ತೆಂಗಿನ ಮರದಿಂದ 3 ಕೋಟಿ ಜನರಿಗೆ ಬದುಕು…!, ಈಗ ₹7,038 ಕೋಟಿ ರಫ್ತು!

ಒಂದು ಕಾಲದಲ್ಲಿ ಮನೆ ಬಳಕೆಯ ಎಣ್ಣೆ, ತೆಂಗಿನಕಾಯಿ ಮತ್ತು ಕೊಬ್ಬರಿ ಮಾರಾಟಕ್ಕೆ ಸೀಮಿತವಾಗಿದ್ದ ಭಾರತದ ತೆಂಗು ಈಗ ಜಾಗತಿಕ ಮಾರುಕಟ್ಟೆಯತ್ತ ವೇಗವಾಗಿ ಸಾಗುತ್ತಿದೆ. 2025-26ರಲ್ಲಿ ತೆಂಗಿನ ಉತ್ಪನ್ನಗಳ ರಫ್ತು ₹7,038.35 ಕೋಟಿ ತಲುಪಿದ್ದು, ಹಿಂದಿನ ವರ್ಷದ ₹4,349.03 ಕೋಟಿಗೆ ಹೋಲಿಸಿದರೆ ಬರೋಬ್ಬರಿ 62% ಏರಿಕೆಯಾಗಿದೆ.

ಇದು ಕೇವಲ ರಫ್ತು ಅಂಕಿ-ಅಂಶವಲ್ಲ. ತೆಂಗಿನ ಮರದ ಮೌಲ್ಯವನ್ನು ಕಾಯಿ ಮಾರಾಟದಿಂದ ಉತ್ಪನ್ನಗಳ ಮೌಲ್ಯವರ್ಧನೆಗೆ ಕೊಂಡೊಯ್ಯುತ್ತಿರುವ ಭಾರತದ ಕೃಷಿ ವಲಯದ ಬದಲಾವಣೆಯ ಸಂಕೇತವಾಗಿದೆ.

ಭಾರತ ಜಾಗತಿಕವಾಗಿ ಅತಿದೊಡ್ಡ ತೆಂಗು ಉತ್ಪಾದಕ ದೇಶವಾಗಿದ್ದು, ವಿಶ್ವದ ಒಟ್ಟು ಉತ್ಪಾದನೆಯಲ್ಲಿ ಸುಮಾರು 31.24% ಪಾಲು ಹೊಂದಿದೆ. 2024-25ರಲ್ಲಿ ದೇಶದಲ್ಲಿ ಸುಮಾರು 20,301.22 ಮಿಲಿಯನ್ ತೆಂಗಿನಕಾಯಿ ಉತ್ಪಾದನೆಯಾಗಿದ್ದು, 2.19 ಮಿಲಿಯನ್ ಹೆಕ್ಟೇರ್ ಪ್ರದೇಶದಲ್ಲಿ ತೆಂಗು ಬೆಳೆಯಲಾಗಿದೆ.

3 ಕೋಟಿ ಜನರ ಬದುಕಿನ ಬೆನ್ನೆಲುಬು : ಭಾರತದ ತೆಂಗು ವಲಯ ಸುಮಾರು 3 ಕೋಟಿ ಜನರ ಜೀವನೋಪಾಯಕ್ಕೆ ಆಧಾರವಾಗಿದೆ. ಇದರಲ್ಲಿ ಸುಮಾರು 1 ಕೋಟಿ ರೈತರು ಸೇರಿದ್ದಾರೆ. ಹೀಗಾಗಿ ತೆಂಗಿನ ಮಾರುಕಟ್ಟೆಯಲ್ಲಿ ನಡೆಯುವ ಯಾವುದೇ ಬದಲಾವಣೆ ನೇರವಾಗಿ ಗ್ರಾಮೀಣ ಆರ್ಥಿಕತೆಯ ಮೇಲೂ ಪರಿಣಾಮ ಬೀರುತ್ತದೆ.

