror) June 14, 2026

BRICS nations adopted the historic “Indore Declaration” under India’s presidency, focusing on food security, farmer welfare, climate-resilient agriculture, digital farming and agricultural trade. Four new agricultural cooperation networks were launched to strengthen sustainable farming, indigenous seed protection, innovation and farmer-centric development.