ಬೇಸಿಗೆಯ ತಾಪಕ್ಕೆ ತುತ್ತಾದ ವನ್ಯಜೀವಿಗಳಿಗೆ ನೀರಿನ ಜೀವಧಾರೆ | ಕೋಲಾರ ಬಲಮಂದೆ ಗ್ರಾಮ ಪಂಚಾಯಿತಿ ಮಾದರಿ ಕಾರ್ಯ

ಬೇಸಿಗೆ ಬಂತೆಂದರೆ ಎಲ್ಲೆಡೆ ನೀರಿನ ಅಭಾವ ಸೃಷ್ಟಿಯಾಗಿ ಹಾಹಾಕಾರ ಉಂಟಾಗುವುದು ಸಾಮಾನ್ಯ. ಅದರಲ್ಲೂ ಕೋಲಾರ ಜಿಲ್ಲೆಯಲ್ಲಿ ಈ ಸಮಸ್ಯೆ ವರ್ಷಂಪ್ರತಿ ತೀವ್ರವಾಗುತ್ತದೆ. ಕೆರೆ-ಕುಂಟೆಗಳು ಬತ್ತಿ ಹೋಗಿ ಹನಿ ನೀರಿಗೂ ಪರದಾಡುವ ಪರಿಸ್ಥಿತಿ ನಿರ್ಮಾಣವಾಗುತ್ತದೆ. ಈ ಸಂದರ್ಭದಲ್ಲಿ ಮನುಷ್ಯರಷ್ಟೇ ಅಲ್ಲ, ಅರಣ್ಯ ಪ್ರದೇಶದಲ್ಲಿರುವ ಪಶು-ಪಕ್ಷಿಗಳ ಪಾಡು ಇನ್ನಷ್ಟು ಕಷ್ಟಕರವಾಗುತ್ತದೆ.

ಈ ಪರಿಸ್ಥಿತಿಯನ್ನು ಮನಗಂಡು ಬಲಮಂದೆ ಗ್ರಾಮ ಪಂಚಾಯಿತಿ ತನ್ನ ವ್ಯಾಪ್ತಿಯಲ್ಲಿರುವ ಅರಣ್ಯ ಪ್ರದೇಶದಲ್ಲಿ ವನ್ಯಜೀವಿಗಳಿಗೆ ನೀರು ಒದಗಿಸುವ ಮಹತ್ವದ ಕಾರ್ಯವನ್ನು ಕೈಗೊಂಡಿದೆ. ಬಂಗಾರಪೇಟೆ ತಾಲೂಕಿನ ಗಡಿಭಾಗದಲ್ಲಿರುವ ಬಲಮಂದೆ, ಗುಲ್ಲಹಳ್ಳಿ, ಯಳೇಸಂದ್ರ, ದೋಣಿಮಡಗು ಗ್ರಾಮಗಳು ಅರಣ್ಯ ಪ್ರದೇಶಕ್ಕೆ ಹೊಂದಿಕೊಂಡಿದ್ದು, ಇಲ್ಲಿ ಜಿಂಕೆ, ಕೋತಿ, ಕಾಡುಹಂದಿ ಸೇರಿದಂತೆ ಅನೇಕ ವನ್ಯಜೀವಿಗಳು ವಾಸಿಸುತ್ತಿವೆ.

ಟ್ಯಾಂಕರ್, ಮಡಿಕೆ, ತೊಟ್ಟಿಗಳ ಮೂಲಕ ನೀರು : ತಾಲೂಕು ಪಂಚಾಯಿತಿ ಹಾಗೂ ಗ್ರಾಮ ಪಂಚಾಯಿತಿ ಅಧಿಕಾರಿಗಳು ಒಟ್ಟಾಗಿ ಟ್ಯಾಂಕರ್ ಮೂಲಕ ಕೆರೆ-ಕುಂಟೆಗಳಿಗೆ ನೀರು ತುಂಬುವುದು, ರಸ್ತೆ ಬದಿಯ ಮರಗಳಿಗೆ ಮಡಿಕೆ ನೇತುಬಿಟ್ಟು ಪಕ್ಷಿಗಳಿಗೆ ನೀರು, ಸಿಮೆಂಟ್ ತೊಟ್ಟಿಗಳ ನಿರ್ಮಾಣ ಮೂಲಕ ವನ್ಯಜೀವಿಗಳಿಗೆ ನೀರು, ಅರಣ್ಯದಲ್ಲಿ 10 ಸ್ಥಳಗಳಲ್ಲಿ ನೀರಿನ ವ್ಯವಸ್ಥೆ, ದಿನಕ್ಕೆ ಎರಡು ಬಾರಿ (ಬೆಳಗ್ಗೆ & ಸಂಜೆ) ನೀರು ಪೂರೈಕೆಯನ್ನು ಮಾಡುತ್ತಾರೆ.

