ಅಡಿಕೆ ತೋಟಗಳು ಹೆಚ್ಚುತ್ತಿವೆ… ಹಾಗಿದ್ದರೆ ಕರ್ನಾಟಕದಲ್ಲಿ ಇಳುವರಿ ಏಕೆ ಕುಸಿಯುತ್ತಿದೆ?

ಅಡಿಕೆ ಕೃಷಿ ಕರ್ನಾಟಕದಲ್ಲಿ ಹಿಂದೆಂದಿಗಿಂತಲೂ ಹೆಚ್ಚು ವಿಸ್ತರಿಸುತ್ತಿದೆ. ಹೊಸ ಹೊಸ ಪ್ರದೇಶಗಳಲ್ಲಿ ಅಡಿಕೆ ತೋಟಗಳು ಕಾಣಿಸಿಕೊಳ್ಳುತ್ತಿವೆ. ಒಣಪ್ರದೇಶಗಳಲ್ಲಿಯೂ ನೀರಾವರಿ ಸೌಲಭ್ಯ ಆಧರಿಸಿ ಅಡಿಕೆ ಬೆಳೆಯುವ ಪ್ರದೇಶ ಹೆಚ್ಚುತ್ತಿದೆ. ಆದರೆ ಈ ವಿಸ್ತರಣೆಯ ನಡುವೆಯೇ ರಾಜ್ಯದ ಒಟ್ಟಾರೆ ಅಡಿಕೆ ಉತ್ಪಾದನೆ ಮತ್ತು ಉತ್ಪಾದಕತೆ ಕುಸಿಯುತ್ತಿರುವುದು ಈಗ ಗಮನ ಸೆಳೆಯುತ್ತಿದೆ.

ಲಭ್ಯವಿರುವ ಸರ್ಕಾರಿ ಅಂಕಿ-ಅಂಶಗಳ ಆಧಾರದಲ್ಲಿ ನೋಡಿದರೆ, ಕಳೆದ ಐದು ವರ್ಷಗಳಲ್ಲಿ ಕರ್ನಾಟಕದಲ್ಲಿ ಅಡಿಕೆ ಬೆಳೆಯುವ ಪ್ರದೇಶ ಶೇ.32.42ರಷ್ಟು ಹೆಚ್ಚಾಗಿದೆ. ಆದರೆ ಇದೇ ಅವಧಿಯಲ್ಲಿ ಉತ್ಪಾದನೆ ಶೇ.16ರಷ್ಟು ಕುಸಿದಿದ್ದು, ಉತ್ಪಾದಕತೆ ಶೇ.36.60ರಷ್ಟು ಇಳಿಕೆಯಾಗಿದೆ.

ಪ್ರದೇಶ ಹೆಚ್ಚಳ… ಉತ್ಪಾದನೆ ಇಳಿಕೆ : ಭಾರತದಲ್ಲಿ 2021-22ರಲ್ಲಿ ಸುಮಾರು 8.49 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಅಡಿಕೆ ಬೆಳೆಯಲಾಗುತ್ತಿತ್ತು. 2025-26ರ ಎರಡನೇ ಮುಂಗಡ ಅಂದಾಜಿನ ವೇಳೆಗೆ ಇದು 11.06 ಲಕ್ಷ ಹೆಕ್ಟೇರ್‌ಗೆ ಏರಿಕೆಯಾಗಿದೆ. ಅಂದರೆ ಐದು ವರ್ಷಗಳಲ್ಲಿ ಅಡಿಕೆ ಪ್ರದೇಶ ಸುಮಾರು 2.56 ಲಕ್ಷ ಹೆಕ್ಟೇರ್ ಹೆಚ್ಚಾಗಿದೆ.

ಆದರೆ ಇದೇ ಅವಧಿಯಲ್ಲಿ ದೇಶದ ಅಡಿಕೆ ಉತ್ಪಾದನೆ 16.66 ಲಕ್ಷ ಟನ್‌ನಿಂದ 15.29 ಲಕ್ಷ ಟನ್‌ಗೆ ಇಳಿದಿದೆ. ಉತ್ಪಾದಕತೆಯೂ ಹೆಕ್ಟೇರ್‌ಗೆ 1.96 ಟನ್‌ನಿಂದ 1.38 ಟನ್‌ಗೆ ಕುಸಿದಿದೆ.