ಕೇರಳದಲ್ಲಿ ತೆಂಗು ಬೆಳೆಯುವ ಪ್ರದೇಶ ಅತ್ಯಧಿಕವಾಗಿದ್ದರೆ, ತಮಿಳುನಾಡು ಉತ್ಪಾದನೆಯಲ್ಲಿ ಮುಂಚೂಣಿಯಲ್ಲಿದೆ. ಆಂಧ್ರಪ್ರದೇಶ ಉತ್ಪಾದಕತೆಯಲ್ಲಿ ಮುಂಚೂಣಿಯಲ್ಲಿದೆ. ಕರ್ನಾಟಕವೂ ದೇಶದ ಪ್ರಮುಖ ತೆಂಗು ಉತ್ಪಾದನಾ ರಾಜ್ಯಗಳಲ್ಲಿ ಒಂದಾಗಿದೆ.

ಕಾಯಿ ಮಾರಾಟದಿಂದ ತೆಂಗಿನ ನೀರಿನವರೆಗೆ : ಭಾರತದ ತೆಂಗಿನ ರಫ್ತು ಮಾರುಕಟ್ಟೆಯ ಸ್ವರೂಪವೇ ಈಗ ಬದಲಾಗುತ್ತಿದೆ.  ಹಿಂದೆ ತೆಂಗಿನಕಾಯಿ, ಕೊಬ್ಬರಿ, ತೆಂಗಿನ ಎಣ್ಣೆ ಮತ್ತು ಸಾಂಪ್ರದಾಯಿಕ ಉತ್ಪನ್ನಗಳೇ ಪ್ರಮುಖವಾಗಿದ್ದವು. ಈಗ ಮಾರುಕಟ್ಟೆಯಲ್ಲಿ ವರ್ಜಿನ್ ತೆಂಗಿನ ಎಣ್ಣೆ, ತೆಂಗಿನ ಹಾಲು, ತೆಂಗಿನ ನೀರು, ಸಕ್ರಿಯ ಇಂಗಾಲ, ತಾಜಾ ಮತ್ತು ಹೆಪ್ಪುಗಟ್ಟಿದ ತೆಂಗು, ಕೊಬ್ಬರಿ ಹಾಗೂ ವಿವಿಧ ಮೌಲ್ಯವರ್ಧಿತ ಉತ್ಪನ್ನಗಳು ಸ್ಥಾನ ಪಡೆಯುತ್ತಿವೆ.

ವಿಶೇಷವಾಗಿ ತೆಂಗಿನ ಚಿಪ್ಪನ್ನು ವ್ಯರ್ಥ ವಸ್ತುವಾಗಿ ನೋಡುವ ಬದಲು ಸಕ್ರಿಯ ಇಂಗಾಲ ತಯಾರಿಕೆಗೆ ಬಳಸಲಾಗುತ್ತಿದೆ. ನೀರು ಮತ್ತು ಗಾಳಿ ಶುದ್ಧೀಕರಣ ಸೇರಿದಂತೆ ಹಲವು ಕೈಗಾರಿಕಾ ಬಳಕೆಗಳಲ್ಲಿ ಇದಕ್ಕೆ ಬೇಡಿಕೆ ಇದೆ. ತೆಂಗಿನ ನಾರಿನಿಂದ ಪರಿಸರ ಸ್ನೇಹಿ ಉತ್ಪನ್ನಗಳು, ಜಿಯೋಟೆಕ್ಸ್ಟೈಲ್‌ಗಳು ಮತ್ತು ತೋಟಗಾರಿಕಾ ಬಳಕೆಯ ವಸ್ತುಗಳೂ ತಯಾರಾಗುತ್ತಿವೆ.