ಗ್ರಾಮ ಪಂಚಾಯಿತಿಯ ನೀರುಪೂರೈಕೆ ಸಿಬ್ಬಂದಿ ಶ್ರೀನಿವಾಸಗೌಡ ಅವರ ಪ್ರಕಾರ, ಅಧಿಕಾರಿಗಳ ಸೂಚನೆಯಂತೆ ಅರಣ್ಯ ಪ್ರದೇಶದಲ್ಲಿ ನಿಯಮಿತವಾಗಿ ನೀರು ಒದಗಿಸಲಾಗುತ್ತಿದೆ. ಗ್ರಾಮಸ್ಥರು ಸಹ ವನ್ಯಜೀವಿಗಳಿಗೆ ಆಹಾರ ಒದಗಿಸುತ್ತಿದ್ದಾರೆ.

ಪರಿಸರವಾದಿ ಮಹೇಶ್ ಅವರು, “ಪ್ರಕೃತಿಯೊಂದಿಗೆ ಒಡಗೂಡಿ ಬದುಕುವುದು ನಮ್ಮ ಕರ್ತವ್ಯ. ವನ್ಯಜೀವಿಗಳ ಸಂರಕ್ಷಣೆ ಮಹಾಪುಣ್ಯಕರ ಕೆಲಸ” ಎಂದು ಅಭಿಪ್ರಾಯಪಟ್ಟರು.

ಡಾ. ಪ್ರವೀಣ್ ಬಿ. ಬಾಗೇವಾಡಿ ಅವರು ಮಾಹಿತಿ ನೀಡಿದಂತೆ, ಜಿಲ್ಲೆಯ 156 ಗ್ರಾಮ ಪಂಚಾಯಿತಿಗಳಲ್ಲೂ ತುರ್ತು ನೀರು ಸರಬರಾಜು ಘಟಕಗಳನ್ನು ಸ್ಥಾಪಿಸಲಾಗಿದೆ.  ಇದರಲ್ಲೂ ಬಲಮಂದೆ ಗ್ರಾಮ ಪಂಚಾಯಿತಿ ಮಾದರಿ ಕಾರ್ಯವಾಗಿ ಹೊರಹೊಮ್ಮಿದೆ.

ಮಾದರಿಯಾದ ಗ್ರಾಮ ಪಂಚಾಯಿತಿ : ಬೇಸಿಗೆಯಲ್ಲಿ ಮನುಷ್ಯರಿಗೆ ಮಾತ್ರವಲ್ಲದೆ, ಎಲ್ಲಾ ಜೀವಿಗಳಿಗೆ ಸಹಾಯ ಮಾಡುವ ಈ ಕಾರ್ಯ ರಾಜ್ಯದ ಇತರೆ ಪಂಚಾಯಿತಿಗಳಿಗೆ ಮಾದರಿಯಾಗಿದೆ. ಇಂತಹ ಪ್ರಯತ್ನಗಳು ಎಲ್ಲೆಡೆ ನಡೆದರೆ, ನಿಜವಾದ “ರಾಮರಾಜ್ಯ” ನಿರ್ಮಾಣ ಸಾಧ್ಯ. ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಗೆ ಇಲ್ಲಿ ಕ್ಲಿಕ್‌ ಮಾಡಿ

Balamande Gram Panchayat in Kolar district has taken a remarkable initiative to provide water to wildlife during summer. By using tankers, hanging pots for birds, and cement troughs for animals, they are ensuring survival of forest species. This model effort is now inspiring other gram panchayats across the district.