ಕರ್ನಾಟಕವೇ ಅಡಿಕೆಯ ಕೇಂದ್ರ… ಆದರೆ ಇಲ್ಲೇ ಇಳುವರಿ ಕುಸಿತ : ದೇಶದ ಅಡಿಕೆ ಕೃಷಿಯಲ್ಲಿ ಕರ್ನಾಟಕದ ಪ್ರಾಬಲ್ಯ ಮುಂದುವರಿದಿದೆ. 2025-26ರ ಅಂದಾಜಿನ ಪ್ರಕಾರ ದೇಶದ ಒಟ್ಟು ಅಡಿಕೆ ಪ್ರದೇಶದ ಶೇ.71.56ರಷ್ಟು ಕರ್ನಾಟಕದಲ್ಲಿದೆ. ರಾಜ್ಯದ ಪ್ರದೇಶ ಸುಮಾರು 7.98 ಲಕ್ಷ ಹೆಕ್ಟೇರ್. ದೇಶದ ಒಟ್ಟು ಉತ್ಪಾದನೆಯಲ್ಲಿ ಕರ್ನಾಟಕದ ಪಾಲು ಶೇ.75.47ರಷ್ಟು, ಅಂದರೆ ಸುಮಾರು 11.32 ಲಕ್ಷ ಟನ್.

ಆದರೆ ಇದೇ ರಾಜ್ಯದಲ್ಲಿ ಕಳೆದ ಐದು ವರ್ಷಗಳಲ್ಲಿ ಪ್ರದೇಶ ಹೆಚ್ಚಾದರೂ ಉತ್ಪಾದನೆ ಮತ್ತು ಉತ್ಪಾದಕತೆ ಕುಸಿದಿರುವುದು ಅಡಿಕೆ ಬೆಳೆಗಾರರ ಮುಂದಿರುವ ದೊಡ್ಡ ಪ್ರಶ್ನೆಯಾಗಿದೆ. ಹೀಗಾಗಿ ಹೆಚ್ಚು ತೋಟಗಳು ಇದರಿಂದ ಹೆಚ್ಚು ಉತ್ಪಾದನೆ ಎಂಬ ಸಾಮಾನ್ಯ ಲೆಕ್ಕ ಇಲ್ಲಿ ಸರಿಹೊಂದುತ್ತಿಲ್ಲ.

ದಕ್ಷಿಣ ಕನ್ನಡ, ಶಿವಮೊಗ್ಗ, ತುಮಕೂರಿನಲ್ಲಿ ಏನಾಗುತ್ತಿದೆ? :  ಕರ್ನಾಟಕದ ಸಾಂಪ್ರದಾಯಿಕ ಅಡಿಕೆ ಪ್ರದೇಶಗಳಾದ ದಕ್ಷಿಣ ಕನ್ನಡ, ಶಿವಮೊಗ್ಗ ಮತ್ತು ತುಮಕೂರುಗಳಲ್ಲಿ ಅಡಿಕೆ ಪ್ರದೇಶ ವಿಸ್ತರಿಸಿದ್ದರೂ ಉತ್ಪಾದನೆ ಕುಸಿದಿದೆ.  ವಿಶೇಷವಾಗಿ ದಕ್ಷಿಣ ಕನ್ನಡದಂತಹ ಹಳೆಯ ಅಡಿಕೆ ಪ್ರದೇಶಗಳಲ್ಲಿ ರೋಗಬಾಧೆ, ಹವಾಮಾನ ವೈಪರೀತ್ಯ ಮತ್ತು ತೋಟಗಳ ಆರೋಗ್ಯಕ್ಕೆ ಸಂಬಂಧಿಸಿದ ಸಮಸ್ಯೆಗಳು ಇಳುವರಿಯ ಮೇಲೆ ಪರಿಣಾಮ ಬೀರುತ್ತಿವೆ.