₹25 ಕೋಟಿಯಿಂದ ₹7,038 ಕೋಟಿಗೆ! :  ತೆಂಗಿನ ಉತ್ಪನ್ನಗಳ ರಫ್ತಿನ ಬೆಳವಣಿಗೆಯನ್ನು ದೀರ್ಘಾವಧಿಯಲ್ಲಿ ನೋಡಿದರೆ ಬದಲಾವಣೆಯ ಪ್ರಮಾಣ ಇನ್ನಷ್ಟು ಸ್ಪಷ್ಟವಾಗುತ್ತದೆ.  2001-02ರಲ್ಲಿ ಭಾರತದ ತೆಂಗಿನ ಉತ್ಪನ್ನಗಳ ರಫ್ತು ಕೇವಲ ₹25.3 ಕೋಟಿ ಇತ್ತು. 2025-26ಕ್ಕೆ ಅದು ₹7,038.35 ಕೋಟಿ ತಲುಪಿದೆ. ಅಂದರೆ, ತೆಂಗಿನ ಉತ್ಪನ್ನಗಳು ಕೇವಲ ಸ್ಥಳೀಯ ಕೃಷಿ ಉತ್ಪನ್ನದಿಂದ ಜಾಗತಿಕ ಮೌಲ್ಯವರ್ಧಿತ ಮಾರುಕಟ್ಟೆಯ ಉತ್ಪನ್ನಗಳಾಗಿ ಬದಲಾಗಿವೆ.ಅಮೆರಿಕ, ಯುಎಇ, ಶ್ರೀಲಂಕಾ, ಜರ್ಮನಿ, ರಷ್ಯಾ, ಟರ್ಕಿ, ಬೆಲ್ಜಿಯಂ, ಬ್ರಿಟನ್ ಮತ್ತು ನೆದರ್ಲ್ಯಾಂಡ್ಸ್ ಪ್ರಮುಖ ಮಾರುಕಟ್ಟೆಗಳಾಗಿ ಹೊರಹೊಮ್ಮಿವೆ.

ರೈತರಿಗೆ ನಿಜವಾದ ಅವಕಾಶ ಇಲ್ಲಿದೆ :  ತೆಂಗಿನ ರೈತರಿಗೆ ಈಗಿನ ಬದಲಾವಣೆಯ ದೊಡ್ಡ ಅವಕಾಶ. ಕಾಯಿ ಬೆಲೆಯ ಮೇಲೆ ಮಾತ್ರ ಅವಲಂಬಿತರಾಗದೆ ಮೌಲ್ಯವರ್ಧಿತ ಉತ್ಪನ್ನಗಳ ಕಡೆಗೆ ಸಾಗುವುದು ಉತ್ತಮ. ತೆಂಗಿನಕಾಯಿ ,ಕೊಬ್ಬರಿ , ಎಣ್ಣೆ ಎನ್ನುವ ಸಾಂಪ್ರದಾಯಿಕ ಸರಪಳಿಯ ಬದಲಾಗಿ ತೆಂಗಿನ ನೀರು, ತೆಂಗಿನ ಹಾಲು , ವರ್ಜಿನ್ ತೆಂಗಿನ ಎಣ್ಣೆ , ಸಕ್ರಿಯ ಇಂಗಾಲ , ನಾರು , ಜಿಯೋಟೆಕ್ಸ್ಟೈಲ್ , ಆಹಾರ ಮತ್ತು ಆರೋಗ್ಯ ಉತ್ಪನ್ನಗಳು ಎಂಬ ದೊಡ್ಡ ಮಾರುಕಟ್ಟೆ ಈಗ ತೆರೆದುಕೊಳ್ಳುತ್ತಿದೆ. ಇದರಿಂದ ರೈತ ಉತ್ಪಾದಕ ಸಂಸ್ಥೆಗಳು, ಸಹಕಾರ ಸಂಘಗಳು ಮತ್ತು ಗ್ರಾಮೀಣ ಸಂಸ್ಕರಣಾ ಘಟಕಗಳಿಗೆ ಹೊಸ ಅವಕಾಶ ಸೃಷ್ಟಿಯಾಗಬಹುದು.