ಅಡಿಕೆಯ ಕೊಳೆರೋಗ ಮತ್ತು ಎಲೆಚುಕ್ಕೆ ರೋಗ ಸೇರಿದಂತೆ ಹಲವು ಸಮಸ್ಯೆಗಳು ಹಳೆಯ ತೋಟಗಳ ಉತ್ಪಾದಕತೆಯನ್ನು ಕಡಿಮೆ ಮಾಡುತ್ತಿರುವುದು ಚರ್ಚೆಗೆ ಬಂದಿದೆ. ಕೆಲವು ವರದಿಗಳ ಪ್ರಕಾರ ಸಾಂಪ್ರದಾಯಿಕ ಅಡಿಕೆ ಪ್ರದೇಶಗಳಲ್ಲಿ ಗಣನೀಯ ಪ್ರಮಾಣದ ತೋಟಗಳು ರೋಗಬಾಧೆ ಎದುರಿಸುತ್ತಿವೆ.

ಹೊಸ ಪ್ರದೇಶಗಳಲ್ಲಿ ಅಡಿಕೆ ವಿಸ್ತರಣೆ : ಇನ್ನೊಂದು ಕಡೆ, ಅಡಿಕೆ ಈಗ ಕರಾವಳಿ ಮತ್ತು ಮಲೆನಾಡಿನ ಸಾಂಪ್ರದಾಯಿಕ ಪ್ರದೇಶಗಳಲ್ಲಷ್ಟೇ ಸೀಮಿತವಾಗಿಲ್ಲ. ಮೇಘಾಲಯ, ನಾಗಾಲ್ಯಾಂಡ್, ಆಂಧ್ರಪ್ರದೇಶ ಮತ್ತು ತಮಿಳುನಾಡು ಸೇರಿದಂತೆ ಹಲವು ರಾಜ್ಯಗಳಲ್ಲಿ ಅಡಿಕೆ ಪ್ರದೇಶ ವೇಗವಾಗಿ ವಿಸ್ತರಿಸುತ್ತಿದೆ. ಕರ್ನಾಟಕದಲ್ಲಿಯೂ ಅಡಿಕೆ ಕೃಷಿ ಸಾಂಪ್ರದಾಯಿಕ ಪ್ರದೇಶಗಳನ್ನು ಮೀರಿ ಒಣಪ್ರದೇಶಗಳತ್ತ ಸಾಗುತ್ತಿದೆ ಎಂದು ವರದಿಯಾಗಿದೆ.  ಇದರಿಂದ ಭಾರತದ ಅಡಿಕೆ ಕೃಷಿಯ ನಕ್ಷೆಯೇ ನಿಧಾನವಾಗಿ ಬದಲಾಗುತ್ತಿದೆ.

ರೈತರಿಗೆ ಸಂದೇಶ ಏನು ? : ಇಲ್ಲಿ ಗಮನಿಸಬೇಕಾದದ್ದು ಕೇವಲ “ಅಡಿಕೆ ಪ್ರದೇಶ ಎಷ್ಟು?” ಎನ್ನುವುದಲ್ಲ. “ಒಂದು ಹೆಕ್ಟೇರ್‌ನಿಂದ ಎಷ್ಟು ಅಡಿಕೆ ಸಿಗುತ್ತಿದೆ?” ಎನ್ನುವುದು ಈಗ ಹೆಚ್ಚು ಮುಖ್ಯವಾಗುತ್ತಿದೆ.  ಹೊಸ ಪ್ರದೇಶಗಳಲ್ಲಿ ತೋಟಗಳು ಹೆಚ್ಚಾದರೂ ಹಳೆಯ ತೋಟಗಳಲ್ಲಿ ಉತ್ಪಾದಕತೆ ಕುಸಿದರೆ ಒಟ್ಟಾರೆ ಉತ್ಪಾದನೆ ನಿರೀಕ್ಷೆಯಂತೆ ಹೆಚ್ಚುವುದಿಲ್ಲ. ಹೀಗಾಗಿ ಅಡಿಕೆ ಕೃಷಿಯ ಮುಂದಿನ ಹಂತದಲ್ಲಿ ಹೊಸ ಪ್ರದೇಶ ವಿಸ್ತರಣೆಗಿಂತ ತೋಟಗಳ ಆರೋಗ್ಯ, ರೋಗ ನಿರ್ವಹಣೆ, ನೀರಿನ ಲಭ್ಯತೆ ಮತ್ತು ಉತ್ಪಾದಕತೆ ಹೆಚ್ಚಿಸುವ ತಂತ್ರಜ್ಞಾನ ಹೆಚ್ಚು ಮಹತ್ವ ಪಡೆಯಲಿದೆ.