ತೆಂಗಿನ ತೋಟದಲ್ಲಿ ಮತ್ತೊಂದು ಆದಾಯದ ದಾರಿ : ತೆಂಗಿನ ಮರದ ಕೆಳಭಾಗವನ್ನು ಖಾಲಿ ಬಿಡದೆ ಬಹು ಕೃಷಿ ಪದ್ಧತಿಯನ್ನು ಅಳವಡಿಸಿಕೊಳ್ಳುವ ಸಾಧ್ಯತೆಯೂ ಹೆಚ್ಚುತ್ತಿದೆ. ಕರ್ನಾಟಕ, ತಮಿಳುನಾಡು ಮತ್ತು ಕೇರಳದ ಹಲವು ಪ್ರದೇಶಗಳಲ್ಲಿ ತೆಂಗಿನ ತೋಟಗಳ ನಡುವೆ ಕಾಳುಮೆಣಸು, ಕೋಕೋ, ಕಾಫಿ ಹಾಗೂ ವಿವಿಧ ಹಣ್ಣು ಬೆಳೆಗಳನ್ನು ಸಂಯೋಜಿಸಿ ಹೆಚ್ಚುವರಿ ಆದಾಯ ಪಡೆಯುವ ಪ್ರಯತ್ನಗಳು ನಡೆಯುತ್ತಿವೆ. ಇದು ಒಂದೇ ಬೆಳೆಯ ಬೆಲೆ ಕುಸಿತದ ಅಪಾಯವನ್ನು ಕಡಿಮೆ ಮಾಡುವುದರ ಜೊತೆಗೆ ಭೂಮಿಯ ಬಳಕೆಯ ದಕ್ಷತೆಯನ್ನೂ ಹೆಚ್ಚಿಸಬಹುದು.

ಸರ್ಕಾರದ ಆದ್ಯತೆ : ತೆಂಗಿನ ವಲಯದಲ್ಲಿ ಉತ್ಪಾದನೆ, ಉತ್ಪಾದಕತೆ, ತೋಟಗಳ ಪುನಶ್ಚೇತನ ಮತ್ತು ಮೌಲ್ಯವರ್ಧನೆಗೆ ಸರ್ಕಾರ ಹೆಚ್ಚಿನ ಒತ್ತು ನೀಡುತ್ತಿದೆ. 2025-26ರಲ್ಲಿ ತೆಂಗು ಅಭಿವೃದ್ಧಿ ಮಂಡಳಿಯ ವಿವಿಧ ಚಟುವಟಿಕೆಗಳಿಗೆ ₹147.21 ಕೋಟಿ ಬಿಡುಗಡೆ ಮಾಡಲಾಗಿದೆ. 11 ಪ್ರದರ್ಶನ ಹಾಗೂ ಗುಣಮಟ್ಟದ ಸಸಿ ಉತ್ಪಾದನಾ ತೋಟಗಳಲ್ಲಿ ಸುಮಾರು 2.41 ಲಕ್ಷ ಗುಣಮಟ್ಟದ ಸಸಿಗಳನ್ನು ಉತ್ಪಾದಿಸಲಾಗಿದೆ. ಇದೇ ಅವಧಿಯಲ್ಲಿ ಸುಮಾರು 2,175 ಹೆಕ್ಟೇರ್ ಪ್ರದೇಶವನ್ನು ಹೊಸ ತೆಂಗು ಬೆಳೆಗೆ ತರಲಾಗಿದೆ.

ತೆಂಗಿನ ತೋಟಗಳ ಉತ್ಪಾದಕತೆ ಹೆಚ್ಚಿಸುವ ಕಾರ್ಯಕ್ರಮವು 18,800 ಹೆಕ್ಟೇರ್ ಪ್ರದೇಶವನ್ನು ಒಳಗೊಂಡಿದ್ದು, 48,696 ರೈತರಿಗೆ ಪ್ರಯೋಜನವಾಗಿದೆ. ಪುನರ್‌ನಾಟಿ ಮತ್ತು ತೋಟಗಳ ಪುನಶ್ಚೇತನ ಕಾರ್ಯಕ್ರಮವು ಐದು ವರ್ಷಗಳಲ್ಲಿ 25,517 ಹೆಕ್ಟೇರ್ ಪ್ರದೇಶವನ್ನು ಒಳಗೊಂಡಿದೆ.

2026-27ರ ಕೇಂದ್ರ ಬಜೆಟ್‌ನಲ್ಲಿ ₹350 ಕೋಟಿ ಮೌಲ್ಯದ ಉನ್ನತ ಮೌಲ್ಯದ ಕೃಷಿ ವಲಯದ ಹಂಚಿಕೆಯಲ್ಲಿ ತೆಂಗು ಉತ್ತೇಜನ ಯೋಜನೆ ಘೋಷಿಸಲಾಗಿದ್ದು, ಗುಣಮಟ್ಟದ ನೆಡುವ ಸಾಮಗ್ರಿ, ತೋಟ ವಿಸ್ತರಣೆ, ಪುನಶ್ಚೇತನ, ಬೆಳೆ ಆರೋಗ್ಯ ಮತ್ತು ಸಮಗ್ರ ಸಂಸ್ಕರಣೆಗೆ ಬೆಂಬಲ ನೀಡುವ ಉದ್ದೇಶ ಹೊಂದಿದೆ.