ಇದೇ ವೇಳೆ, ಅಡಿಕೆಯ ಬೆಲೆ ಉತ್ತಮವಾಗಿರುವುದು ಹೊಸ ಪ್ರದೇಶಗಳಲ್ಲಿ ಬೆಳೆ ವಿಸ್ತರಣೆಗೆ ಪ್ರೇರಣೆ ನೀಡುತ್ತಿರುವ ಸಾಧ್ಯತೆಯನ್ನೂ ಸರ್ಕಾರದ ಅಂದಾಜು ಸೂಚಿಸುತ್ತದೆ. 2025-26ರಲ್ಲಿ ಅಡಿಕೆ ಪ್ರದೇಶ ಹೆಚ್ಚಳಕ್ಕೆ ಹಿಂದಿನ ಅವಧಿಯಲ್ಲಿದ್ದ ಉತ್ತಮ ಬೆಲೆ ಪ್ರಮುಖ ಕಾರಣವಾಗಿರಬಹುದು ಎಂದು ಅಂಕಿ ಅಂಶ ಹೇಳುತ್ತದೆ.

ಅಡಿಕೆಯ ಭವಿಷ್ಯಕ್ಕೆ ಎಚ್ಚರಿಕೆಯ ಅಂಕಿ-ಅಂಶ : ಅಡಿಕೆ ಕೃಷಿಯ ಈ ಬೆಳವಣಿಗೆಯಲ್ಲಿ ಎರಡು ಚಿತ್ರಣಗಳು ಒಂದೇ ಸಮಯದಲ್ಲಿ ಕಾಣಿಸುತ್ತಿವೆ. ಒಂದು ಕಡೆ  ಅಡಿಕೆ ತೋಟಗಳು ಹೆಚ್ಚುತ್ತಿವೆ. ಇನ್ನೊಂದು ಕಡೆ ಹಳೆಯ ಪ್ರಮುಖ ಪ್ರದೇಶಗಳಲ್ಲಿ ಇಳುವರಿ ಕುಸಿಯುತ್ತಿದೆ.

ಹೀಗಾಗಿ ಮುಂದಿನ ದಿನಗಳಲ್ಲಿ ಅಡಿಕೆ ಕ್ಷೇತ್ರದ ಯಶಸ್ಸನ್ನು ಎಷ್ಟು ಹೆಕ್ಟೇರ್ ಪ್ರದೇಶದಲ್ಲಿ ಅಡಿಕೆ ಇದೆ ಎನ್ನುವುದಕ್ಕಿಂತ, ಎಷ್ಟು ಆರೋಗ್ಯಕರ ತೋಟಗಳಿವೆ ಮತ್ತು ಪ್ರತಿ ಹೆಕ್ಟೇರ್‌ಗೆ ಎಷ್ಟು ಉತ್ಪಾದನೆ ಸಿಗುತ್ತಿದೆ ಎನ್ನುವುದೇ ನಿರ್ಧರಿಸುವ ಸಾಧ್ಯತೆ ಇದೆ. ಅಡಿಕೆ ವಿಸ್ತರಣೆ ನಡೆಯುತ್ತಿದೆ. ಆದರೆ ಇಳುವರಿ ಕುಸಿಯುತ್ತಿರುವ ಈ ವೈರುಧ್ಯವನ್ನು ಸರಿಪಡಿಸದೇ ಹೋದರೆ, ಹೊಸ ತೋಟಗಳ ಹೆಚ್ಚಳವೂ ಹಳೆಯ ತೋಟಗಳ ಉತ್ಪಾದನಾ ನಷ್ಟವನ್ನು ಸಂಪೂರ್ಣವಾಗಿ ತುಂಬಲು ಸಾಧ್ಯವಾಗದೇ ಇರಬಹುದು.

ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಫಾಲೋಮಾಡಲು ಇಲ್ಲಿ ಕ್ಲಿಕ್‌ ಮಾಡಿ

India’s arecanut cultivation area has expanded sharply, but the growth in acreage has not translated into higher productivity. Karnataka, which dominates India’s arecanut sector, has added 32.42% more area over five years, yet production has declined by 16% and productivity by 36.60%. The shift of arecanut cultivation into newer regions is happening alongside yield stress in traditional belts, highlighting the growing importance of disease management, water availability, plantation health and productivity improvement.