ಸವಾಲುಗಳೂ ಇವೆ : ಜಾಗತಿಕ ಮಾರುಕಟ್ಟೆ ಅವಕಾಶ ಹೆಚ್ಚಾದರೂ ತೆಂಗು ರೈತರ ಮುಂದೆ ಕಾರ್ಮಿಕರ ಕೊರತೆ, ಮರ ಏರುವ ಕಾರ್ಮಿಕರ ಅಭಾವ, ಹೆಚ್ಚುತ್ತಿರುವ ಕೂಲಿ, ಹಳೆಯ ತೋಟಗಳ ಪುನಶ್ಚೇತನ ಮತ್ತು ಉತ್ಪಾದಕತೆ ಸೇರಿದಂತೆ ಹಲವು ಸಮಸ್ಯೆಗಳಿವೆ. ಹೀಗಾಗಿ ರಫ್ತು ಹೆಚ್ಚಳ ಮಾತ್ರ ತೆಂಗು ರೈತರ ಆದಾಯ ಹೆಚ್ಚಳಕ್ಕೆ ಸಾಕಾಗುವುದಿಲ್ಲ. ರೈತರಿಗೆ ಉತ್ತಮ ಬೆಲೆ, ಸ್ಥಳೀಯ ಸಂಸ್ಕರಣೆ, ಸಂಗ್ರಹಣೆ, ಮೌಲ್ಯವರ್ಧನೆ ಮತ್ತು ನೇರ ಮಾರುಕಟ್ಟೆ ಸಂಪರ್ಕವೂ ಅಗತ್ಯ.  ಹೀಗಾಗಿ “ತೆಂಗಿನಕಾಯಿಗೆ ಎಷ್ಟು ಬೆಲೆ?” ಎನ್ನುವುದರಿಂದ “ಒಂದು ತೆಂಗಿನ ಮರದಿಂದ ಎಷ್ಟು ಮೌಲ್ಯ ಸೃಷ್ಟಿಸಬಹುದು?” ಎನ್ನುವತ್ತ ಕೃಷಿ ಚಿಂತನೆ ಬದಲಾಗಬೇಕಾದ ಸಮಯ ಬಂದಿದೆ. ತೆಂಗಿನ ಮರವನ್ನು ‘ಕಲ್ಪವೃಕ್ಷ’ ಎಂದು ಕರೆಯುವ ಸಂಪ್ರದಾಯದ ಅರ್ಥವೇ ಈಗ ಹೊಸ ರೂಪದಲ್ಲಿ ಜಾಗತಿಕ ಮಾರುಕಟ್ಟೆಯಲ್ಲಿ ಕಾಣಿಸಿಕೊಳ್ಳುತ್ತಿದೆ.

ಪ್ರತಿದಿನ ಕೃಷಿ-ಗ್ರಾಮೀಣ-ಪರಿಸರ-ಹವಾಮಾನ ಬದಲಾವಣೆ ಹಾಗೂ ಇತರ ಮಾಹಿತಿಗಾಗಿ  ನಮ್ಮ “ದ ರೂರಲ್‌ ಮಿರರ್.ಕಾಂ”WhatsApp Channel  ಫಾಲೋಮಾಡಲು ಇಲ್ಲಿ ಕ್ಲಿಕ್‌ ಮಾಡಿ

India is rapidly transforming its coconut sector from a traditional farming activity into a diversified, value-added and export-oriented industry. Coconut product exports reached ₹7,038.35 crore in 2025-26, registering a 62% year-on-year increase. India accounts for 31.24% of global coconut production and the sector supports nearly 30 million livelihoods, including around 10 million farmers. The export basket is expanding beyond traditional coconut, copra and oil to virgin coconut oil, coconut milk, coconut water, activated carbon, frozen coconut and other value-added products. The next major opportunity lies in ensuring that this export growth translates into better farm incomes through processing, value addition and stronger farmer-market linkages.